Liman cĩ ẽẽn võlõng
4
Aduwa Ririwacĩ cĩ Dĩhĩmĩ jurrung athĩ nẽ ne, aatĩ katĩ eeta gwuak wathinniowẽy cĩk aturna, cĩk avvu abũrĩ ngatĩ ẽlẽmĩ Nyekuc, ĩthõng ivitia ĩthĩraritõ thõõth cĩ liman cĩ ririwanĩn cĩk gerthek,a cĩk ẽẽn volongnyiak. 2 Aku limanĩ cĩ thoothonniok cĩk ririwanĩn cĩk gerthek koo, volongnyiaĩ ĩcĩk adaak muwẽẽnĩtĩ cĩ thinneti cĩgĩk cĩk agawĩ thõõth cĩ abũnna kĩ cĩ gerthe. 3 Athĩ nẽẽgẽ ne, gẽrtha ngatĩ atihẽnĩ eeta, ĩthõng gẽrtha ma ngĩ aduk aheenin õõgĩ, ẽngẽnyca balna Nyekuci, aheenin nĩĩkẽ kĩĩ kuduit eeta cĩk ẽẽn lemnyiok, cĩk aga thõõth cĩ ẽẽn dĩdĩ, ĩthõng entek Nyekuc ne, ibalallẽ. 4 Nyatarka abũnna kaala vẽlẽk wũk balna ẽngẽnyca Nyekuci, ĩthõng thĩ, ma ngĩ kennei naaga Nyekuc ne, ibalallẽ, kuduit thĩ woccia kaal vẽlẽk, 5 nyatarka thõõth cĩ Nyekuco kĩ lawinit, aku ẽlẽmĩ Nyekuci aheenin cĩkkõ.Ĩtĩrĩth Paulo Timoti
6 Ma ngĩ alimaneei niia gotoonogu kĩ ngoonogu thoothonniok cĩkkõ, akuni katĩ eeni niia ticciannioit cĩ abũnna cĩ Kiristo Yesu, cĩ alĩnna lemintia ĩcĩ ẽẽn dĩdĩ ĩcĩ Nyekuco, kĩ limana cĩ abũnna cĩ elemi balna niia, ĩthõng owobu. 7 Ũtũngtek iyiaintiok cĩk ẽẽn giithakthẽt cĩk abũrĩ thõõth cĩ ẽẽn dĩdĩ ĩcĩ Nyekuco, ĩthõng thĩ, liman ẽlẽ cunni ĩthĩ et cĩ Nyekuco. 8 Thõõth cĩ alimanẽ niia ẽlẽ cunni elli aniitia goolliowẽy gwantĩk, ĩthõng thĩ, ma ngĩ eeni niia et cĩ Nyekuco dĩdĩ, elli aniitia kaalĩy vẽlẽk, ĩthõng ayahaci aniitia gatan rũgẽta ĩcĩ yoko wo, kĩ rũgẽta ĩcĩ katĩ nganĩ aku.
9 Ẽẽn thõõth cĩ kaduwa na wo dĩdĩ, ĩthõng adiim woccia ma ngĩ kẽlẽmĩ naaga vẽlẽk, 10 ĩthõng katicaninia õrrõt thõõtha coo, nyatarka kaarĩca muwẽẽnĩt cĩ abũnna cĩnang ĩcĩ Nyekuc cĩ arũgĩ, cĩ ẽẽn Ellioit cĩ eet vẽlẽk, kĩ eet wũk elemit ĩnõõnõ kir.
11 Limanek ĩnõõgõ thoothonniok cĩkkõ, ĩthõng uduwawu ĩnõõgõ kowobit jurrung. 12 Nyĩ anyi et ĩmma kithii cĩ ongolini aniitia, nyatarka athĩ ne, ngaanĩ eeni niia dĩca. Anyĩk lemnyiok kĩcĩnta ĩcunni gõõl cĩ õwõbĩ nẽẽgẽ thõõth cĩ Nyekuco, riona cunni, kĩ avuthita cĩ aavẽ jurrung, kĩ gõõla cĩ amĩnanẽ niia eet, kĩ gõõla cĩ ẽlẽmẽ thõõth cĩ Nyekuco, kĩ gõõla cĩ athii cĩ adĩmanẽ thoothonniok cĩk ẽẽn riiriny. 13 Thũũtĩ õrrõt ngatĩ ẽbẽlẽcẽ thuwi Nyaraga cĩ Nyekuco, lawintia kuumuc gii ngĩ kikiyyia nana, thẽẽr lemnyiok, ĩthõng ilimanu ĩnõõgõ. 14 Ticcanõĩ gẽẽnyĩth wũ balna anyi aniitia Ririwacĩ cĩ Dĩhĩmĩ kõrra, wũ balna agatani makayyiowa cĩk kelethiawak aniitia, ngatĩ atadici athĩn cĩgĩk.
15 Thũũtĩ thoothonniok cĩkkõ, ĩthõng ĩdĩmanu jurrung tiirthẽta cunni vẽlẽk, kĩĩ katĩ woccia kĩcĩnta eeta gõõl cĩ gõõ adĩmanẽ niia thoothonniok cĩk abũnna õrrõt. 16 Thũũtĩ avuthit cĩ rũgẽt cunni, kĩ thõõth cĩ alimaneei niia eet jurrung! Avvu dĩman thoothonniok cĩkkõ kũdũt, nyatarka mĩ adĩmani niia thoothonniok cĩkkõ, eeli katĩ niia ẽlẽ cunni, ĩthõng eelu katĩ eet cĩk athikni aniitia buu.