Tĩrĩthẽnĩt cĩ ngaay cĩk bõyyĩk kĩ eet cĩk nyaatĩk kĩ nyakapanak
5
Nyĩ avaracii niia et cĩ nyaatĩ, tõngõlẽ ĩnõõnõ duwak thõõth kĩdĩĩc kaavu, kĩ cĩ woyyia aduwaai baaba. Othoothiõy niia kĩ ngĩthõrõk, kĩ cĩ woccia othoothonu kĩ gotoonogu cugunik. 2 Tõngõlẽ ngaay cĩk nyaatĩk duwak thõõth kĩdĩĩc, kaavu kĩ gõõ ngĩ ongollie yaaya. Tõngõlẽ buweeci kaavutõ kĩ ngoonogu duwak thõõth kĩdĩĩc. Dĩman thoothonniok nĩĩko thĩnĩna ĩcĩ võõrĩ.3 Thũũtĩ ngaay cĩk bõyyĩk kir cĩk aatĩ pĩrnanta ĩcĩ adĩccẽ kaala. 4 Ĩthõng thĩ, ma ngĩ aavĩ ngaa ĩmma cĩ bõyyĩ cĩ ayak dõõlĩ cĩgĩnĩk, kõdẽ dõõlĩ cĩk doolenu. Anyĩk nõ niia ĩnõõgõ kiticanit tiic cĩ kõrõõk cĩnĩng, kĩĩ keelitõ baajigi, kĩ ngaagĩ cĩgĩk, kĩ baajigi baajikni, kĩ ngaagĩ cĩgĩk cĩk obbitik, nyatarka atarnanĩ Nyekuci thõõth coo. 5 Ĩthõng ngaa cĩ bõyyĩ cĩ apĩrna dĩdĩ, cĩ athii tionniowa cĩgĩnnẽk tõ, arĩk nẽ leminit kĩ muwẽẽnĩt cĩnnĩ cĩ abũnna ĩcĩ Nyekuco, ĩthõng ala ĩnõõnõ dõõkĩthĩ waathĩn kĩ baalin vẽlẽk, ĩthõng ajin nẽ Nyekuc kẽẽl ĩnõõnõ. 6 Ĩthõng thĩ, ngaa cĩ bõyyĩ cĩ aavĩ avuthita cĩ amĩnyĩ ẽlẽ cĩnnĩ õrrõt media cĩnnĩ, adaak nẽ thõõtha cĩ Nyekuco vẽlẽk, kõdẽ woyyia ngaanĩ arũgĩ nẽ. 7 Duwak tiirion eet thoothonniok cĩkkõ, kĩĩ katĩ kithii woccia eeti ĩmma cĩ emeryi kaganoko.
8 Mĩ aavĩ eeti ĩmma cĩ athii cĩ alnai tionniok cĩgĩnĩk, ẽtẽrẽhanĩ kir õlõõ cĩnnĩ kir, ũtũbũr nẽ thõõth cĩ Nyekuco vẽlẽk, ĩĩ gẽrtha nẽ õrrõt, kijiar et cĩ ngaanĩ kayak leminit.
9 Rũmek ngaa cĩ bõyyĩ goonoginiy cĩk ẽẽn ngaay cĩk bõyyĩk, katĩ ngĩ alacantẽ erkinya cĩgĩnnẽk cĩk ẽẽn eet iyyio, ĩthõng naboo athũnnĩ balna nẽ maac cĩnnĩ jurrung, 10 agayyi nẽ õrrõt ngatĩ adĩmanĩ thoothonniok cĩk abũnna, cĩk aatĩ kĩ cĩk alingtianĩ dõõlĩ cĩgĩnĩk jurrung, kĩ ngatĩ adĩmanẽcĩ kerenniok õlõõ cĩnnĩ, adĩmaneei eet cĩk Nyekucak õlõõ cĩnnĩ jurrung, ẽẽl piryiak, ĩthõng ĩrĩcana gõõ ngatĩ adĩmanĩ thoothonniok vẽlẽk cĩk abũnna.
11 Nyĩ arumeei ngaay cĩk bõyyĩk cĩk ngaanĩ dĩcẽ kebintia ĩcĩ ngaay cĩk bõyyĩk ĩcĩk adiim elinit, nyatarka woccia ngaanĩ adiim abarriteei eleeti cĩgĩk thõõth cĩ tiẽnto, ĩthõng katĩ ũtũbũrĩt nẽẽgẽ thõõth cĩ Kiristo. 12 Ĩthõng katĩ gõõla ĩcoo, ayaktak eleeti cĩgĩk ukwẽẽnĩt ngatĩ ẽgẽrẽthanĩ nẽẽgẽ thõõth wũ balna ũbũtanit nẽẽgẽ. 13 Ĩthõng naboo, ngĩ ẽẽn nẽẽgẽ nyamuttiok, avvu katĩ nẽẽgẽ õyõkõn ciithi taktak. Ĩthõng katĩ ithiantaĩ eteditõ gõõnõgĩ, ngatĩ ẽngẽdanõthĩcẽ thoothonniok cĩk eetu, kĩĩ kothoothitõ thoothonniok cĩk woccia athii cĩ õthõõth buu. 14 Ĩnõõnõ thĩ cĩ kadiimie na, ngaay cĩk bõyyĩk cĩk ngaanĩ dĩcẽ kitiktie naboo, kĩĩ katĩ kittiryia dõõlĩ, ĩthõng uthuutti korookjiok cĩgĩk jurrung, kĩĩ katĩ kithii gõõl cĩ etediet mĩrõwa cĩgaac ageeta. 15 Nyatarka utuwuyyie ngaay cĩk bõyyĩk neekie gwuak vẽlẽk owobit Thĩttan.
16 Ma ngĩ aavĩ ngaa ĩmma cĩ ẽẽn lemnyioit, cĩ ayak ngaay cĩk bõyyĩk õlõõtõtõ cĩnnĩ, anyĩk niia ĩnõõnõ kũthũtĩ ĩnõõgõ jurrung, gẽrtha ngatĩ ayahacĩ nẽ lemnyiok cĩk kelethiawak pĩrnanẽt ngatĩ ẽẽlĩ ĩnõõgõ. Abũnna ngĩ athũnnĩ eeta cĩk Nyekucak ngaay cĩk bõyyĩk cĩk apĩrna dĩdĩ.
17 Abũnna ngĩ ongollie eeta eet cĩk obbitik cĩk kelethiawak ngĩ aticanni jurrung, ĩthõng ũdũmantẽ jurrung, arru kir cĩk aticanni õrrõt tiiciowẽy ĩcĩk irionĩcẽ nẽẽgẽ eet, ĩthõng illimanit ĩnõõgõ. 18 Nyatarka aduwa Nyaraga cĩ Nyekucoa athĩ ne, “Nyĩ ecebi kũtũk cĩ tomoto katĩ ngĩ atura labĩ, anyĩk tõmõt kadawõy,”bc ĩthõng “Eeti cĩ iticanõy vẽlẽk, abũnna thẽk ngĩ adũmanni.”d
19 Nyĩ elemi thõõth cĩ õvõlõngĩ eeta makayyioit cĩ eet cĩk kelethiawak, gii katĩ dũũwũk ngĩ udukta eeta cĩk ẽẽn ramma, kõdẽ iyyio cĩk ẽẽn kẽbẽrẽ kĩĩtõe ne, ẽẽn thõõth neccie dĩdĩ, ĩthõng thĩ, katĩ elemu niia. 20 Gerenyek makayyioit ngatĩ aatẽ eeta cĩk kelethiawak, katĩ ngĩ ẽgẽrẽthan thoothonniok, kĩĩ katĩ woccia kotongollie lemnyiowa gwuak.
21 Kaduwaci tiirion nguuma cĩ Nyekuco kĩ ĩcĩ Kiristo Yesu, kĩ anjĩlẽt cĩgĩnĩk wũk balna eberyiay, kennecci na aniitia ne, wõb thoothonniok cĩk kaduwaci na tiirion wo, ĩthõng nyĩ angaliti eeta.
22 Nyĩ angarngarothi ẽbẽra eet tiica cĩ Makayyiokto tamanoko, ngatĩ agatanẽ, ĩthõng atadiwu athĩn cugunik ootinẽy cĩgĩk. Nyĩ ẽgẽrẽthani niia thoothonniok, nyatarka ẽgẽrẽthan goonogu. Anyĩk ẽlẽ cunni kũbũna kĩĩ calla.
23 Nyĩ ngaanĩ awudi maam dõ, tar mẽrtẽ cĩ dĩcĩ, kĩĩ katĩ kẽẽl kẽẽng cunni, nyatarka gõõ immori niia.
24 Agayyi eeta gwuak thoothonniowẽy cĩgĩk ĩcĩk gerthek nĩĩco noko, ngaanĩ kõdõlanit teedinet. Ĩthõng aatĩ eeta gwuak cĩk athii cĩ edenyiay thoothonniowa cĩgĩk cĩk gerthek tamanoko, avvu katĩ edenyiay vurtia. 25 Gõõla ĩcĩ aduwõy noko, agayyi thoothonniowa cĩk abũnna cĩk eet õõgĩ nĩĩco noko. Ĩthõng thoothonniowa cĩk abũnna cĩk adĩmanni labak, avvu katĩ edenyiay.