Wathinniok cĩk ditianẽt cĩ loocu
3
Gaa niia Timoti ngatĩ katĩ õkõmĩ avuthiti wathinniowẽy cĩk ditianẽt cĩ loocu. 2 Nyatarka amĩnan katĩ eeta eleeti cĩgĩk mĩn, ĩthõng ĩmĩnanit nyarobinya, ẽngẽrẽn, ĩthõng õdõng eleeti, adaac eet taktak, ĩthõng ĩthĩnga athĩrar baajigi kĩ ngaagĩ, ĩthõng athii cĩ ennei Nyekuc, kõdẽ eet ne, ibalallẽ, ĩthõng athii cĩ callẽ nẽẽgẽ. 3 Athii nẽẽgẽ cĩ ayaĩ mĩnan, athii cĩ amanni eet cĩk adĩman ĩnõõgõ buth, atarnanĩ ngatĩ ẽtẽẽdĩ gõõnõgĩ, athii cĩ athũnnĩ eleeti cĩgĩk, ẽẽn eet cĩk joreeninu, ĩthõng ũtũbũrĩt thoothonniok vẽlẽk cĩk abũnna. 4 Avvu katĩ õvõlõngĩ gõõnõgĩ mĩrõwẽy ĩcĩgĩk, ẽjẽnẽcĩ nẽẽgẽ ngatĩ õthõõth thoothonniok taktak, ẽngẽrẽn, ĩthõng ĩmĩnanit kaal cĩk adiim eleeti cĩgĩk, nyatarka amĩnan ngatĩ adĩmanĩ thoothonniok cĩk adiim nẽẽgẽ, ĩthõng ũtũbũrĩt ngatĩ amĩnanĩ Nyekuc. 5 Kõdẽ woyyia ngĩ õvõlõng athĩ ne, ẽẽn nẽẽgẽ eet cĩk Nyekucak, ũtũbũrĩt nẽẽgẽ tiirthẽt cĩ Nyekuco, cĩ woccia anyi ĩnõõgõ kĩĩtõ eet cĩgĩnĩk dĩdĩ. Nyĩ iriokcu niia kĩ eet cĩk õgõõn noko.6 Ẽẽn eeta neekie eet cĩk maacĩk cĩk õvvõ korookjiowẽy cĩk eetu, ĩthõng ũnũmnũmmanit ngaay cĩk athii cĩ tiirti, cĩk agam muwẽẽnĩtĩ cĩ abarritẽcĩ eleeti cĩgĩk ĩnõõgõ kĩdĩmanit thoothonniok vẽlẽk cĩk gerthek. 7 Atarnanĩ ngaay neekie ngatĩ alimanĩ thoothonniok cĩk jõr dõõkĩthĩ, ĩthõng thĩ, athii nẽẽgẽ cĩ ẽlẽmĩ thõõth cĩ ẽẽn dĩdĩ. 8 Kĩ balna ngĩ ẽpẽkan Janẽthĩ kĩ Jamberetha thõõth cĩ Mutha,b abũrĩ eeta cĩkkõ buu thõõth cĩ ẽẽn dĩdĩ, ẽẽn nẽẽgẽ eet cĩk gerthek ooti, ĩthõng ũtũbũrĩt nẽẽgẽ ngatĩ ayaĩ leminit Nyekuca. 9 Athii katĩ cĩ õkkõ rũgẽtĩ cĩnĩng jurrung, nyatarka aga katĩ eeta ngatĩ ẽnnẽ thõõth cĩnĩng wo vẽlẽk giithakthẽt, kaavu kĩ balna ngĩ amũda Janẽthĩ kĩ Jambereth.
Tĩrĩthẽnĩt cĩ aturna cĩ aduwaai Paulo Timoti
10 Timoti, agawu niia thõõth wũ balna kalimanei na eet kĩ avuthit cĩ kaavẽ nana. Aga niia thõõth cĩ kadiimi ngĩ kadĩmani nana, kĩ leminit cannĩ, kĩ moginit cannĩ, kĩ mĩnan cannĩ, kĩ ngatĩ kõmõgẽ 11 pĩrnanẽt, kĩ hecinit korookjiowẽy ĩcĩk gaalawu, ĩcĩ Antioi, kĩ ĩcĩ Ikoniomi, kĩ ĩcĩ Lithtra. Ĩthõng thĩ, alna balna ẽlla aneeta Nyekuci thoothiowẽy cĩkkõ vẽlẽk noko. 12 Eeti cĩ õwõb Kiristo Yesu dĩdĩ, amũda katĩ hecinit. 13 Ĩthõng eeta cĩk adĩman thoothonniok cĩk gerthek, cĩk aruwa riinya a ne, kagayya thoothonniok, ĩthõng thẽk athii cĩ aga kir, avvu katĩ gẽrthẽ nẽẽgẽ õrrõt kijiaritõ eet vẽlẽk, ĩgõõl gõõnõgĩ, ĩthõng ĩgõõl eeta ĩnõõgõ buu.
14 Ĩthõng thĩ, niinia, thũũtĩ thoothonniok wũk balna alimanothici aniitia, ĩthõng elemu dĩdĩ, nyatarka aga niia õõ ngẽnẽ wũk balna alimanni aniitia. 15 Agawu balna thẽk niia kĩdĩcthẽtĩna thoothonniok cĩk eheeddi Nyaragawa cĩ Dĩhĩmĩ ĩcĩ Nyekuco, cĩk anyi aniitia gẽẽnyĩth cĩ agawẽ gõõl cĩ aku elianẽ, nyatarka leminit cĩ ayahi niia ĩcĩ Kiristo Yesu. 16 Aku thõõth vẽlẽk cĩ eheeddi Nyaragawa ĩcĩ Nyekucoc Nyekuca, ĩthõng abũnna ellet ageet kilimantek eet thõõth cĩ ẽẽn dĩdĩ, ĩthõng ellet ageet kegerenycek gẽrẽthanniok, kĩ ngatĩ kalimanẽcĩ eet gõõl cĩ aatẽ limana cĩ abũnna, 17 kĩĩ katĩ kiliman thõõth cĩ Nyekuco lemnyiok kĩdĩmanit dõõkĩthĩ thoothonniok cĩk abũnna.