Nyaraga cĩ ẽẽn ramma cĩ eheedi Paulo Timoti
1
Ẽbẽrana balna Nyekuci aneeta Paulo kĩthĩ tionniaita cĩ Kiristo Yesu,b ĩthõng anya rũgẽt, cĩ balna kayak naaga rũmẽnta ĩcĩ Kiristo Yesu. 2 Timoti, eeni niia doolec cannĩ cĩ thĩnĩno. Yak bũnnathĩt kĩ tamati kĩ ganõn cĩ aavẽ jurrung, cĩ aku ĩcĩ Nyekuc Baangiet kĩ Makayyioit cĩnac Kiristo Yesu.Nyĩ angawani Makayyioit Kiristo Yesu
3 Kennei na Nyekuc ne, ibalallẽ, cĩ katicanothi thĩnĩna cĩ võõrĩ, kĩ balna ngĩ aticanothi õõ baatĩ baangĩ ĩnõõnõ. Kahadani na aniitia hadintia ĩcĩ abũnna baalin kĩ waathĩn kũdũt, katĩ ngĩ kala Nyekuc. 4 Kahada kõr wũ balna atdukuanĩ tulalõ cugunniek, ĩthõng kadiimi õrrõt ngatĩ kakunie kacinni naboo. Katalli katĩ õrrõt kõrra cĩ karumõnẽ. 5 Kahada leminit cunni cĩ ẽẽn dĩdĩ, wũ balna ayak awotunnie cunnie Loithi ĩcowu, kĩ yaaya cunni Yunith, ĩthõng yoko kagga jurrung, ayahi niia buu leminit nĩcẽ. 6 Nyatarka thõõth coo, kahadaci ticcanõĩ anyinit wũ balna anyi Nyekuci aniitia õrrõt, wũ balna katadici na aniitia athĩn cĩganĩk, ĩthõng kalawõy.c 7 Nyatarka athii balna cĩ anyet Nyekuci ririwac cĩ kongolini looc thõng, ĩthõng thĩ, anyet nẽ ageeta ririwac cĩ tiirthẽto kĩ cĩ mĩnano kĩ gõõl cĩ kathũnnĩ eleeti cĩgaac jurrung.
8 Ĩthõng thĩ, nyĩ angawani niia ngatĩ eyeleei eet thõõth cĩ Makayyioit cĩnac, kõdẽ nyĩ angawani, nyatarka aneeta buu, kõdẽ ngĩ woyyia kaavẽ kĩjana, nyatarka katicanothi Kiristo. Ticcanõĩ tiirthẽt wũ balna anyi Nyekuci aniitia, kĩĩ katĩ kotholit naaga pĩrnanẽt cĩ karũba naaga, katĩ ngĩ kaduwai eet Nyemut cĩ Abũnna.d 9 Ẽẽlawet balna ageeta Nyekuci, ĩthõng ẽbẽraet kĩĩtõ eet cĩgĩnĩk cĩk kaatĩ avuthita cĩ dĩhĩmĩ. Atican Nyekuci ketee, athii cĩ ẽẽn nyatarka thõõth cĩ kadĩman naaga, atican nẽ noko, nyatarka thõõth cĩ tiic cĩnnĩ kĩ bũnnathĩt. Anyet balna Nyekuci ageeta bũnnathĩt, thaarĩy cĩk Kiristo Yesu balna nga kẽtẽrẽhaĩ itini. 10 Ĩthõng thĩ, yoko ikiyyia eyelehet ageeta Ellioiti cĩnac Kiristo Yesu bũnnathĩt cĩ Nyekuco. Atamaac nẽ daaĩth, ĩthõng eyelehet rũgẽt cĩ alna atũkũlĩ kũdũt jurrung, gõõla cĩ Nyemut cĩ Abũnna.
11 Ĩthõng balna ẽbẽrana aneeta Nyekuci kĩthĩ et cĩnnĩ cĩ kirioni Nyemut cĩ Abũnna cĩ jõr, ĩthõng kĩĩthĩ tionniait cĩ kakuni kalimanei eet nyemut coo. 12 Nyatarka thõõth coo, ĩnõõnõ thĩ cĩ kapĩrnanẽ na wo. Ĩthõng athii cĩ kangawani, nyatarka kagga na Kiristo cĩ kelemi na wo, ĩthõng õkõmĩ thĩnĩn cannie, nyatarka athũnnĩ nẽ thõõth wũ balna kaanyi na ĩnõõnõ, gii ma ngĩ õdõlan itini cĩ katĩ õbõdanĩ nẽ. 13 Thõõth wũ balna kalimaneci na wũ ẽẽn dĩdĩ, thũũtĩ niia lemintia, kĩ mĩnana cĩ Kiristo Yesu. 14 Thũũtĩ thõõth cĩ abũnna wũ balna anyĩwothici aniitia elintia cĩ Ririwac cĩ Dĩhĩmĩ,e ĩcĩ aavĩ eletinẽy cĩgaac.
15 Aga niia buu, ũtũngtea balna aneeta eeta vẽlẽk cĩk looc cĩ Athia, ĩnõõgõ õõ Vigelathĩ kĩ Hermogenethĩ.
16 Anyĩk woccia niia Nyekuc katamatĩk Onethivoruth kĩ kõrõõk cĩnnĩ, nyatarka ĩnõõnõ dõõkĩthĩ cĩ anyi thĩnĩn cannĩ kõkõm, athii balna cĩ angawan nẽ ngatĩ aku acinia aneeta ngĩ kaavẽ kĩjanatõ. 17 Ma balna ngĩ iliba Rũmatẽy wo, aku ẽrẽppanna aneeta õrrõt ĩĩthõng kijiowahanĩ. 18 Anya woccia Makayyioit katamatĩk ĩnõõnõ, kõrra cĩ katĩ ẽtẽẽdĩ nẽ thoothonniok cĩk loocu. Aga niia buu õrrõt ngatĩ balna ẽẽlania Onethivoruthĩ aneeta goolliowẽy cĩk meelĩk, balna ngĩ kaavẽ õlõõ ĩcĩ gaalawu cĩ Ẽvẽthathĩ.