Nyaraga cĩ ẽhẽẽd
Jemithi
Thawinet cĩ aku ĩcĩ Jemithi
1
Nyaraga cĩ aku ĩcĩ Jemithi, ticciannioit cĩ Nyekuco kĩ cĩ Makayyioit Yesu Kiristoa coo. Keheedi na Nyaraga coo tatũgẽt cĩk ẽẽn õmmõtõ kĩ ramma cĩk eet cĩk Yudei cĩk ẽẽn lemnyiok cĩk athaantothĩk loociok vẽlẽk. Kĩthayyunga.Tĩmaninit cĩ leminto
2 Gõtõõnõga kĩ ngõõnõga, mĩ atĩmaninu niigia goolliowẽy mĩn mĩn, anycĩk kĩĩ gõõl cĩ woccia ebelbellu niigia õrrõt. 3 Nyatarka agayyu niigia ngĩ athĩ ne, ngĩ ĩtĩmanẽ leminiti cunung, amũda katĩ moginiti cunung gõõl cĩ alĩnnĩ. 4 Ĩthõng illimanit ngatĩ omogu thoothonniok vẽlẽk kũdũt, kĩĩ katĩ ĩtĩlĩthĩt okomit dĩdĩ, ĩthõng athii woccia gii cĩ amaacung tõ.
5 Mĩ adiim eeti ĩmma kõrgẽna cunung gẽẽnyĩth, anycĩk niigia ĩnõõnõ kala Nyekuc wũ anyi eet vẽlẽk gẽẽnyĩth kaganoko, ĩthõng athii cĩ ijiowa Nyekuci thõõth cĩ gerthe ĩcĩnnĩ, ĩthõng thĩ, katĩ anyĩwothĩk ĩnõõnõ gẽẽnyĩthĩ. 6 Ĩthõng thĩ, katĩ ngĩ ala nẽ Nyekuc gimma, adiim thẽk ngĩ ẽlẽmĩ nẽ athĩ ne, anya katĩ thẽk Nyekuci aneeta gii nĩcẽ dĩdĩ, ĩthõng athii cĩ akidan nẽ. Nyatarka eeti cĩ akidan thõõth õgõõn nẽ, kĩ maama cĩk atik ngõõtĩ õrrõt. 7 Ĩthõng thĩ, eeti cĩ akidan thõõth, athii woccia cĩ ahad nẽ athĩ ne, ijiowa katĩ nẽ gimma ĩcĩ Makayyiokto, 8 nyatarka ayak nẽ muwẽẽnĩt goolliok ramma, ĩthõng athii cĩ ũũlĩ ngatĩ woccia adĩmanĩ gii cĩ edeemothi.
Ngĩjũrra kĩ balliok
9 Lemnyioiti cĩ ẽẽn ngĩjũrrait, adiim thẽk woccia ngĩ irian nẽ, nyatarka ẽlẽm Nyekuci ĩnõõnõ. 10 Ĩthõng thĩ, lemnyioiti cĩ aballie, irian woccia nẽ buu, nyatarka aanyĩk Nyekuci ĩnõõnõ kĩĩ, et cĩ athii cĩ tiir, nyatarka adaaĩ katĩ nẽ kĩ vureenti cĩ boono. 11 Nyatarka iliba kõr kĩ aburthẽt, ĩthõng ũtũũth kẽẽt, kuturura ballõk cĩk ngaanĩ alĩnna thõng, ĩthõng athaanẽ bũnnathĩtĩ cĩnĩng. Gõõla nĩĩco dõ noko, athii katĩ ballioiti kĩ balinit cĩnnĩ vẽlẽk.
Agatan Nyekuci eet cĩk õmõgĩ tĩman
12 Agatan Nyekuci et cĩ õmõgĩ tĩman, nyatarka mĩ ijiar nẽ tĩman nĩcẽ, amũda katĩ nẽ dũmaniniet cĩ anyinit cĩ rũgẽtõ, wũ balna abũtaneei Nyekuci eet cĩk amĩnan ĩnõõnõ.
13 Ma ngĩ atĩmaninu niigia, athii woccia eeti cĩ õthõõth athĩ ne, “Atĩmanna Nyekuci aneeta.” Athii woccia Nyekuci cĩ atĩmanni, nyatarka kolli woccia gii cĩ atĩman Nyekuc, kĩdĩman gii cĩ gerthe, kõdẽ athii nẽ cĩ atĩman et ĩmma. 14 Aku tĩmanĩ ĩcĩnac, nyatarka thoothonniok cĩk gerthek cĩk kabarriteei naaga cĩk athinniet ageeta, ĩthõng edettiet kẽgẽrẽthantõy. 15 Ĩthõng thĩ, amaaracet thoothiowa cĩk gerthek ageeta kẽgẽrẽthantõy, ĩthõng ĩtĩlĩth gerthetini kĩĩ maka, ĩthõng ikiyyia amaaraet daaĩth.
16 Gõtõõnõga kĩ ngõõnõga, nyĩ anyiccu et ĩmma kĩgoolung agiitia. 17 Aku anyinti cĩ abũnna cĩ callĩ tammuatiddina ĩcĩ Baangiet cĩ ẽngẽnyca kõr, nyĩĩlok kĩ mũnyũny, alna nẽ dõõkĩthĩ gõõla codoi dõ, ĩthõng athii cĩ ũũkcĩ kĩ rieta. 18 Ẽbẽranẽt Nyekuci ngatĩ ẽngẽnycanet ageeta kĩĩtõ eet cĩgĩnĩk, ĩthõng itiona nyemut cĩ ẽẽn dĩdĩ kaanyet ageeta rũgẽt cĩ jõr.
Lemnyiok cĩk athĩrar thõõth, ĩthõng ĩdĩmanita
19 Gõtõõnõga kĩ ngõõnõga, ĩthĩrarit thõõth coo, anycĩk eet dodoyyie kĩthĩktõy tamanoko, ĩthõng athii cĩ õthõõth nẽẽgẽ tamanoko, ĩthõng athii cĩ avaracĩth nẽẽgẽ tamanoko. 20 Nyatarka athii cĩ ayaha varacĩ cĩ eeto rũgẽt cĩ abũnna cĩ atarnanĩ Nyekuci. 21 Ĩthõng thĩna, ketee ũtũngĩt thoothonniok vẽlẽk cĩk ẽẽn riiriny kĩ gerthetin cĩ akuuwa looc oo, nyĩ engerennu, elemit nyemut wũ balna alimanothicung agiitia cĩ katĩ ẽẽlanung agiitia.
22 Ĩthĩhĩt niigia thõõth cĩ Nyekuco, ĩthõng thẽk adiim ngĩ adĩmannu thõõth cĩnnĩ wo. Mĩ athii cĩ adĩmannu, ĩgoollu kẽnnẽ eleeti cuguk kaganoko. 23 Eeti cĩ athĩrar thõõth, ĩthõng thĩ, athii cĩ adĩman gii cĩ aduwa thõõth wo, aavĩ kẽnnẽ kĩ eeti cĩ acĩn nguum cĩnnĩ madarawa, 24 ĩthõng mĩ ĩcĩn nguum cĩnnĩ madarawa vẽlẽk, ũũk nĩĩco noko, ĩthõng erehek mĩ õgõõn nguum cĩnnẽ kuu. 25 Ĩthõng thĩ, eeti cĩ arĩcana ngatĩ arũbanĩ thõõth cĩ aduwa Ngiranĩb cĩ abũnna, wũ balna õõga eet kaavutõ jurrung, ĩthõng alna adĩman thõõth coo, ĩthõng athii cĩ erehei thõõth wũ balna athĩrar nẽnẽ, ĩthõng ĩdĩman nẽ, ĩthõng agatan katĩ Nyekuci ĩnõõnõ, nyatarka thõõth cĩ adĩman nẽ ẽẽ.
26 Ma ngĩ ahad eeti ĩmma athĩ ne, keeni et cĩ Nyekuco, ĩthõng õthõõth taktak, ĩgõõl nẽ ẽlẽ cĩnnĩ, ĩthõng ĩthĩnga aticanni thõõth cĩ Nyekuco ĩcĩnnĩ. 27 Gõõl cĩ kõwõbĩ naaga Nyekuc cĩ callĩ cĩ ẽlẽmĩ Nyekuci Baangietĩ coo, cĩ kathũnnĩ boyyiok kĩ ngaay cĩk bõyyĩk pĩrnanta cĩnĩng. Ĩthõng kuthutti naaga eleeti cĩgaac kithii cĩ anyet lõõcĩ coo kẽgẽrẽthantõy.