Alayyioetu ageeta
3
Ĩthõng thõõtha cĩ aturna, gõtõõnõga kĩ ngõõnõga, alayyioetu ageeta, kĩĩ katĩ kathanothĩk thõõth cĩ Nyekuco looc vẽlẽk tamanoko kĩĩ katĩ kotongollie eeta thõõth cĩnnĩ, kaavu kĩ balna ngĩ ongolinu niigia buu wo. 2 Alayyioetu ageeta, kĩĩ katĩ kuthuttiet Nyekuci eetĩnẽy ĩcĩk gerthek ĩcĩk athii cĩ athĩrar thõõth cĩ Nyekuco kĩ eet cĩk ẽẽn gẽrẽthanniok, nyatarka athii eeta vẽlẽk cĩ ayak leminit ĩcĩ Nyekuco. 3 Ĩthõng thĩ, athũnnĩ Makayyioiti thõõth cĩnnĩ, ĩthõng katĩ anyĩk nẽ thinneti cuguk kokomit, ĩthõng uthuutung agiitia kithii cĩ arumonu kĩ Thĩttan. 4 Kayakta naaga leminit ĩcĩ Makayyiokto, thõõtha ĩcĩ athunnu niigia thoothonniok wũk balna kalimaneccung naaga agiitia, ĩthõng katĩ alna athunnu noko. 5 Anycĩk woccia niigia Makayyioit keyelek thinneti cuguk kayait mĩnan cĩ Nyekuco, ĩthõng anyung Kiristo agiitia omogit thoothonniok.Egerenyek Paulo nyamuttiok
6 Ĩthõng yoko niigia gõtõõnõga kĩ ngõõnõga, kaduwaccung naaga agiitia dĩdĩ thaarĩy cĩk Makayyioit cĩnac Yesu Kiristo ketheccung ne, nyĩ iriokcu kĩ lemnyiok cĩk ẽẽn nyamuttiok, cĩk abũrĩ liman wũ balna kalimaneccung naaga agiitia. 7 Nyatarka agayyu niigia jurrung ngatĩ woccia owobu thoothonniok wũk balna kadĩmanna naaga. Athii balna cĩ keeginna naaga nyamuttiok balna ngaanĩ karũmẽ kĩ agiitia, 8 kõdẽ ngaanĩ kuduktowa athĩnẽy ĩcĩk eet õõgĩ kaganoko, ĩnõõnõ thĩ balna cĩ katicaninia naaga waathĩna kĩ baalina õrrõt, kĩĩ katĩ athii cĩ kẽhẽca et ĩmma kõrgẽna cunung. 9 Kedemĩca woccia naaga ngatĩ kajinnung agiitia elliettu ageeta, ĩthõng thĩ kẽnnẽ, katicaninia naaga balna kĩĩ kĩrĩcantaha eleeti cĩgaak, kĩĩ katĩ kiittia naaga yelinit cĩ owobju niigia. 10 Balna nga karũmẽ naaga kĩ agiitia, kaduwaccung balna naaga agiitia tĩrĩthẽnĩt coo ketheccung ne, “Mĩ athii cĩ aticanni eeti, athii thẽk nẽ cĩ aduwẽẽnĩ.”
11 Kõthõõththa naaga ketee, nyatarka kathĩkna naaga ngĩ athĩ ne, aatĩ eeta gwuak kõrgẽna cunung cĩk ẽngẽrẽn kaganoko, ĩthõng athii cĩ aticanothi eleeti cĩgĩk, ĩthõng iithio tiic kĩ rũgẽt cĩ goonikni taktak. 12 Ĩthõng thĩ, katĩrĩththa naaga eet nĩĩkẽ õrrõt, ĩthõng kĩlallieha ĩnõõgõ thaarĩy cĩk Makayyioit cĩnac Yesu Kiristo, ngatĩ adiim thẽk nẽẽgẽ ngĩ aatĩ loota, ĩthõng iticanta dainit cĩnĩng, kĩĩ katĩ kũrũgĩt nẽẽgẽ. 13 Gõtõõnõga kĩ ngõõnõga, nyĩ abilnu ngatĩ adĩmannu thoothonniok cĩk abũnna.
14 Ma ngĩ abũrĩ eeti ĩmma thõõth cĩ kẽhẽẽdana naaga nyaragawa ĩcoo wo, ĩrĩcanta thõõth cĩnnĩ jurrung, nyĩ adĩmanecu ĩnõõnõ gii ĩmma, kĩĩ koccia kangawan nẽ dõ. 15 Nyĩ amukcu niigia ĩnõõnõ kĩthĩ miroit cunung, ĩthõng thĩ, ĩtĩrĩthĩt woccia niigia ĩnõõnõ kĩ ngĩ ẽẽn lemnyioit.
Thõõth cĩ Paulo cĩ aturna
16 Kalayyie na kathĩ ne, anycĩk woccia niigia Makayyioit cĩ ganono kaanyung agiitia ganõn wathinniok vẽlẽk kĩ goolliok vẽlẽk. Anycĩk Makayyioit kaavu kĩ agiitia vẽlẽk.
17 Ĩthõng thĩ, yoko kẽhẽẽda na Paulo thawinet coo attia cannĩ, cĩ eyeliay nyaragẽtẽy vẽlẽk, kĩĩ katĩ agaac ma ngĩ ẽẽn coo nyaraga cannĩ dĩdĩ.
18 Anycĩk niigia bũnnathĩt cĩ Makayyioit cĩnac Yesu Kiristo kaavu kĩ agiitia vẽlẽk.