Thũũtĩ ahaat cunni
3
Gõtõõnõga kĩ ngõõnõga, athii woccia cĩ avvu eeginnu niigia vẽlẽk limanniok cĩk thõõth cĩ Nyekuco, nyatarka naaga cĩk kalimanna eet wo, etedothĩcet katĩ thõõth gõõla cĩ õkõmĩ õrrõt. 2 Ĩthõng dĩdĩ, kẽgẽrẽthantõy naaga vẽlẽk thoothiowẽy ĩcĩk meelĩk. Ĩthõng thĩ, ma woccia ngĩ uthuutti niigia ahaatua cuguk, eeginnu woccia eet cĩk abũnna cĩk ullu ngatĩ athunnu eleeti cuguk goolliowẽy vẽlẽk.3 Ma kecebei naaga thiihit cĩ dĩcĩlĩm kũtũga cĩ nyangõlẽwoa anyi ĩnõõnõ kotongolehet ageeta, ĩthõng kamar woccia naaga nyangõlẽ nĩcẽ tũrũr. 4 Kõdẽ anycĩk kovowol kĩĩ yelinit. Adiim ngõõt cĩ tiiri kuvungan kovowol cobbi kõtõõ, ĩthõng thĩ, adĩmanini macuccioiti thiihit cĩ dĩcĩ kaganoko, keyelek kovowol gõõl cĩ õkõyyĩ. 5 Gõõla ĩcĩ aduwõy noko, ẽẽn ahaatĩ gii cĩ dĩcĩ ẽla, ĩthõng thĩ, irianĩ eeta ĩnõõnõ ngatĩ aduwanĩ thoothonniok cĩk obbitik. Agaac ngatĩ woccia atũũthĩ gua cĩ dĩcĩlĩm kaganoko bõõnõ cobbi mukukuk! 6 Õgõõn ahaatĩ buu kĩ gua, ẽẽn nẽ gii cĩ gerthe ẽla cĩ eeto. Ẽgẽrẽthan nẽ ẽlẽ cĩ eeto vẽlẽk, atdukeei rũgẽt cĩ eeto vẽlẽk guyyiatõ, ĩthõng ũtũũthẽ nẽ buu guyyia cĩ alna kũdũt.b
7 Abal woccia eeta kẽlẽgẽ vẽlẽk cĩk bõõnak cĩk aatĩ mĩn mĩn, kĩballĩ kĩ kaal cĩk õvõvõt, kĩ cĩk õgõlõt loota cĩk aatĩ mĩn mĩn, kĩ kaal cĩk aatĩ bũlũcatõ cĩk aatĩ mĩn mĩn. 8 Ĩthõng thĩ, kẽnnẽ athii woccia eeti cĩ athũnnĩ ahaat tõ, ẽẽn nẽ gii cĩ athii cĩ ayuwuthi, ĩthõng gẽrtha, abbĩththĩ ahaat thoothonniowa cĩk gerthek cĩk ẽgẽrẽthan eeta.
9 Kadĩhĩth naaga Makayyioit cĩnac kĩ Baangiet ahaata, ĩthõng naboo ĩcĩnnĩ, kacĩĩnĩ eet cĩk engenyciay kaavutõ kĩ Nyekuci wo buu. 10 Aku dĩhĩthẽntĩ kĩ cĩĩnẽnẽt ahaata codoi doo. Gõtõõnõga kĩ ngõõnõga, athii woccia cĩ õgõõn noko. 11 Ẽrẽnnanĩ koccia maama cĩk callĩk kĩ maam cĩk amũcarĩ kebereca cĩ duwwo codoi doo? 12 Gõtõõnõga kĩ ngõõnõga, aari yoko woccia mũũnecĩ olivnya,c kõdẽ aari kẽẽt cĩ vĩnõwo nyẽgẽr cĩ mũũneco? Athiitõ! Athii woccia niia cĩ atĩla maam cĩk callĩk kebereca cĩ duwwo cĩ maam cĩk amũcarĩ.
Aku gẽẽnyĩthĩ cĩ ẽẽn dĩdĩ Nyekuca
13 Ngẽnẽ kõrgẽna cunung cĩ ẽgẽẽnyĩ, ĩthõng aga kaal vẽlẽk? Anycĩk ĩnõõnõ kẽyẽla gẽẽnyĩth cĩnnĩ wo rũgẽta cĩnnĩ ĩcĩ abũnna, ngatĩ athii cĩ ẽngẽrẽnĩ, nyatarka ẽgẽẽnyĩ nẽnẽ. 14 Ĩthõng thĩ, mĩ abbĩththĩ thinneti cuguk ngongowi, kĩ mẽdẽr, kĩ ngẽrẽnthẽt, nyĩ engerennu, ĩthõng nyĩ amuttu thõõth cĩ ẽẽn dĩdĩ. 15 Athii cĩ aku gẽẽnyĩthĩ neccie tammuatiddina, ĩthõng thĩ, aku looca, ĩthõng aku ĩcĩ alaan cĩ ririwanĩn cĩk gerthek.d 16 Nginiwa cĩ ẽẽn eeta muruthiok, ĩthõng abarriteei kaal cĩk eetu, amũdanu tharwaacitin kĩ thoothonniok cĩk gerthek cĩk meelĩk.
17 Ĩthõng thĩ, ĩcĩ owu calla gẽẽnyĩthĩ cĩ aku tammuatiddina, anyi eet kagantõy, ĩthõng athimatĩth, ĩthõng athii cĩ angalĩt eet, ĩthõng ayak tamati cobbi, adĩman tiic cĩ abũnna, ĩthõng athii cĩ angalĩt eeta, ĩthõng athii gẽẽnyĩthĩ, cĩ anyi et kĩthĩ ne, abũnna nẽ, katĩ ngĩ athii cĩ abũnna nẽ. 18 Ma ngĩ akatĩ eeta cĩk ganõnak kinyomo cĩk ganõnak, ẽtẽda katĩ nẽẽgẽ bũnnathĩt.