Tiito 2

Liman niia eet cĩk aatĩ mĩn mĩn

Ĩthõng niia Tiito, liman thẽk thõõth cĩ ẽẽn dĩdĩ. 2 Liman eet cĩk obbitik kilimanit ngatĩ athũnnĩ eleeti cĩgĩk, kĩ ngatĩ ayaĩ nẽẽgẽ avuthit cĩ ongolini eeta ĩnõõgõ, abũnna ngĩ ayak leminit cĩ ẽẽn dĩdĩ kĩ mĩnan kĩ gõõl cĩ õmõgĩ thoothonniok.

3 Ĩthõng gõõla nĩĩco dõ noko, liman ngaay cĩk nyaatĩk buu, kaavutõ gõõla cĩ atarnanĩ Nyekuci. Anyĩk niia ĩnõõgõ kithii cĩ ẽtẽd eet õõgĩ kaganoko, ĩthõng athii cĩ awũd mẽrtẽ õrrõt, ĩthõng thĩ, adiim thẽk nẽẽgẽ ngĩ aliman thõõth cĩ abũnna cĩ Nyekuco. 4 Ĩthõng thĩ, aliman woccia nẽẽgẽ ngaay cĩk ẽẽn ngĩthõrõk kĩmĩnanit maacua cĩgĩk kĩ dõõlĩ cĩgĩk, 5 kĩĩ katĩ kuthutti eleeti cĩgĩk, ĩthõng ũtũbũrĩt thoothonniok cĩk ẽẽn riiriny, ĩthõng athũnnĩ korookjiok cĩgĩk, ĩthõng athimatĩth, ĩthõng ĩthĩraritõ thoothonniok cĩk maacua cĩgĩk, kĩĩ katĩ kithii cĩ õthõõth eeta thõõth cĩ Nyekuco buth.

6 Ĩthõng gõõla nĩĩco dõ, thẽẽr kõdõõt cĩk ẽẽn ngĩthõrõk kuthutti eleeti cĩgĩk jurrung. 7 Ĩthõng niia buu, rĩcana ngatĩ ẽyẽlẽcẽ eet gõõl cĩ adĩmanẽ thõõth cĩ abũnna. Liman eet thĩnĩna cunni dĩdĩ, kĩ gõõla ĩcĩ tiiri. 8 Duwa thõõth cĩ abũnna, kĩĩ katĩ kithii cĩ ẽpẽkanĩ eeti ĩmma. Angawan katĩ mĩrõwa cugunniek, nyatarka athii thõõth cĩ gerthe cĩ amudiay ĩcĩnac tõ.

9 Liman nyakapanak buu kĩthĩraritõ thoothonniok cĩk makayyiok cĩgĩk, ĩthõng iticantothĩk ĩnõõgõ jurrung, gẽrtha ngĩ ẽpẽkanõy kĩ ĩnõõgõ thõng, 10 kõdẽ õgõrõth kaal cĩgĩk. Ĩthõng thĩ, abũnna ngĩ adĩman nẽẽgẽ thoothonniok cĩk abũnna dõõkĩthĩ, kĩĩ katĩ kelemit makayyiowa cĩgĩk ĩnõõgõ, ĩthõng anycĩk nẽẽgẽ liman cĩ Nyekuco cĩ ẽẽn Ellioit cĩnac kabarrittiek eeta.

11 Nyatarka eyelehet bũnnathĩtĩ cĩ Nyekuco gõõl cĩ elianẽ eeta vẽlẽk. 12 Alimannet bũnnathĩtĩ cĩ Nyekuco ageeta kũtũbũrĩt thoothonniok cĩk ẽẽn riiriny cĩk looc coo, ĩthõng kuthutti eleeti cĩgaac, ĩthõng yoko kabaaitõ gõõla cĩ atalneei Nyekuci, 13 nga naaga kayak muwẽẽnĩt cĩ kẽrẽwĩ kõr, cĩ ditianẽt cĩ loocu cĩ katĩ edenyianẽ bulẽnĩtĩ, cĩ Yesu Kiristo cĩ ẽẽn Nyekuc cĩnac cobbi kĩ Ellioit cĩnac. 14 Ẽlẽmaaĩ balna nẽ ẽlẽ cĩnnĩ kadaak, nyatarka ageeta, kĩĩ katĩ kõõgaẽt thoothonniowẽy ĩcĩk gerthek vẽlẽk, ĩthõng anyet kĩĩtõ eet cĩgĩnĩk cĩk ũtũũnyet nẽ, kĩĩ katĩ kidiimit naaga ngĩ kadĩman thoothonniok cĩk abũnna dĩdĩ.

15 Ĩthõng thĩ, adiim woccia thẽk niia ngĩ alimani kaal cĩkkõ, tĩrĩth ĩnõõgõ thoothonniowẽy cĩgĩk ĩcĩk abũnna, ĩthõng egerenyewu ĩnõõgõ thoothiowẽy cĩgĩk ĩcĩk gerthek, makathĩta cunni vẽlẽk. Ĩthõng nyĩ anyi et ĩmma kũtũbũr thõõth cĩ aduwa niia.