2 Thẽthalonika 1

Nyaraga cĩ ẽẽn Ramma cĩ eheedi Paulo

Lemnyiok cĩk Kelethia cĩ Thẽthalonika

Thawinet cĩ Paulo

Aneeta Paulo, kĩ Thĩlath kĩ Timoti cĩk kẽhẽdaccung Nyaraga coo wo, kẽhẽdaccung agiitia lemnyiok cĩk kelethia cĩ kõrõõk cĩ gaalawu cĩ Thẽthalonika, cĩk eeginnu eet cĩk Nyekuc Baangiet cĩnac kĩ Makayyioit Yesu Kiristo.

2 Anycĩk niigia bũnnathĩt kĩ ganõn cĩ Nyekuc Baangiet cĩnac kĩ Makayyioit Yesu Kiristo, kaavu ĩcunung.

Katĩ ngĩ õbõda Yesu

3 Gõtõõnõga kĩ ngõõnõga, kedemĩca naaga dõõkĩthĩ ngatĩ kennecia Nyekuc ne, ibalallẽ, nyatarka agiitia. Nyatarka alĩthĩ dõõkĩthĩ õrrõt leminiti cĩ eyehecu niigia Nyekuc kĩ mĩnan cĩ amĩnanonu nyaguana. 4 Ĩnõõnõ thĩ cĩ kirianung naaga agiitia kĩ eet cĩk kelethiawak cĩk Nyekucak loociok vẽlẽk. Kaduwacca naaga ĩnõõgõ gõõl cĩ omogu niigia pĩrnanẽt kĩ gõõl cĩ alnanu niigia elemu Nyekuc, kõdẽ woyyia ayakcu canan kĩ tĩmaninit vẽlẽk.

5 Ẽẽn coo vẽlẽk thõõth cĩ ẽyẽla athĩ ne, ẽdẽẽm Nyekuci ngĩ ẽtẽd thõõth cunung, ĩthõng ĩdĩmanewung nẽ agiitia ngatĩ ulonu ngĩ othollu kĩ Nyekuc alaanthẽt cĩnnĩ, nyatarka canan cĩ pĩrnanẽt cĩ apĩrnanu niigia yoko wo. 6 Edeemothi katĩ thõõth cĩ Nyekuco cĩ katĩ uuki nẽ eet cĩk anyung ipiryia yoko wo, 7 ĩthõng thĩ, õõganung katĩ nẽ agiitia hecintia cunung. Ĩthõng õõganet katĩ ageeta buu katĩ ngĩ iliba Makayyioiti Yesu tammuatiddina, iriowa kĩ anjĩlẽt cĩgĩnĩk cĩk tiirtik, 8 cĩk ayak guo cĩ alanyĩtĩ. Uuk katĩ Makayyioiti cĩnac Yesu eet cĩk athii cĩ aga Nyekuc, ĩthõng athii cĩ athĩrar Nyemut cĩnnĩ cĩ Abũnna. 9 Uuki katĩ nẽẽgẽ vẽlẽk gerthetina ĩcĩ alna kũdũt, ĩthõng katĩ ũnyũktothĩk nẽẽgẽ ngatĩvõrĩ kĩĩtõ rẽẽntĩ ĩcĩ Makayyiokto, athii katĩ nẽẽgẽ cĩ acĩn ĩnõõnõ kĩ bulẽnĩt kĩ tiirthẽt cĩnnĩ. 10 Ma kõrra cĩ katĩ õbõdanĩ Yesu, abuluth katĩ eeta cĩgĩnnẽk cĩk callĩk ĩnõõnõ, ĩthõng ĩdĩhĩthĩt lemnyiowa ĩnõõnõ. Attiyyu katĩ niigia buu tõ kõr nĩcẽ, nyatarka elemtu niigia thõõth cĩnnĩ wũ balna kaduwaccung naaga.

11 Ma ngĩ kamukca naaga thoothonniok cĩkkõ, kalawinung naaga agiitia dõõkĩthĩ kathĩnna ne, anycĩk niigia Nyekuc cĩnang koccia keelung agiitia ẽtẽmantõy kĩ rũgẽt cĩ avvuyyung nẽ agiitia abaaktĩ yoko wo, uthuutti thõõth cĩnnĩ avuthita cĩ attiyyu. Anycĩk ĩnõõnõ koccia kaanyung tiirthẽt edecia kaal cĩk abũnna, cĩk adiimnyu niigia cĩk avvu lemintia ĩcunung. 12 Kalawina naaga kathĩnna ne, anycĩk thar cĩk Makayyioit cĩnang Yesu woccia kubullie ĩcunung, ĩthõng ubuluthiewu niigia buu ĩcĩnnĩ, nyatarka bũnnathĩt cĩ Nyekuc cĩnac, kĩ cĩ Makayyioit Yesu Kiristo.