Otongollie makayyiok cuguk
6
Ngĩ aavĩ nyakapanaiti cĩ ẽẽn lemnyioit, ongollie woccia nẽ makayyioit cĩnnĩ õrrõt kũdũt, kĩĩ katĩ kithii cĩ anyi nẽ thar cĩk Nyekucak kĩ liman cĩnnĩ kadaacẽ. 2 Ĩthõng mĩ ayakcu niigia nyakapanaĩ makayyiok cuguk cĩk ẽẽn lemnyiok, nyĩ amaacu makathĩt cĩnĩng, nyatarka ẽẽn nẽẽgẽ lemnyiok. Ĩthõng kẽnnẽ aticanothicu niigia buu ĩnõõgõ kijiar, nyatarka ẽẽn nẽẽgẽ buu lemnyiok, ĩthõng ĩmĩnanit ĩnõõgõ.Mĩnan cĩ nyarobinyawu
3 Ma ngĩ aliman eeti ĩmma thõõth cĩ ẽẽn võlõng, cĩ athii cĩ aduwõy kĩ liman cĩ ẽẽn dĩdĩ cĩ aku ĩcĩ Makayyioit cĩnac Yesu Kiristo kĩ liman cĩ kongolini Nyekuc, 4 ẽẽn nẽ et cĩ ẽngẽrẽnĩ ẽlẽ cĩnnĩ kaganoko. Ĩthõng athii cĩ abũnna ngatĩ adiim nẽ ngĩ ẽpẽkanõy kĩ eet, thõõtha ĩcĩ katĩ ayaha gẽrẽnyõn thoothonniowẽy ĩcĩk katĩ ayaha lĩlĩwõn, ngongowi kĩ thõõth cĩ õthõõthĩ gõõnõgĩ buth, ĩthõng ongollie nẽ ngatĩ woccia katĩ adĩmaneei eeti ĩmma ĩnõõnõ gerthetin, 5 ĩthõng ayaha pẽkan eetĩnẽy ĩcĩk ayak ooti cĩk gerthek cĩk athii cĩ agawĩ thõõth cĩ ẽẽn dĩdĩ. Ĩthõng amuk nẽẽgẽ athĩ ne, ma ngĩ ongollie nẽẽgẽ thõõth cĩ Nyekuco, amũda katĩ nyarobinya.
6 Ĩthõng thĩ, anyet ageeta thõõth cĩ Nyekuco kaballiõy õrrõt. 7 Nyatarka balna athii gimma cĩ kayaha naaga loota ngato, ĩthõng athii katĩ gimma cĩ kõvvõyyĩ naaga buu tõ katĩ ngĩ kadaaitõ. 8 Ĩthõng thĩ, mĩ nẽnnẽ kayak dainit kĩ ceremua, awũpannet thẽk kaala neekie ageeta. 9 Eeta cĩk adiim balinit, atdukothi tĩmanintia kĩ nyeritiewa cĩ thoothonniok cĩk meelĩk cĩk giithakthẽtĩnak, kĩ muwẽẽnĩt cĩ gerthe cĩ anyi ĩnõõgõ kĩĩtõ gẽrẽthanniok, ĩthõng utduktothĩk gẽrẽthaniniet cĩ athaan ĩnõõgõ. 10 Nyatarka mĩ kamĩnan nyarobinya, kavvu kadĩman thoothonniok vẽlẽk cĩk gerthek. Aavutõ eeta gwuak cĩk thẽk ummuit nyarobinya dõ, ĩthõng erektek thõõth cĩ leminit cĩ Nyekuco, ĩthõng anyĩk ĩnõõgõ kivitia kacanantẽ kĩ pĩrnanẽt cĩ awuci õrrõt kaganoko noko.
Uuktõy jora ĩcĩ abũnna cĩ leminto
11 Ĩthõng thĩ, niia Timoti, eeni niia et cĩ Nyekuco, nyĩ adĩmani thoothonniok cĩk gerthek cĩk õgõõn noko, tĩman õrrõt ngatĩ adĩmanẽ thõõth cĩ edeemothi, kĩ tongolinit cĩ Nyekuco, lẽm ĩnõõnõ, yak mĩnan, ĩthõng omogu thoothonniok, ĩthõng ĩthĩ thimattioit. 12 Uuktõy niia kĩ thõõth cĩ abũnna jora cĩ leminto, kĩĩ katĩ thũũtĩ rũgẽt cĩ alna kũdũt wũ balna avaani aniitia Nyekuci, kõrra wũ balna ẽyẽlanẽ niia leminit cunni cĩ abũnna cĩ thõõth cĩ Nyekuco eetĩnẽy cĩk meelĩk cĩk ẽẽn kẽbẽrẽ cĩk leminit cunni wo. 13 Kaduwaci na aniitia tiirion nguuma cĩ Nyekuc cĩ anyi kaal vẽlẽk kũrũgĩt, kĩ nguuma cĩ Kiristo Yesu cĩ balna ẽẽn keberec cĩ ẽyẽla thõõth cĩ Nyekuco nguuma cĩ Pontioth Pĩlatõ, 14 kenneci ne, thũũtĩ thõõth cĩ kaduwaci na wo, ĩthõng dĩman kaal cĩk edeemothi, gii ngĩ õdõlan kõr cĩ katĩ õbõdanĩ Makayyioiti cĩnac Yesu Kiristo, 15 cĩ katĩ ayaha Nyekuci kõrra cĩ katĩ ẽbẽra nẽnẽ. Abulie Nyekuci cĩ ẽẽn Makayyioit cĩ odoi, Alaan cobbi cĩ alaanetu, Makayyioit cobbi cĩ makayyiowu, 16 cĩ arũgĩ kũdũt, aavĩ nẽ lanyĩtatõ cĩ athii cĩ woccia õdõlan eeti ĩmma kĩĩ õjõõn. Ngaanĩ balna kĩcĩn eeti ĩmma ĩnõõnõ, ĩthõng athii katĩ eeti ĩmma cĩ acĩn ĩnõõnõ. Kĩdĩhĩthĩt Nyekuc, alna katĩ makathĩtĩ cĩnnẽ kũdũt. Amẽn!
17 Duwak niia balliok cĩk erkinya cĩkkõ wo tĩrĩthẽnta ĩcĩ tiiri ennek ne, athii woccia nẽẽgẽ cĩ ẽngẽrẽn, kõdẽ aari muwẽẽnĩt cĩnĩng cĩ abũnna balintia cĩ katĩ athii tamanoko. Ĩthõng thĩ, anyĩk niia ĩnõõgõ karyik muwẽẽnĩt cĩnĩng cĩ abũnna ĩcĩ Nyekuc cĩ anyet ageeta kaal vẽlẽk cĩk kẽbẽlbẽlĩ. 18 Duwak ĩnõõgõ kĩdĩmanit thoothonniok cĩk abũnna cĩk meelĩk, ĩthõng otholit balinit cĩnĩng kĩ eet õõgĩ. 19 Ĩthõng ẽẽn coo gõõl cĩ katĩ aarĩcẽ nẽẽgẽ balinit cĩnĩng, kĩĩ tiirthẽt cĩ õkõmĩ cĩ erkinya cĩk katĩ avvu, kĩĩ katĩ koccia kuthutti nẽẽgẽ rũgẽt cĩ ẽẽn dĩdĩ cĩ alna kũdũt.
20 Timoti, thũũtĩ niia thoothonniok wũk balna aduwacci Nyekuci, nyĩ athihi thoothonniok cĩk ẽẽn giithakthẽt, cĩk aduwõy kĩ gẽẽnyĩth cĩ athii cĩ ẽẽn dĩdĩ cĩ ayaha pẽkan cĩ athii cĩ iriowĩ kĩ thõõth cĩ ẽẽn dĩdĩ. 21 Aavutõ eeta gwuak cĩk balna ũtũngtek nẽẽgẽ ngatĩ ẽlẽmĩ thõõth cĩ Nyekuco, ngatĩ õwõbĩ thoothonniok cĩk aatĩ kĩ cĩkkõ.
Anycĩk Nyekuc kaanyung agiitia bũnnathĩt.