Makayyiok cĩk kelethiawak
3
Thõõth cĩ kẽlẽmĩ dĩdĩ coo cĩ athĩ ne, mĩ adiim eeti ĩmma ngĩ ẽẽn makayyioit cĩ eet cĩk kelethiawak, ẽbẽra eeti neccie tiic cĩ tiiri õrrõt. 2 Ĩthõng thĩ, yoko abũnna thẽk makayyioiti cĩ eet cĩk kelethiawak ma ngĩ ẽẽn nẽ et cĩ, athii cĩ abaca thoothonniok cĩk gerthek, abũnna thẽk ngĩ ẽẽn et cĩ ayak ngaa codoi doo, abũnna ngĩ ẽẽn et cĩ athũnnĩ ẽlẽ cĩnnĩ, ĩthõng abũnna ngĩ ẽẽn et cĩ ongollie eeta ĩnõõnõ, ĩthõng ẽẽn et cĩ ẽlẽmĩ kerenniok õlõõ ĩcĩnnĩ, ĩthõng ẽẽn et cĩ aga ngatĩ alimanĩ lemnyiok. 3 Abũnna thẽk ngĩ ẽẽn et cĩ athii cĩ ẽẽn bakciait, kõdẽ et cĩ joro, abũnna ngĩ ẽẽn et cĩ alalĩ thĩnĩn cĩnnẽ, kõdẽ athii cĩ ẽẽn nẽ lolenit, ĩthõng athii cĩ amĩnan nyarobinya. 4 Ĩthõng abũnna thẽk makayyioiti cĩ eet cĩk kelethiawak, ngĩ ẽẽn et dĩdĩ cĩ athũnnĩ kõrõõk cĩnnĩ jurrung, ĩthõng irionĩk dõõlĩ cĩgĩnĩk kĩthĩraritõ ĩnõõnõ, ĩthõng otongollie thõõth cĩ aduwa nẽnẽ. 5 Mĩ athii cĩ agam eeti kõrõõk cĩnnĩ jurrung, athũnnĩ woccia katĩ nẽ eet cĩk kelethiawaka cĩk Nyekucak kuu? 6 Abũnna thẽk ngĩ ẽẽn makayyioiti cĩ eet cĩk kelethiawak, ngĩ ẽẽn et cĩ ũnũũwĩk leminit cĩ Nyekuco, nyatarka eeti cĩ ẽẽn lemnyioit cĩ jõr, ẽngẽrẽn woccia katĩ nẽ, ĩthõng eteddi katĩ thõõth cĩnnẽ, kuduktõy kĩ alaan cĩ ririwanĩn cĩk gerthek.b 7 Abũnna thẽk ngĩ ẽẽn nẽ et cĩ atarnanĩ eeta cĩk athii cĩ ẽẽn lemnyiok, kĩĩ katĩ kithii cĩ ayak thar cĩk gerthek, ĩthõng kithii cĩ atdukothi nẽ thoothonniok cĩk gerthek cĩk alaan cĩ ririwanĩn cĩk gerthek.Elliok cĩk eet cĩk kelethiawak
8 Abũnna elliowua cĩk eet cĩk kelethiawak buu ngĩ, ẽẽn nẽẽgẽ eet dĩdĩ cĩk ongollie eeta, ĩthõng athũnnĩ thõõth cĩnĩng, athii cĩ aaburi mẽrta õrrõt, ĩthõng athii cĩ amĩnan nyarobinya cĩk amũda gõõla ĩcĩ athii cĩ abũnnanĩ. 9 Abũnna thẽk nẽẽgẽ ngĩ ẽẽn eet cĩk athũnnĩ thoothonniok cĩk Nyekucak cĩk ẽẽn dĩdĩ cĩk lemintiak, gõõla cĩ ayaĩ muwẽẽnĩt cĩ thinneti cĩgĩk cĩk abũnna. 10 Abũnna ngĩ atĩmanni nõõnõ nẽẽgẽ ĩcowu katĩ ngaanĩ kiticantõy, ĩthõng mĩ athii thõõth cĩ gerthe cĩ amudiay ĩcĩnĩng tõ, ĩthõng thĩ, katĩ anyciwu niigia ĩnõõgõ tiic kiticantõy.
11 Ĩthõng gõõla coo buu, abũnna thẽk ngĩ ongollie eeta ngaay cĩk eet cĩk ẽẽl kelethia, ĩthõng aduwa nẽẽgẽ thõõth cĩ ẽẽn dĩdĩ, ĩthõng athii cĩ ẽtẽd eet thoothonniowẽy ĩcĩk gerthek, ĩthõng thĩ, abũnna thẽk ngĩ athũnnĩ eleeti cĩgĩk, ĩthõng athũnnĩ dõõkĩthĩ thoothonniok vẽlẽk cĩk abũnna cĩk aduwa nẽẽgẽ.
12 Abũnna thẽk eeti cĩ ẽẽn ellioit eetĩnẽy ĩcĩk kelethiawak ngĩ ayak ngaa codoi doo, ĩthõng ẽẽn et cĩ athũnnĩ kõrõõk cĩnnĩ, kĩ dõõlĩ cĩgĩnĩk jurrung. 13 Ĩthõng eeta cĩk aticanni jurrung, avvu katĩ amũda nẽẽgẽ tongolinit cĩ õkõmĩ, ĩthõng okomit thinneti cĩgĩk lemintia cĩ ayak nẽẽgẽ, nyatarka Kiristo Yesu.
Gõõl cĩ woccia aatẽ eeta cĩk Nyekucak
14 Ĩthõng thĩ, yoko kamui na ngatĩ katĩ kakunie ĩcunni tamanoko, ĩthõng thĩ, kẽhẽdaci na aniitia thoothonniok cĩkkõ, 15 kĩĩ katĩ, ma ngĩ athii cĩ kakuni na tamanoko, eyeleci katĩ aniitia Nyaraga coo gõõl cĩ woccia aatẽ eeta cĩk kõrõõk cĩ Nyekuco jurrung, nyatarka keegin naaga kelethia cĩ Nyekuc cĩ arũgĩ, ĩthõng kaatĩ naaga kĩ kitiiri cĩ tiiri cĩ athũnnĩ thõõth cĩ ẽẽn dĩdĩ. 16 Athii kidanĩ tõ, ẽẽn coo thõõth cĩ tiiri cĩ alugunyi cĩ ijiar gẽẽnyĩth cĩ eetu, cĩ aduwacet ageeta ngatĩ ẽnnẽ Kiristo ngẽnẽ.
Arittiay balna nẽ loota ngato kĩĩ et kĩ naaga,
ĩthõng ikiyyia ẽyẽla Ririwacĩ cĩ Dĩhĩmĩc athĩ ne,
aanyĩk nẽ Nyekuc kẽbẽlbẽl õrrõt,
ĩthõng ĩcĩnĩt balna anjĩlẽtad buu ĩnõõnõ,
ĩthõng irionni balna thõõth cĩnnẽ loociowẽy ĩcĩk meelĩk,
ngaatĩ thĩ avvunni ẽlẽmĩ eeta thõõth cĩnnĩ, ma natẽ,
ikiyyia ũũwĩ Nyekuci ĩnõõnõ tammuatiddina bulẽnta.