Dĩman niia eet vẽlẽk jurrung
3
Duwak eet cugunik kĩthĩraritõ thõõth cĩ aduwa makayyiowa kĩ gaala cĩk looc cunung, kithii cĩ õjõthẽcĩ thõõth cĩnĩng. Anyĩk ĩnõõgõ kĩdĩmantothĩk, kĩĩ katĩ kĩdĩmanit thõõth cĩ abũnna dõõkĩthĩ, 2 ĩthõng nyĩ anyiccu eet kadaacitõ eeta, abũnna ngĩ aatĩ nẽẽgẽ ganõna kĩ eet õõgĩ, ĩthõng ĩĩtõ thimattiak kĩ eet vẽlẽk.3 Kagiithi balna gõõ naaga ngatĩ kabũrnĩ thõõth cĩ Nyekuco, nyatarka kĩgoollie naaga, ĩthõng kĩĩtõ nyakapanak cĩk kadiim thoothonniok cĩk gerthek cĩk ẽmẽdẽ cĩk adiim eleeti cĩgaac, Keegin balna gõõ eet cĩk gerthek, ĩthõng kalĩlĩ, nyatarka kaal cĩk eetu, aaburneccet eeta, ĩthõng kaaburneei naaga buu eet vẽlẽk. 4 Ĩthõng thĩ, ma balna ngĩ edenyiay thimatĩthĩ kĩ mĩnan cĩ Nyekuc Ellioit cĩnac, 5 ikiyyia ellet nẽ ageeta, athii cĩ ẽẽn, nyatarka thõõth ĩmma cĩ abũnna cĩ kadĩman naaga, ĩthõng thĩ, aku balna nẽ ẽẽlaneet, nyatarka amannĩcet nẽ ageeta, ĩthõng ũtũũny gerthetin cĩnac vẽlẽk. Anyet balna nẽ ageeta kittiryiay naboo, ĩthõng kayait rũgẽt cĩ jõr Ririwaca ĩcĩ Dĩhĩmĩ,a 6 cĩ anyet nẽ ageeta kagatantẽ jurrung, nyatarka Ellioit cĩnac Yesu Kiristo, 7 kĩĩ katĩ kelemet Nyekuci ageeta bũnnatina cĩnnĩ, ĩthõng kũrũbta koccia rũgẽt cĩ alna kũdũt õlõõ cĩnnĩ. 8 Thõõth cĩ ẽẽn dĩdĩ coo. Kadiimi na ngatĩ arĩcananẽ niia ngatĩ alimaneei lemnyiok kowobit thoothonniok cĩkkõ, kĩĩ katĩ koccia kĩdĩmanit nẽẽgẽ thoothonniok cĩk abũnna, cĩk ẽlẽmĩ thõõth cĩ Nyekuco.
Gõõl cĩ arũmẽẽnĩ lemnyiowa
9 Nyĩ ẽpẽkanonu niia kĩ eet õõgĩ giithakthẽtĩna, ĩthõng nyĩ ẽpẽkanonu thar cĩk õõ baatĩ baajigiet cĩgaac cĩk baa lõõla, kõdẽ egerenyonu, kõdẽ uukonu thõõth cĩ Ngiranb cĩ Mutha, nyatarka athii thoothonniowa cĩkkõ cĩ tiirti, ĩthõng athii kaala cĩk abũnna tõ ĩcĩnĩng vẽlẽk. 10 Ma ngĩ ĩkõtha eeti ngẽrõnĩt kõrgẽna ĩcunung, tĩrĩth ĩnõõnõ kõr codoi, kõdẽ ngõnana ramma, ma vurtia cĩnnĩ, nyĩ nga edecothi ĩnõõnõ naboo. 11 Aga niia buu et cĩ aavĩ noko wo ngatĩ õkõmĩ õõ cĩnnẽ, adĩman thoothonniok cĩk gerthek, ĩthõng etedĩk nẽ ẽlẽ cĩnnĩ mĩn gerthetin.
Thõõth cĩ aturna
12 Kitionaci na aniitia Artemath, kõdẽ Taicikath. Ma ngĩ õdõlani ĩmma aniitia, rẽpan gõõl ivitia kurumtõy õlõõ ĩcĩ gaalawu ĩcĩ Nikopolithĩ, kathĩ yoko ne, kũũk kaavu attien coo natẽ.c 13 Mĩ ĩtĩngathõ Thẽna, eeti cĩ aga ngiran jurrung, kĩ Apoloth, ẽẽl niia ĩnõõgõ giiwa vẽlẽk ĩcĩ katĩ adiim nẽẽgẽ gõõla ĩcĩ heeroni cĩnĩng ẽẽ. 14 Abũnna ngĩ aticanni eeta cĩgaac jurrung, kĩĩ katĩ kayait kaal vẽlẽk cĩk adiim nẽẽgẽ, nyatarka gẽrtha ngatĩ ẽnnẽ nẽẽgẽ nyamuttiok.
15 Ĩthayyi eeta cĩk karũmẽna kĩ aneeta ngato wo vẽlẽk aniitia. Thaa eet vẽlẽk cĩk amĩnannet ageeta lemintia cĩ Nyekuco. Ĩthõng anycĩk Nyekuc kaanyung agiitia vẽlẽk bũnnathĩt cĩnnĩ!