4
Kaduwaci dĩdĩ nguuma cĩ Nyekuco, kĩ ĩcĩ Kiristo Yesu cĩ katĩ aku ẽtẽd thoothonniok cĩk eet cĩk adaaitõ, kĩ cĩk ngaanĩ arũgĩ vẽlẽk katĩ ngĩ iliba alaanthẽt cĩnnẽ, kaanyi na aniitia tĩrĩthẽnĩt coo. 2 Rionĩk eet thõõth cĩ Nyekuco jurrung, kõdẽ woyyia ngĩ amũjĩ, kõdẽ õkõmĩ ngatĩ adĩmanẽ noko, limanek eet noko thõõth cĩ Nyekuco kũdũt, yelek eet goolliok cĩk gerthek, gerenyek gẽrẽthanniok. Anyĩk thinneti cĩgĩk kokomit, ĩthõng liman ĩnõõgõ jurrung thĩnĩna ĩcĩ alalĩ. 3 Aku katĩ kõr cĩ aharnẽcĩ eeta liman cĩ ẽẽn dĩdĩ cĩ Nyekuco, ĩthõng utuwuyyie owobit kaal cĩk abarriteei eleeti cĩgĩk kaganoko, ĩthõng idiimitõ limanniok cĩk aduwaai ĩnõõgõ thoothonniok cĩk adiim ngĩ athĩrar nẽẽgẽ. 4 Avvu katĩ abũrĩ nẽẽgẽ ngatĩ athĩknĩ thõõth cĩ Nyekuco cĩ ẽẽn dĩdĩ, ĩthõng utuwuyyie othoothitõ iyiaintiok cĩk baa lõõla cĩk kaganoko. 5 Ĩthõng thĩ, niinia muk thoothonniok vẽlẽk jurrung. Mõk pĩrnanẽt, ticcan tiic cĩ alimanẽ niia Nyemut cĩ Abũnna, ĩthõng dẽcak jurrung tiic vẽlẽk wũ balna anyi Nyekuci.6 Ĩthõng thĩ, yoko aavu rũgẽtĩ cannie kĩ anyinti cĩ anyĩwothĩk Nyekuc vẽlẽk, ĩthõng õbõwẽ kõr cĩ kadaaknẽ nana. 7 Kĩdĩmana balna na jore cĩ abũnna, ĩthõng kẽdẽcaha na virẽt cannĩ, ĩthõng kũthũtẽ leminit dĩdĩ. 8 Ĩthõng itina coo, ereyyi aneeta anyinti cannie cĩ abũnna, cĩ katĩ anya aneeta Makayyioiti cĩ ẽtẽd thõõth jurrung, kõrra cĩ katĩ õbõdanĩ nẽ loota ngato. Ĩthõng athii cĩ ẽẽn anyinit cannĩ dõ cĩ katĩ anya nẽ, ĩthõng thĩ, anyi katĩ eet vẽlẽk buu cĩk adiim ngĩ ẽrẽ ĩnõõnõ kõrra cĩ katĩ alibacĩ nẽ eeta.
Thoothonniok cĩk aduwaai Paulo Timoti
9 Timoti, ijjia dõlana tamanoko, 10 nyatarka ĩmĩnan Dẽmathĩ kaal cĩk looc coo, ũtũngehia kaavu mĩn, ĩtĩnga ũũk õlõõ cĩ gaalawu cĩ Thẽthalonika. Ĩthõng naboo ĩtĩnga Kẽrẽthanĩ buu ũũk looca cĩ Galathia, ĩthõng ũũk Tiito looca cĩ Dalmatia, kĩĩ katĩ kõõt nẽẽgẽ vẽlẽk kiticanit tiic cĩ Makayyiokto. 11 Luka yoko dõ cĩ karũmẽna ngato wo. Yõwõta Marĩkõa iriokta, nyatarka ẽlla nẽ aneeta tiica cannĩ. 12 Kitiona balna naboo na Taicikath kũũk õlõõ cĩ gaalawu cĩ Ẽvẽthathĩ. 13 Ĩthõng ma ngĩ ikiyyia, yõhõtaha cẽrẽm cĩ lajjo wũ balna kuungni õlõõ cĩ Karpũthĩ, õlõõ cĩ gaalawu cĩ Torawothi kĩ nyaragẽt buu kir wũk adĩmaniay ruccienta.
14 Ĩdĩmana balna naboo Alẽkthanda aneeta buth, eeti wũ gõõ attur thĩĩk nyekiteta. Adũman katĩ Makayyioiti thõõth cĩ adĩmaneca nẽ aneeta wo. 15 Ẽgẽẽnycõy niia kĩ ĩnõõnõ, nyatarka ẽẽn nẽ et cĩ aaburi ngatĩ ẽpẽkanĩ thõõth vẽlẽk cĩ kaliman naaga wo.
16 Balna ma ngĩ ovoyyia eeta aneeta lokika itina ĩcĩ owu, athii balna eeti ĩmma cĩ aku ẽẽlana aneeta tõ, nyatarka iviryea eeta vẽlẽk, ĩthõng kaavu na dõ. Kadiimi woccia na Nyekuc katamatĩk ĩnõõgõ, nyatarka thõõth coo. 17 Ĩthõng thĩ, balna abĩlĩ Makayyioiti dõ tõõna cannĩ, ĩthõng anya tiirthẽt, kĩĩ katĩ kilimanek eet nyemut cĩ Nyekuco, ĩthõng ĩthĩraritõ eeta cĩk athii cĩ ẽẽn Yudei vẽlẽk, nyatarka aneeta, ĩthõng ẽẽlaha balna aneeta Makayyioiti kũtũga ĩcĩ maawo. 18 Ẽẽlana katĩ gõõ aneeta Makayyioiti pĩrnanta vẽlẽk ĩcĩ gerthe, ĩthõng katĩ ayahana nẽ aneeta jurrung kabicoca cĩnnĩ tammuatiddina. Kaanycĩk ĩnõõnõ kaavu bulẽnta kũdũt! Amẽn.
Thawinet cĩ aturna cĩ Paulo
19 Thawĩha Pirithila kĩ Akwila, kĩ eet vẽlẽk cĩk kõrõõk cĩ Onethivoruthĩ. 20 Aavua Erathtathĩ õlõõ cĩ gaalawu cĩ Korinto, ĩthõng kũtũngea balna na Torovimath õlõõ cĩ gaalawu cĩ Miletothi, nyatarka balna ĩmmõrĩ nẽ thõng. 21 Tõõwa niia taman ngaanĩ kõdõlan attienĩ.b Ĩthayyi Yubuluthi kĩ Puden, kĩ Linath, kĩ Kilaudia, kĩ lemnyiok vẽlẽk cĩk aatĩ ngato.
22 Anyĩk Makayyioit kaavu ririwaca cunni. Anyĩk bũnnathĩt cĩnnĩ kaavu ĩcunni.