Nyĩcẽkẽrowoc cĩ Kiristo
2
Ĩthõng niia doolec cannie wo, avvu kõmĩtha ĩcĩ bũnnathĩt cĩ Kiristo Yesu. 2 Kĩ kaal wũk balna athihi niia ngĩ kaduwa na kẽbẽrẽnĩy cĩk eet cĩk meelĩk, kĩĩ katĩ bĩt duwak niia buu eet cĩk ẽẽn lemnyiok cĩk athũnnĩ tiic wũ ũũlĩ ngatĩ alimanĩ gõõnõgĩ.3 Komogit naaga vẽlẽk kĩ aniitia pĩrnanẽt kõdõwẽ, avvu kĩ nyĩcẽkẽrowocĩ cĩ abũnna cĩ Kiristo Yesu. 4 Athii nyĩcẽkẽrowocĩ cĩ iithio tiicanẽ cĩk eet cĩk ollik, nyatarka adiim thẽk nẽ kaanyĩk makayyioit cĩnnĩ kẽbẽlbẽl. 5 Gõõla cĩ aduwõy thõng, eeti cĩ ijiar gõõnõgĩ virẽta amũda woccia nẽ anyinit dõ, katĩ mĩ õwõb nẽ ngirantiok cĩk virẽtak. 6 Eeti cĩ evyi õrrõt, aduk woccia thẽk nẽ labĩ ĩcĩ owu. 7 Hada thõõth wũ balna kaduwaci na aniitia jurrung, nyatarka elli katĩ Makayyioiti aniitia gaa thoothonniok cĩkkõ vẽlẽk.
8 Hada Yesu Kiristo, wũ balna arũgũtha Nyekuci daaĩtha, wũ balna arittiay nẽ tatũga cĩ Davide.a Ẽẽn coo Nyemut cĩ Abũnna cĩ kalimani na, 9 cĩ kapĩrnanẽ ngatĩ kecebinie kĩjana kĩ gẽrẽthannioiti. Ĩthõng thĩ, athii woccia cĩ ecebjie thõõth cĩ Nyekuco. 10 Ĩnõõnõ thĩ, cĩ kõmõgẽ na thoothonniok vẽlẽk, nyatarka eet wũk balna ẽbẽra Nyekuci, kĩĩ katĩ kũrũbta nẽẽgẽ buu elianĩt cĩ aavĩ ĩcĩ Kiristo Yesu bulẽnta cĩ alna kũdũt. 11 Thõõth cĩ ẽẽn dĩdĩ coo,
“Ma da balna kadaaitõ naaga kĩ Kiristo,
karũgĩ katĩ naaga kĩ ĩnõõnõ buu.
12 Mĩ kõmõgĩ naaga hecinit,
kagam katĩ naaga looc kõdõwẽ kĩ ĩnõõnõ.
Mĩ kabũrĩ naaga ĩnõõnõ,
abũrnet katĩ nẽ buu ageeta.
13 Mĩ athii leminti cĩnac tõ,
alna elemnyet Yesu ageeta noko,
nyatarka athii woccia cĩ abũrĩ nẽ ẽlẽ cĩnnĩ.”
Ticciannioit cĩ anyi Nyekuc kẽbẽlbẽl
14 Niia Timoti, nyĩ anyi et ĩmma kerektek thoothonniowa cĩkkõ, tĩrĩth ĩnõõgõ nguuma cĩ Nyekuco, kithii cĩ ẽpẽkanõnĩ thoothonniok. Athii pẽkanĩ cĩ ẽẽl et ĩmma, ẽgẽrẽthan kẽnnẽ eet cĩk athĩknẽ. 15 Ticcanõy õrrõt, kĩĩ katĩ ĩthĩ ticciannioit cĩ ẽlẽmĩ Nyekuci. Athii niia cĩ angawani ngatĩ athũnnẽ thõõth cĩnnĩ jurrung, ĩthõng illimanewu niia eet thõõth cĩ ẽẽn dĩdĩ jurrung.
16 Avwua niia rẽẽna ĩcĩ eet cĩk õthõõth thoothonniok cĩk ẽẽn giithakthẽt cĩk adaacĩ Nyekuc, nyatarka anyi thoothiowa cĩkkõ ĩnõõgõ kaavutõ rẽẽna õrrõt ĩcĩ Nyekuco. 17 Athanothi katĩ limanĩ coo looc kaavu kĩ kaakuacĩ cĩ aburburana ẽla, ĩthõng athii cĩ alalĩ buu. Ĩthõng eetĩnẽy ĩcĩkkõ, ẽẽn balna Haĩmẽnauthĩ kĩ Viletuth eet cĩk alimaneei eet thoothonniok cĩk õgõõn ketee, 18 cĩk ũtũngtek thõõth cĩ Nyekuco cĩ ẽẽn dĩdĩ. Athĩ nẽẽgẽ ne, ũrũkta eeta wũk balna adaaitõ vẽlẽk. Ĩthõng ẽẽn thõõth coo võlõng, cĩ ẽgẽrẽthan leminit cĩ eet õõgĩ ĩcĩ Kiristo.
19 Ĩthõng thĩ, abĩlĩ thõõth cĩ Nyekuco tiirthẽta cĩ õkõmĩ, ĩthõng athĩ ne, “Aga Makayyioiti eet cĩgĩnĩk,”b ĩthõng, “Eeta cĩk alayyie thaarĩy cĩk Makayyiokto, adiim thẽk ngĩ uungni nẽẽgẽ thoothonniok cĩk ẽẽn gerthetin.”c
20 Ciitha cĩ et cĩ aballie, aatĩ lõkũlkũlẽta gwuak cĩk adĩmaniay daaba, kõdẽ thĩĩhĩy cĩk athĩ kathalkathal,d ĩthõng aatĩ naboo gwuak cĩk õdõvaniay kẽẽnĩy, ĩthõng etengenyciay gwuak tõdõwaca. Aticanini nẽ õõgĩ wathinniowẽy cĩk obbitik, ĩthõng aticanini õõgĩ wathinniowẽy wũk gõõ dõõkĩthĩ. 21 Ma katĩ ngĩ anyĩk eeti ẽlẽ cĩnnĩ kĩĩ calla thoothiowẽy ĩcĩk gerthek, anyi katĩ Nyekuci ĩnõõnõ kaavu kĩ lõkũlkũlĩ cĩ adĩmaniay daaba, cĩ adĩman tiic cĩ tiiri. Ĩthõng katĩ ĩdĩmanothĩk eeti neccie, kĩĩ katĩ kĩdĩmanek nẽ tiicanẽ vẽlẽk cĩk abũnna Makayyioit.
22 Ĩthõng vir niia thoothonniok cĩk gerthek cĩk abarriteei ngĩthõrõĩ kĩ buweeci. Wõb niia kir thõõth cĩ edeemothi dõõkĩthĩ, yak leminit ĩcĩ Nyekuco, ĩthõng aavut mĩnana kĩ ganõna jurrung kĩ eet cĩk ala Makayyioit thinnetinẽy ĩcĩk callĩk.
23 Nyĩ edecothi niia thoothonniok cĩk ẽpẽkanõnĩ eeta giithakthẽtĩna cobbi õrrõt, aga niia ngĩ ayaha gẽrẽnyõn. 24 Athii woccia ticciannioiti cĩ Makayyiokto cĩ ẽẽn pẽkaniait, ĩthõng thĩ kẽnnẽ, adiim thẽk nẽ ngĩ athimati eet vẽlẽk, ĩthõng ẽẽn limannioit cĩ abũnna cĩ ayak thĩnĩn cobbi eetĩnẽy ĩcĩk apĩrna. 25 Ĩthõng naboo, adiim thẽk nẽ ngĩ atĩrĩth eet cĩk ẽpẽkanõy kĩ ĩnõõnõ gõõla cĩ abũnna jurrung, muwẽẽnta cĩ abũnna cĩ athĩ ne, anyi katĩ Nyekuci ĩnõõgõ kũtũngtek gerthetin cĩnĩng, ĩthõng kĩĩ kagaacõ thõõth cĩnnĩ cĩ ẽẽn dĩdĩ jurrung, 26 ĩthõng katĩ ijiaritõ detinit cĩ alaan cĩ ririwanĩn cĩk gerthek,e cĩ balna aanyĩk ĩnõõgõ kĩĩtõ nyakapanak cĩk atican tiic cĩnnĩ.