Kõr cĩ katĩ õbõdanĩ Makayyioiti Yesu
3
Gõtõõnõga kĩ ngõõnõga, nyaraga cĩ kẽhẽdacung na agiit cĩ ẽẽn ramma coo. Kẽhẽdacung balna na agiitia nyaragẽt cĩkkõ kĩĩ katĩ ketheryung nẽẽgẽ kaanycung ayait muwẽẽnĩt cĩ abũnna cĩ ẽẽn dĩdĩ. 2 Kadiimnyung na agiit ahaddia thoothonniok wũk, balna aduwa eeta cĩk õthõõth molook cĩ Nyekuco, wũk balna callĩk wũk baa lõõla, kĩ tĩrĩthẽnĩt cĩ Makayyioit Ellioit cĩnac wũ balna alimanecung tionniaha cuguk.3 Ĩcĩ owu, adiim thẽk ngĩ agayyu athinnu ne, wathinniowẽy ĩcĩk ditianẽt cĩ loocu, avvu katĩ eeta cĩk arannung agiit, ĩthõng owobit nẽẽgẽ thoothonniok cĩk gerthek cĩk abarriteei nẽẽgẽ. 4 Õthõõth katĩ nẽẽgẽ athĩ ne, “Utugu da thõõth wũ balna athĩ ne, õbõda katĩ Yesu naboo kuu? Ngaatĩ balna adaaknĩ õõ baajigi baajigi baangietĩ cĩgaac, aavĩ gii vẽlẽk kũdũt, kĩ balna thẽk ngĩ engenyciay lõõcĩ.” 5 Ĩthõng thĩ, aduwa katĩ nẽẽgẽ thõõth coo, nyatarka adiim ngĩ erehei ĩnõõgõ ngatĩ ẽngẽnycanĩ balna Nyekuci tammutiddin, kĩ looc thõõtha cĩ aduwa nẽ. Anyi balna Nyekuci looc kẽtẽẽha kõrgẽna cĩ maamu, ĩthõng ĩlĩkta maama looc. 6 Ngaatĩ aku agĩĩranẽ Nyekuci looc baa lõõla tõwõna cobbi õrrõt. 7 Ĩthõng thõõtha nĩĩcẽ dõ noko, aduwaai balna Nyekuci tammutiddin, kĩ looc kaavutõ gii katĩ ngĩ õdõlan kõr cĩ ditianẽt cĩ loocu. Ĩthõng atdukothi katĩ nẽẽgẽ guyyiatõ, ĩthõng igiiryiay katĩ eeta cĩk athii cĩ athĩrar thõõth cĩ Nyekuco vẽlẽk.
8 Ĩthõng thĩ, gõtõõnõga kĩ ngõõnõga, nyĩ anyiccu thõõth coo kerehewunga. Ĩcĩ Makayyiokto, aduwõy kõr codoi doo kĩ erkinya vucciak codoi thõng, ĩthõng erkinya vucciak codoi, aduwõy kĩ kõr codoi doo. 9 Athii cĩ amĩdmĩd Makayyioiti ngatĩ adĩmanĩ thõõth wũ balna aduwa nẽnẽ, kĩcĩ ahad eeta gwuak. Maka thĩnĩn cĩ Makayyiokto kĩ agiitia, ngatĩ athii cĩ adiimi et ĩmma kadaak, ĩthõng thĩ, adiim nẽ eet vẽlẽk kũtũngtek gerthetin cĩnĩng.
10 Ĩthõng anĩhacet katĩ kõr cĩ Makayyioktoa kĩ goryiaiti. Athii katĩ tammutiddin moloowa cobbi, ĩthõng katĩ ẽgẽrẽthan gua looc, kĩ kaal vẽlẽk cĩk aatĩ loota.
11 Ma katĩ ngĩ atũũthĩ kaala vẽlẽk ketee, eeginnu woccia thẽk niigia eet cĩk attiyyu kuu? Adiim ngĩ ayakcu niigia avuthit cĩ dĩhĩmĩ cĩ athĩknu Nyekuc, 12 kĩcĩ ngaanĩ ereyyu kikiyyia kõr cĩ akuni Nyekuci, ĩthõng abarrittewu niigia ngatĩ woccia akuni nẽ tamanoko.b Kõr nĩcẽ, atũũth katĩ nẽ tammutiddin guyyia, ĩthõng katĩ oboyyie kaala vẽlẽk ĩcĩnnĩ aburthẽta. 13 Ĩthõng thĩ, kẽrẽ naaga tammutiddin kĩ looc cĩ jõr,c cĩ balna abũtana Nyekuci kĩĩ kõrõõk cĩ eet cĩgĩnĩk cĩk abũnna.
14 Ĩthõng thĩna, gõtõõnõga kĩ ngõõnõga, kĩcĩ ngaanĩ ereyyu thõõth coo wo, iticanit thõõth vẽlẽk cĩ anyung agiit ĩĩtõ callẽ, kithii thõõth cĩ gerthe tõ, ĩthõng aavuttu jurrung kĩ Makayyioit ganõna. 15 Nyĩ anyiccu kerehewung ngatĩ erewinie Makayyioiti, nyatarka adiim nẽ eet vẽlẽk keelliay. Thõõth wũ balna aduwa gotoonietĩ cĩnac Paulo buu coo, wũ balna ẽhẽẽdacung nyaragẽtẽy gẽẽnyĩtha wũ balna anyi Nyekuci ĩnõõnõ. 16 Õthõõth Paulo thoothonniok cĩkkõ vẽlẽk nyaragẽtẽy cĩgĩnĩk, gõõla ĩcĩ aduwõy noko, ĩthõng õkõmĩ thoothiowa gwuak cĩk aduwa nẽ. Õngõtan katĩ eeta gwuak cĩk agiithi ooti cĩgĩk, ngatĩ õngõtanĩ thõõth cĩ aduwa Paulo. Atican nẽẽgẽ ketee kĩ thoothonniok cĩk Nyaragẽt cĩk Nyekucak õõgĩ buu. Ĩthõng amaarak katĩ thõõth coo ĩnõõgõ daaĩth.
17 Ĩthõng thĩna, gõtõõnõga kĩ ngõõnõga, kĩcĩ agayyu niigia thõõth coo vẽlẽk wo, aavut vĩrĩngĩng, kĩĩ katĩ athii cĩ ayahacung eeta cĩk atican thoothonniok cĩk gerthek gerthetin, ĩthõng ũtũngtewu avuthit cĩ abũnna. 18 Anycĩk bũnnathĩt kĩ gawinit cĩ aku ĩcĩ Yesu Kiristo cĩ ẽẽn Makayyioit cĩnac kĩ Ellioit cĩnac, keelung agiit ĩtĩlĩthĩt. Ĩdĩhĩthĩt ĩnõõnõ yoko ĩĩthõng kũdũt! Amẽn.