Nyaraga cĩ eheedi Paulo Tiito
Kĩthawõy Tiito
1
Nyaraga cĩ kẽhẽdaci na Paulo aniitia coo. Aneeta nyakapanait cĩ Nyekuco, ĩthõng keeni na tionniaita cĩ Yesu Kiristo.b Kitioniay balna na kikiyyiak eet wũk balna ẽbẽra Nyekuci, kuduwak ĩnõõgõ kelemit leminit kĩ gẽẽnyĩth cĩ Nyekuco, kĩĩ katĩ kivitia kabaaitõ nẽẽgẽ gõõla ĩcĩ atalneei Nyekuci. 2 Ẽẽn coo leminit kĩ gẽẽnyĩth cĩ aavĩ muwẽẽnta cĩ abũnna ĩcĩ rũgẽt cĩ alna kũdũt, wũ balna abũtana Nyekuci, wũ athii cĩ õvõlõng, baa ngaanĩ kẽtẽrẽhaĩ itini. 3 Ĩthõng thĩ, ma balna itina ĩcĩ edeemothi, ikiyyia Nyekuci Ellioiti cĩnac anya nyemut coo, ĩthõng uduwaha aneeta kũũk kekebĩk eet thõõth cĩ aduwa nẽ.4 Tiito ngẽrnanĩ cannĩ kir lemintia, kẽhẽdaci na aniitia Nyaraga coo. Anyĩk Nyekuc Baangiet cĩnac kĩ Ellioit cĩnac Yesu Kiristo kaanyci aniitia buu bũnnathĩt kĩ ganõn.
Tiic cĩ Tiito looca cĩ Kẽrẽẽtẽ
5 Kuungnici balna na aniitia looca cĩ Kẽrẽẽtẽ cĩ alĩha maama, kĩĩ katĩ, dẽcak tiic wũ balna ngaanĩ uungnothi, ĩthõng ẽbẽra makayyiok cĩk lemnyiowu korookjiowẽy ĩcĩk gaalawu vẽlẽk kĩ balna ngĩ kaduwaci na aniitia. 6 Adiim thẽk makayyioiti cĩ eet cĩk kelethiawak ngĩ ẽẽn et cĩ athii cĩ adĩman thoothonniok cĩk gerthek, ĩthõng ayak ngaa codoi doo, ĩthõng adiim thẽk doolia cĩgĩnnẽk buu ngĩ ẽẽn lemnyiok, ĩthõng athĩhĩ thõõth cĩ baatĩnnĩ kĩ cĩ yaatĩnnĩ, ĩthõng athii cĩ muotĩ. 7 Nyatarka ẽẽn makayyioiti cĩ eet cĩk kelethiawak ticciannioit cĩ Nyekuco, adiim thẽk ngĩ ẽẽn et cĩ ayak avuthit cĩ abũnna. Ĩthõng athii cĩ ẽẽn nẽ et cĩ ẽngẽrẽnĩ, adiim thẽk ngĩ ẽẽn et cĩ athii cĩ aaburi thĩnĩn, ĩthõng athii cĩ ẽẽn bakciait, kõdẽ et cĩ aaburi jora, kõdẽ adiim nyarobinya cĩk meelĩk gõõla cĩ gerthe. 8 Adiim thẽk nẽ ngĩ ẽẽn et cĩ amĩnan eet cĩk avvu kõrõõk cĩnnĩ, ĩthõng amĩnan thõõth cĩ abũnna, ĩthõng athũnnĩ ẽlẽ cĩnnĩ jurrung, kĩĩ dĩhĩma, ĩthõng athimatĩthĩ. 9 Adiim thẽk nẽ ngĩ athũnnĩ thõõth wũ balna ẽẽn dĩdĩ wũ alimanothi ĩnõõnõ, kĩĩ katĩ kẽẽl limanĩ cĩnnẽ wo lemnyiok, ĩthõng ĩtĩrĩth eet cĩk adiim ngĩ abũrĩ thõõth cĩ ẽẽn dĩdĩ coo.
10 Nyatarka mẽẽlĩ eeta cĩk abũrĩ thõõth cĩ Nyekuco, ĩgõõl gõõnõgĩ gõõla cĩ õthõõthĩ thõõth cĩ ẽẽn võlõng. Arru thẽk kir eeta gwuak cĩk Yudei, wũk balna ivitia ĩĩtõ lemnyiok wũk ẽlẽmĩ Ngiran cĩ Mutha gõõla ĩcĩ abũũranĩ eeta cĩk maacĩk eleeti cĩgĩk.c 11 Adiim thẽk ngĩ abĩlnĩ nẽẽgẽ liman cĩnĩng cĩ gerthe wo, nyatarka ẽhẽcĩ limanĩ cĩnĩng wo korookjiok cĩk meelĩk, ĩthõng aduwa nẽẽgẽ võlõng cĩnĩng, kĩĩ katĩ kijiokta nẽẽgẽ nyarobinya. 12 Aduwa balna eeti ĩmma codoi ĩcĩnĩng cĩ athĩ ne, õthõõth nẽ molook cĩ Nyekuco athĩ ne, “Ẽẽn eeta cĩk Kẽrẽẽtẽ dõõkĩthĩ volongnyiak, ĩthõng ẽẽn nẽẽgẽ eet cĩk gerthek õrrõt, ẽẽn lavlavyiak, ĩthõng ĩĩtõ nyamuttiok buu.” 13 Ẽẽn thõõth coo dĩdĩ, ĩthõng thĩna, gerenyek ĩnõõgõ õrrõt, kĩĩ katĩ kayait nẽẽgẽ leminit cĩ tiiri Nyekuca, 14 ĩthõng ũtũngtek iyiaintiok cĩk athii cĩ ẽẽn dĩdĩ cĩk Yudei, kĩ tĩrĩthẽntiok cĩk eet cĩk ũtũbũrĩt thõõth cĩ ẽẽn dĩdĩ.
15 Dĩhĩm thõõth vẽlẽk cĩ eet cĩk callĩk thinneti cĩgĩk. Ĩthõng thĩ, eetĩnẽy ĩcĩk gerthek ooti ĩcĩk ũtũbũrĩt thõõth cĩ Nyekuco, athii thõõth cĩ abũnna tõ, nyatarka ẽgẽrẽthantẽ ooti cĩgĩk, kĩ muwẽẽnĩt cĩ thinneti cĩgĩk vẽlẽk. 16 Eeta cĩk õgõõn ketee wo athĩ ne, aga nẽẽgẽ Nyekuc, ĩthõng nẽnnẽ aduwa tiicanẽ cĩk adĩman nẽẽgẽ wo athĩ ne, athii cĩ aga nẽẽgẽ Nyekuc dĩdĩ. Athii nẽẽgẽ cĩ athĩhĩ Nyekuc, ĩthõng athii nẽẽgẽ cĩ adĩman thoothonniok cĩk abũnna.