Anycĩk eleeti cuguk Nyekuc
4
Nyia cĩ ĩkõtha jõrẽnĩn kĩ gẽrẽnyõn kõrgẽna cunung wo? Athii wõnõ nẽẽgẽ cĩ avvu kaalĩy ĩcĩk abarritecu niigia, ĩcĩk uukõy thinnetinẽy cuguk? 2 Adiimnyu niigia kaal cĩk athii cĩ ayakcu, ĩthõng atamtamantu gõõl cĩ woccia amũdanu. Arukcu woccia eet, kĩĩ katĩ umuddia kaal nĩĩkẽ. Ĩthõng thĩ, alna athii woccia cĩ amũdanu kaal cĩk adiimnyu jora, kõdẽ pẽkana. Athii niigia cĩ ayakcu kaal cĩkkõ, nyatarka athii niigia cĩ alayyu Nyekuc. 3 Ĩthõng ngĩ alayyu Nyekuc athii cĩ amũdanu kaal nĩĩkẽ, nyatarka alayyu ĩnõõnõ thinnetinẽy ĩcĩk gerthek, kĩĩ katĩ imicci niigia kaal cĩk amũdanu goolliowẽy cĩk adiimnyu.4 Niigia eeta cĩk athii cĩ owobju thõõth cĩ Nyekuco wo. Athii cĩ agayyu niigia ngatĩ anyung gõõnĩthẽt cĩ loocu aaburyiek Nyekuc? Ĩthõng mĩ ẽbẽra eeti ĩmma ngatĩ ẽnnẽ gõõnĩ looc, ĩĩ thĩ nẽ miroit cĩ Nyekuco. 5 Akidiannu niigia thõõth cĩ aduwa Nyaraga cĩ Nyekuco athĩ ne, “Aari Nyekuci Ririwac cĩ Dĩhĩmĩ thinnetinẽy cĩgaac, cĩ adiimnyet ageeta kiirioit kĩ Nyekuc jurrung”? 6 Ĩthõng thĩ, anyet Nyekuci ageeta thimatĩth cobbi. Ĩnõõnõ thĩ cĩ athĩnnĩ Nyaraga cĩ Nyekuco ne,
“Abũrĩ Nyekuci eet cĩk ẽngẽrẽnĩ,
ĩthõng thĩ, anyĩk nẽ eet cĩk athimatĩth bũnnathĩt.”a
7 Anycĩk eleeti cuguk Nyekuc! Ũtũbũrĩt alaan cĩ ririwanĩn cĩk gerthek, kĩĩ katĩ kivir kũtũngewung agiitia. 8 Ivitia ĩĩtõ õjõõntĩ ĩcĩ Nyekuco, kĩĩ katĩ kikiyyia nẽ buu kĩĩthĩ õjõõn ĩcunung. Niigia gẽrẽthanniowa, ũtũũnyĩt athĩn cuguk, ĩthõng ĩtĩlac thinneti cuguk, nyatarka engeryie thinneti cuguk ngatĩ athĩknu thõõth cĩ Nyekuco, kõdẽ thõõth cĩ looc coo. 9 Utuluth, ĩthõng omothiewu õrrõt. Nyĩ nga arannu ithiantaĩ ulua. Omoththie, ĩthõng anyciwu bẽlbẽllõn kĩĩ cũdũrẽnẽt. 10 Anycĩk eleeti cuguk kĩĩ dĩcẽ nguuma cĩ Nyekuco, kĩĩ katĩ kaanyung nẽ ĩĩtõ makatẽ.
Gerthetin cĩ kẽtẽdĩcẽ eet õõgĩ thõõth
11 Gõtõõnõga kĩ ngõõnõga, nyĩ othooththu goonogu cĩk ẽẽn lemnyiok buth. Eeti cĩ eteedi gõõnĩ thõõth, aavĩ kĩcĩ eteedi Ngiran cĩ Nyekuco thõõth. Ĩthõng thĩ, mĩ eteedi niia thõõth cĩ Ngirano, athii cĩ athũnnẽ Ngiran, ĩthõng thĩ, eteedi niia thõõth cĩ Ngirano. 12 Nyekuc dõ, balna cĩ anyi eet Ngiran cĩ ẽtẽẽdĩ thõõth. Ĩnõõnõ dõ cĩ ayak tiirthẽt cĩ ẽẽlanẽ eet, kõdẽ arui eet kadaaitõ. Thõõth jang cĩ mũrrĩ cĩ ayai niia, cĩ woccia ẽtẽdĩcẽ et cĩ abakanonu thõõth wo?
Nyĩ engerennu
13 Ĩthĩktõy da nõõnõ niigia eeta cĩk athinnu ne, “Kovvoyyia katĩ naaga kõr coo, kõdẽ lootha õlõõ ĩcĩ gaalawu ĩcoo, kõdẽ õlõõ cĩ gaalawu nĩcẽ. Ĩthõng athinnu ne, kovvoyyia katĩ kadĩmanna tũwẽnẽt natẽ erkit codoi, ĩthõng kijioktaha nyarobinya cĩk meelĩk.” 14 Nyia woccia cĩ agayyu niigia cĩ lootha wo? Agayyu woccia niigia katĩ ngĩ aavĩ rũgẽtĩ cunung lootha kuu? Aavĩ rũgẽtĩ cunung kĩ rĩnyati wũ gõõ aliba ngerenniet kĩdĩĩc, ĩthõng ikiyyia ithii kaganoko. 15 Othooththu woccia athinnu ne, “Mĩ adiimnyet Makayyioiti ageeta, kabaakta katĩna, ĩthõng kĩdĩmanta thĩ gii coo, kõdẽ gii nĩcẽ.” 16 Ĩthõng thĩ, engerennu kẽnnẽ niigia, nyatarka muwẽẽnĩt cunung, gẽrtha ngẽrẽn cĩ õgõõn noko. 17 Ĩthõng eeti cĩ aga thõõth cĩ abũnna cĩ woccia atican, ĩthõng athii cĩ adĩmanĩ nẽ, ẽẽn gẽrẽthannioit.