Kõr katĩ cĩ õbõdanĩ Makayyioiti
2
Ĩthõng thĩ, gõtõõnõga kĩ ngõõnõga, anycetu da ageeta kuduktiawung jurrung gõõl cĩ katĩ õbõdanĩ Makayyioiti cĩnac Yesu Kiristo, kĩ gõõl cĩ katĩ kaluttianĩ naaga kõõt kurumtõy kĩ ĩnõõnõ. Ĩthõng kalayyung naaga agiitia kenneccung ne, 2 nyĩ anyiccu eet õõgĩ kĩgoollung agiitia kentewung ne, amũda nẽẽgẽ thõõth ĩmma Nyekuca, kõdẽ nyaragawa ĩcĩnang cĩ athĩ ne, ikiyyia kõr cĩ Makayyioktoa vẽlẽk. 3 Nyĩ anyiccu et ĩmma kĩgoolung kũdũt, nyatarka athii katĩ cĩ aku kõr neccie ngaanĩ kedenyiay jore. Ĩthõng naboo athii cĩ aku kõr neccie ngaanĩ kedenyiay eeti cĩ abũrĩ thõõth cĩ Nyekuco, ĩthõng uuk thĩ katĩ Nyekuci et nĩcẽ kadaak. 4 Ẽngẽrẽn katĩ eeti neccie cĩ abũrĩ Nyekuc kĩ kaal vẽlẽk cĩk ala eeta. Ĩthõng aavĩ thĩ katĩ nẽ, buu Ciitha cĩ Nyekuco, ĩthõng athĩ ẽlẽ cĩnnĩ ne, ẽẽn nẽ Nyekuc.5 Athii niigia cĩ ahadanu thõõth cĩ et coo, wũ balna kaduwacung na agiitia balna nga karũmẽ kõdõwẽ ẽẽ? 6 Ĩthõng thĩ, yoko agayyu niigia gii cĩ alaam et cĩ abũrĩ thõõth cĩ Nyekuco wo, kĩĩ katĩ woccia kedenyiay nẽ itina ĩcĩnnĩ ĩcĩ akuni. 7 Nyatarka iticanõy tiirthẽtĩ cĩ alugunyi cĩ et cĩ abũrĩ thõõth cĩ Nyekuco vẽlẽk looca, ĩthõng yoko aavĩ eeti codoi doo cĩ abĩlnĩ tiirthẽt nĩcẽ, ĩthõng thĩ, arki katĩ nẽ abĩlnĩ ĩnõõnõ noko, gii ngĩ ẽnyẽhẽ eeti cĩ abĩlnĩ tiirthẽt nĩcẽ ẽẽ. 8 Ĩthõng mĩ edenyiay eeti cĩ abũrĩ thõõth cĩ Nyekuco wo, aruk katĩ Makayyioiti Yesu ĩnõõnõ tivongia ĩcĩnnĩ, kĩ bulẽnta katĩ ngĩ õbõda nẽnẽ.
9 Aku katĩ eeti cĩ abũrĩ thõõth cĩ Nyekuco wo, nyatarka adĩman Thĩttanĩb thoothonniok cĩk anaat eeta kĩ yelintiok cĩk ẽẽn võlõng. 10 Ĩthõng goolliowẽy vẽlẽk aku katĩ ĩgõõl nẽ eet cĩk ithiicõ. Ĩthõng uuk katĩ Nyekuci ĩnõõgõ, nyatarka balna abũrĩ nẽẽgẽ ngatĩ amĩnanĩ thõõth cĩ ẽẽn dĩdĩ, cĩ woccia ẽẽl ĩnõõgõ. 11 Nyatarka thõõth coo, itionai Nyekuci ĩnõõgõ võlõng cĩ tiiri, kĩĩ katĩ kelemit nẽẽgẽ võlõng. 12 Uuk katĩ Nyekuci ĩnõõgõ vẽlẽk, nyatarka athii nẽẽgẽ cĩ ẽlẽmĩ thõõth cĩ ẽẽn dĩdĩ, ĩthõng ebelbelliek nẽẽgẽ ngatĩ adĩmanĩ kaal cĩk gerthek.
Ĩbĩlĩt okomit
13 Ĩthõng thĩ, kennecca woccia naaga Nyekuc dõõkĩthĩ ne, ibalallẽ, nyatarka agiitia gõtõõnõga kĩ ngõõnõga, nyatarka amĩnannung Makayyioiti agiitia, ĩthõng ẽbẽrawung balna Nyekuci agiitia ĩcĩ owu baa ngaanĩ kẽtẽngẽnya nẽ looc, kĩĩ katĩ eliay niigia, nyatarka anyung Ririwacĩ cĩ Dĩhĩmĩc agiitia ĩĩtõ callẽ, kĩ ngatĩ elemu thõõth cĩ ẽẽn dĩdĩ. 14 Avaanung nẽ agiitia Nyemuta cĩ Abũnna cĩ kirionna naaga wo, kĩĩ woccia katĩ otholit bulẽnĩt cĩ Makayyioit cĩnac Yesu Kiristo. 15 Ĩthõng thĩ, gõtõõnõga kĩ ngõõnõga, ĩnõõnõ thĩ cĩ kathĩ na ne, ĩbĩlĩt okomit, ĩthõng uthuutti jurrung thoothonniok wũk balna kalimaneccung naaga, kõdẽ kaduwaccung kũtũga, kõdẽ kẽhẽdaccung nyaragawa.
16 Anycĩk woccia niigia Makayyioit cĩnac Yesu Kiristo kĩ Nyekuc Baangiet cĩnac wũ balna amĩnannet ageeta bũnnathĩta ĩcĩnnĩ, ĩthõng anyet dĩhĩthẽnĩt cĩ alna kũdũt kĩ muwẽẽnĩt cĩ abũnna õrrõt, 17 etheryung nẽ agiitia kokomit thinneti, ĩthõng anyung tiirthẽt cĩ ellung dõõkĩthĩ ĩdĩmanit thoothonniok cĩk abũnna, ĩthõng othoothit thoothonniok cĩk ẽẽn dĩdĩ.