Nyaraga cĩ ẽẽn Codoi cĩ eheedi Paulo
Timoti
Ĩthaa Paulo Timoti
1
Keeni na Paulo tionniaita cĩ Kiristo Yesu,b cĩ balna ẽbẽrana aneeta Nyekuci Ellioiti cĩnac tĩrĩthẽnta cĩnnĩ, ĩthõng anyet ageeta Kiristo Yesu muwẽẽnĩt cĩ abũnna. 2 Keheedi na Nyaraga coo Timoti, doolec cannĩ kir lemintia. Anyĩk Nyekuc Baangiet kĩ Kiristo Yesu Makayyioit cĩnac kaanyci aniitia bũnnathĩt, kĩ tamati, kĩ ganõn.Tĩrĩthẽnĩt cĩ limanniok cĩk ẽẽn volongnyiak
3 Ma balna ngĩ kũwa na ĩcĩ Makedonia, kaduwaci balna aniitia ketheci ne, avvu nõõnõ õlõõ cĩ gaalawu ĩcĩ Ẽvẽthathĩ, kĩĩ katĩ bĩlĩ eet cĩk alimaneei eet thõõth cĩ athii cĩ ẽẽn dĩdĩ, 4 kõdẽ kũtũngtek iyiaintiok cĩk ẽẽn võlõng, kĩ thoothonniok cĩk meelĩk cĩk baajigi baajigi cĩgĩk wũk baa lõõla, cĩk anyi ĩnõõgõ kẽpẽkantõy kaganoko, ĩthõng athii cĩ anyi ĩnõõgõ kĩdĩmanit thõõth cĩ adiim Nyekuci, cĩ karũba gõõla cĩ kẽlẽmĩ thõõth cĩnnĩ dõ. 5 Thõõth kir cĩ kadiimnya naaga kilimanta eet kayait mĩnan cĩ aku thinnetinẽy ĩcĩk callĩk, ĩthõng kayait thinneti cĩk agawĩ thõõth cĩ abũnna kĩ cĩ gerthe, kĩ leminit dĩdĩ. 6 Ũtũngtek eeta gwuak thoothonniok cĩkkõ cĩk ẽẽn dĩdĩ wo, ĩthõng othoothitõ thoothonniok cĩk kaganoko. 7 Adiim nẽẽgẽ ma ngĩ ẽẽn limanniok cĩk Ngiranc cĩ Mutha, ĩthõng thĩ, athii cĩ aga thõõth cĩ õthõõth nẽẽgẽ wo, kõdẽ kĩ thõõth cĩ amuk nẽẽgẽ athĩ ne tiir õrrõt.
8 Kagga nẽnnẽ naaga kathĩ ne, abũnna Ngiranĩ, katĩ ngĩ õwõb eeti jurrung gõõla cĩ ẽẽn dĩdĩ. 9 Ĩthõng kagga naboo naaga kathĩ ne, athii cĩ engenyciay Ngiranĩ kĩĩ cĩ eet cĩk edeemi thoothonniok, engenyciay kĩĩ cĩ eet cĩk abũrĩ Ngiran, kĩ eet cĩk athii cĩ aga Nyekuc, kĩ eet cĩk adĩman gerthetin, ĩthõng kĩ eet cĩk athii cĩ callẽ thinneti cĩgĩk, kĩ eet cĩk amĩnan thoothonniok cĩk loocak, kĩ eet cĩk aruk baajigi, kĩ ngaagĩ, kĩ eet õõgĩ. 10 Engenyciay Ngiranĩ, nyatarka eet cĩk õvõyyĩ ngaay cĩk eetu, kõdẽ eet cĩk ĩngõr gõõnõgĩ cĩk maacĩk aar kĩĩ ngaay, kĩ eet cĩk õgõrõth eet aar kĩĩ nyakapanak õvvõ ũũtẽnẽ thõng, kĩ volongnyiak, kĩ eet wũk gõõ athii cĩ aduwa thõõth cĩ ẽẽn dĩdĩ lokika, kĩ eet õõgĩ buu cĩk ẽpẽkan liman cĩ ẽẽn dĩdĩ, 11 ijiowuay limanĩ neccie Nyemuta ĩcĩ Abũnnad cĩ abulie, ĩcĩ anya Nyekuci cĩ agatanni aneeta kũthũtĩ.
Bũnnathĩt cĩ Makayyiokto ĩcĩ Paulo
12 Kennei na Kiristo Yesu Makayyioit cĩnac wũ balna anya aneeta tiirthẽt ne, ibalallẽ, nyatarka acĩnna nẽ aneeta ngatĩ kathũnnẽ thõõth cĩ ẽbẽrania nẽ aneeta kĩdĩman tiic cĩnnĩ dĩdĩ. 13 Kõdẽ woyyia balna gõõ ngĩ kothoothi na thoothonniok cĩk gerthek cĩk kadaacẽ Nyekuc, kĩ cĩk kuukie lemnyiok cĩgĩnĩk õrrõt, kĩĩ kĩĩthĩ et cĩ lõrĩmĩnyawu, alna amannĩca nẽ aneeta noko, nyatarka balna ngaanĩ kẽlẽm na ĩnõõnõ, ĩthõng ngaanĩ kagga thõõth cĩ kadĩmani wo buu. 14 Anya balna aneeta Makayyioiti cĩnac bũnnathĩt cobbi õrrõt. Agatana balna nẽ aneeta lemintia kĩ mĩnana ĩcĩ Kiristo Yesu.
15 Thõõth cĩ kẽlẽmĩ dĩdĩ coo. Aku balna Kiristo Yesu looca ngato, kĩĩ katĩ kẽẽl gẽrẽthanniok, ĩthõng keeni balna na buu gẽrẽthannioit cĩ gerthe õrrõt kijiar vẽlẽk. 16 Ĩthõng thĩ kẽnnẽ, balna alna Nyekuci amannĩca aneeta gẽrẽthannioit cobbi cĩ kijiari õrrõt vẽlẽk wo noko, kĩĩ katĩ keyelek eet ngĩ õmõgĩ Kiristo Yesu thoothonniok vẽlẽk, ĩthõng ivitia elemit eeta ĩnõõnõ, kĩĩ katĩ woccia kĩĩ nẽ yelinit cĩ eet cĩk woccia ẽlẽmĩ ĩnõõnõ, ĩthõng ũrũbta nẽẽgẽ rũgẽt cĩ alna kũdũt. 17 Anycĩk niigia eet kĩdĩhĩthĩt, ĩthõng ubuluthit Nyekuc cĩnac erkinya kĩ erkinya. Ẽẽn nẽ Alaan cĩ alna kũdũt, cĩ athii cĩ edenyiay, ĩthõng athii cĩ adaaĩ. Amẽn.
Tiicanẽ cĩk Timoti
18 Niia Timoti logoo cannie wo, thoothonniok cĩk kadiimi ngĩ kaduwaci aniitia cĩkkõ. Nyĩ anyi kerekteei thoothonniowa wũk balna aduwa eeta wũk balna ẽẽn eet cĩk õthõõth molook cĩ Nyekuco balna kũnũũk, nyatarka aniitia. Thũũtĩ thoothonniok cĩkkõ, kĩĩ katĩ ticcan jore jurrung. 19 Thũũtĩ thẽk thõõth cĩ leminit cunni cĩ ayaha muwẽẽnĩtĩ cĩ thĩnĩn cunni, cĩ aga thõõth cĩ abũnna. Ĩthõng thĩ, aavutõ eeta gwuak cĩk ũtũbũrĩt thõõth coo, ĩthõng ithii leminti ĩcĩnĩng tõ. 20 Õõgĩ õõ Haĩmẽnauthĩ kĩ Alẽkthanda, kũlũnganẽhẽ na ĩnõõgõ Thĩttan,e kĩĩ katĩ kũtũngtek nẽẽgẽ thoothonniok cĩk adaacĩ Nyekuc.