Gõõl cĩ woccia kalawĩ Nyekuc
2
Ĩthõng thĩ, nõõnõ ĩcĩ owu, kĩlaleci lawõõĩ eet vẽlẽk, jin Nyekuc kẽẽl kĩĩ kagatan ĩnõõgõ vẽlẽk, ĩthõng ennewu Nyekuc ne, ibalallẽ, nyatarka ĩnõõgõ vẽlẽk. 2 Lawõõĩ niia alaanẽt kĩ gaala cĩk obbitik vẽlẽk kĩ Nyekuc, kĩĩ katĩ woccia kaavut naaga vẽlẽk ganõna jurrung, kithii thõõth cĩ gerthe, gõõla cĩ kathũnnĩ thõõth cĩ Nyekuco, ĩthõng kotongollie ĩnõõnõ. 3 Lawinit cĩ abũnna coo, cĩ anyi Nyekuc cĩ ẽẽn Ellioit cĩnac kẽbẽlbẽl. 4 Adiim Nyekuci eet vẽlẽk keelliay, kĩĩ katĩ kivitia kagaacõ thõõth cĩ ẽẽn dĩdĩ. 5 Nyatarka aavĩ Nyekuci codoi doo dõ, ĩthõng aavĩ Eeti cĩ ẽẽn thooc codoi doo, cĩ arũm eet kĩ Nyekuc, ĩthõng ẽẽn Eeti neccie Kiristo Yesu. 6 Ẽlẽmanĩ balna nẽ rũgẽt cĩnnĩ kadaak, kĩĩ gii cĩ cavĩto, kĩĩ katĩ kũtũngek Nyekuci eet gerthetin cĩnĩng vẽlẽk. Nyemut thĩ cĩ anyi Nyekuci looc coo, itina ĩcĩ atũbanothi. 7 Ĩthõng balna ẽbẽrana Nyekuci aneeta kĩthĩ et cĩ kirioni Nyemut cĩ Abũnna, ĩthõng kĩĩthĩ tionniait cĩ kalimanei eet cĩk athii cĩ ẽẽn Yudei, nyemut cĩ leminto kĩ thõõth cĩ ẽẽn dĩdĩ. Kaduwa na thõõth cĩ ẽẽn dĩdĩ, athii cĩ kovolongi.8 Kadiimi na eet cĩk maacĩk loociowẽy vẽlẽk kalayyiõy kodongtek athĩn cĩgĩk tammutiddin, kithii varacĩ kĩ pẽkan ĩcĩnĩng tõ.
9 Kadiimi naboo ngaay buu kitihimtie jurrung gõõla cĩ abũnna, kitihimit ceremua cĩk abũnna cĩk athii cĩ anyi eleeti cĩgĩk kedenyciay, kĩĩ katĩ athii eeta cĩ abarriteei ĩnõõgõ, ĩthõng gẽrtha ngatĩ ahimtẽnĩ taktak gõõla cĩ atĩĩthĩ ĩm, kõdẽ ngatĩ ahimti kaal cĩk ẽẽn daab, kõdẽ pẽalnya,a kõdẽ ceremua cĩk adak nyarobinya cĩk meelĩk, 10 ĩthõng thĩ, ĩdĩmantek gõõnõgĩ thoothonniok cĩk abũnna kĩ ngaay cĩk ala Nyekuc.
11 Abũnna ngĩ aliman ngaay vẽlẽk thõõth ngatĩ aatẽ tiv, ĩthõng ĩthĩktõy nẽẽgẽ tiv, ĩthõng owobit thõõth cĩ aduwa eeta cĩk maacĩk. 12 Athii cĩ kẽlẽmacẽ na ngaay kilimanit eet cĩk maacĩk, kõdẽ kĩĩtõ makayyiok cĩgĩk. 13 Nyatarka balna engenyciay Adamĩb ĩcĩ owu, ma vurtia, etengenyiay Ẽva.c 14 Athii balna cĩ ẽẽn Adam cĩ ĩgõõl Thĩttanĩ ẽẽ, ĩthõng thĩ, ĩgõõl balna Thĩttanĩ Ẽva kẽgẽrẽthanõy. 15 Ĩthõng thĩ, katĩ ngĩ athũnnĩ ngaay leminit cĩnĩng, kĩ mĩnan, kĩ ngatĩ adĩmanĩ thõõth cĩ abũnna, kĩ ngatĩ arĩcananĩ eleeti cĩgĩk, ẽẽla katĩ Nyekuci ĩnõõgõ katĩ ngĩ arittia dõõlĩ, ĩthõng itilingtia jurrung.