Nyĩ angalittu eeta
2
Gõtõõnõga kĩ ngõõnõga, kĩcĩ kẽlẽmĩ naaga Makayyioit cĩnac Yesu Kiristo cĩ abulie wo, nyĩ angalittu eeta. 2 Mĩ woccia kikiyyia ballioiti ĩmma cĩ ahimit ceremua cĩk dĩhĩmĩk kĩ mool cĩ ẽẽn daab, ĩthõng ikiyyia eeti ĩmma cĩ ẽẽn ngĩjũrrait buu cĩ ahimit ceremua cĩk thartharĩk. 3 Mĩ arĩcananu niigia et cĩ ahimit ceremua cĩk dĩhĩmĩk wo, ĩthõng entewu ne, “Avwue taaba cĩ abũnna coo,” ĩthõng entewu ngĩjũrrait ne, “Bĩl natẽ, kõdẽ avvu loota ngato,” 4 athii niigia cĩ angalittu eleeti cuguk kõrgẽna cunung, ĩthõng iittu eet cĩk ẽtẽd thoothonniok muwẽẽnta cĩ gerthe?5 Gõtõõnõga kĩ ngõõnõga cĩk kamĩnanung na wo, ĩthĩktõy. Ẽbẽra Nyekuci ngĩjũrra kẽbẽrẽnĩy ĩcĩk loocu, ĩthõng aanyĩk ĩnõõgõ leminit cobbi loota ngato. Ĩthõng uduwak ĩnõõgõ buu thõõth cĩ katĩ õthõl nẽẽgẽ kĩ ĩnõõnõ alaanthẽta cĩnnĩ, cĩ katĩ anyi nẽ eet vẽlẽk cĩk amĩnan ĩnõõnõ. 6 Ĩthõng thĩ kẽnnẽ, balna niigia adaaccu ngĩjũrra thõng. Athii wõnõ cĩ ẽẽn balliok cĩk ĩtdanynyung agiitia? Athii wõnõ cĩ ẽẽn ĩnõõgõ cĩk agurrecung agiitia lokiko? 7 Athii wõnõ cĩ ẽẽn ĩnõõgõ cĩk arannĩ thar cĩk abulie cĩk Makayyioit cunung?
8 Mĩ athunnu niigia Ngiran cĩ addi cĩ eheeddi Nyaragawa ĩcĩ Nyekuco cĩ athĩ ne, “Mĩnan et cĩ abakanonu kaavu kĩcĩ amĩnani niia ẽlẽ cunni,”ab adĩmannu woccia thõõth cĩ edeemothi. 9 Ĩthõng thĩ, mĩ adĩmannu niigia eet õõgĩ jurrung kijiaritõ gõõnõgĩ õõgĩ, ẽgẽrẽthantowu, ĩthõng etediwung agiitia Ngiranĩ cĩ Nyekuco thõõth kĩ gẽrẽthanniowa. 10 Nyatarka eeti cĩ athũnnĩ tĩrĩthẽntiok vẽlẽk Ngirana, ĩthõng ẽgẽrẽthan tĩrĩthẽnĩt codoi doo, ẽgẽrẽthan nẽ tĩrĩthẽntiok cĩk Ngiran vẽlẽk. 11 Nyatarka Nyekuc cĩ athĩ ne, “Nyĩ õkõyyẽ ngaa cĩ et ĩmma,”c ĩthõng naboo ĩĩ ne, “Nyĩ arui.”d Mĩ athii cĩ õkõyyẽ ngaa cĩ eeto, ĩthõng uruwu et, nga thẽk ẽgẽrẽthannu Ngiran noko.
12 Othoothit, ĩthõng iticantu thoothonniok kĩ eeta cĩk katĩ etedothi thoothiowa Ngirana cĩ õõga eet kaavutõ jurrung, 13 nyatarka athii katĩ cĩ amanni Nyekuci et cĩ balna athii cĩ amanni gõõnõgĩ. Ĩthõng thĩ, mĩ balna amanni niia goonogu, amannici katĩ Nyekuci aniitia kõr cĩ katĩ ẽtẽdĩcẽ nẽ eet thoothonniok.
Leminit kĩ tiiciok
14 Gõtõõnõga kĩ ngõõnõga, nyia woccia cĩ abũnna, katĩ ngĩ athĩ eeti ne, ayak nẽ leminit, ĩthõng athii tiicanẽ cĩk abũnna cĩk adĩman nẽ tõ? Ẽẽla woccia thẽk yoko ĩnõõnõ leminiti cĩnnẽ wo? 15 Mĩ kaavu gotoonietĩ, kõdẽ ngoonietĩ cĩ athii cĩ ayak ceremua kĩ dainit, 16 ĩthõng ethek eeti ĩmma kõrgẽna cunung ne, “Bĩtõ, bĩt avvu jurrung, tihimie, ĩthõng uduwõy jurrung,” ĩthõng athii cĩ anyi ĩnõõnõ gii cĩ adiim nẽ kũdũt, bũnnathĩt yoko cĩ thõõth cĩnnĩ wo niin? 17 Gõõla ĩcĩ aduwõy thõng noko, mĩ athii cĩ aduwõy leminti kĩ tiicanẽ cĩk abũnna, ẽẽn kẽnnẽ leminit cĩ adaaha.
18 Ĩthõng thĩ, mĩ woccia õthõõth eeti ĩmma athĩ ne, “Ayahi niia leminit, ĩthõng kayai na tiicanẽ cĩk abũnna.”
Yeleha da leminit cunni cĩ athii tiicanẽ cĩk abũnna tõ wo, ĩthõng keyeleei na leminit cannĩ tiicanẽy ĩcĩk abũnna cĩk kadĩmani na wo. 19 Elemnyu niigia ngatĩ aavẽ Nyekuci codoi doo. Abũnna! Ẽlẽmĩ ririwanĩna cĩk gertheke buu thõõth coo, ĩthõng anyĩk ĩnõõgõ kabarritit kotongollie.
20 Niia giitheeiti coo, adiimi niia keyelothihi thõõth cĩ athĩ ne, athii cĩ ẽẽlani aniitia leminiti cĩ athii tiicanẽ cĩk abũnna tõ? 21 Athii wõnõ cĩ agayyie Abrahamĩf baangietĩ cĩnac, ngatĩ ẽnnẽ nẽ et cĩ abũnna, nyatarka thõõth wũ baa woccia anyĩcẽ nẽ ngẽrĩnĩ Aĩthak,g kĩĩ gii cĩ cavĩto ngatĩ todongintio?h 22 Ĩcĩnĩt nõõnõ leminit cĩnnĩ ngatĩ adĩmanini kõdõwẽ kĩ tiicanẽ cĩgĩnĩk cĩk abũnna. Ikiyyia ũtũbanothĩk leminiti cĩnnẽ, nyatarka tiicanẽ cĩk abũnna wũk balna adĩman nẽnẽ. 23 Ngaatĩ aku edenyianẽ thõõth wũ balna aduwa Nyaraga cĩ Nyekuco ẽnnẽ dĩdĩ cĩ athĩ ne, “Ẽlẽmĩ balna Abrahamĩ thõõth cĩ Nyekuco, ĩthõng nyatarka thõõth nĩcẽ, ikiyyia ẽlẽm Nyekuci ĩnõõnõ kĩĩ et cĩ abũnna.”i Gõõl thĩ balna cĩ aku ẽnnẽ Abrahamĩ gõõnĩ Nyekuco wo neccie. 24 Ĩthõng thĩ, ngato kẽyẽla naaga ngatĩ kabũnnanĩ ĩcĩ Nyekuco, nyatarka tiicanẽ cĩk abũnna cĩk kadĩman naaga, athii cĩ ẽnnẽ, nyatarka leminit dõ.
25 Ĩthõng thĩ, gõõla ĩcĩ aduwõy thõng, athii wõnõ balna cĩ agayyi tegemnyiaiti wũ balna athĩ Rahabj ngatĩ abũnnanĩ, nyatarka thõõth wũ balna avaanĩ nẽ eet wũk balna ẽẽn torotiak, ĩthõng uluguny, ĩthõng itionĩk ĩnõõgõ kĩnĩhĩt gõõla cĩ rẽẽng? 26 Eeti cĩ athii cĩ ĩvõngĩ adaaĩ, ĩthõng thĩ, leminiti cĩ athii tiicanẽ cĩk abũnna tõ adaaĩ.