Rũma 1

Nyaraga cĩ eheedi Paulo

Lemnyiok cĩk Kelethia cĩ Rũma

Thawinet cĩ Paulo

Aneeta Paulo cĩ keeni ticciannioit cĩ Yesu Kiristo. Ẽbẽrana balna Nyekuci aneeta kĩthĩ tionniait, ĩthõng anya tiic cĩ kirionẽ Nyemut cĩ Abũnna cĩ Nyekuco. 2 Nyemut cĩ Abũnna wũ balna aduwa Nyekuci baa lõõla thoothiowẽy wũk balna aduwa eeta cĩk õthõõth molook cĩ Nyekuco Nyaragawa ĩcĩ Nyekuco athĩ ne, 3 õthõõth Nyemut cĩ Abũnna coo, thõõth cĩ Ngẽrĩnĩ cĩnnĩ wũ balna aku arittiay kĩĩ et kĩ naaga, tatũga cĩ alaan Davide, 4 ĩthõng balna ẽyẽla Ririwacĩ cĩ Dĩhĩmĩ tiirthẽta cĩnnĩ, ngatĩ ẽnnẽ Ngẽrtĩ Nyekuco Yesu Kiristo Makayyioit cĩnac, nyatarka balna arũgũtha Nyekuci ĩnõõnõ daaĩtha. 5 Nyatarka ĩnõõnõ, kivitia kũrũbta naaga bũnnathĩt kĩ ngatĩ keeginnie tionniak cĩgĩnĩk, kĩĩ katĩ kutuvuyyia eet vẽlẽk cĩk athii cĩ ẽẽn Yudei, kivitia kĩthĩraritõ thõõth cĩ aku lemintia thaarĩy ĩcĩgĩnĩk. 6 Attiyyu niigia buu kõrgẽna cĩ eet cĩk avvũ balna Yesu Kiristo kĩĩtõ cĩgĩnĩk wo.

7 Kẽhẽdacung na agiitia vẽlẽk lemnyiok cĩk Rũma Nyaraga coo. Amĩnannung Nyekuci agiitia, ĩthõng ẽbẽrawung ĩĩtõ eet cĩgĩnĩk cĩk dĩhĩmĩk.

Anycĩk bũnnathĩt kĩ ganõn cĩ aku ĩcĩ Nyekuc Baangiet cĩnac kĩ Makayyioit cĩnac Yesu Kiristo, kaavu ĩcunung.

Abarritek Paulo gõõl cĩ õkõyyĩ Rũmatẽy

8 Nõõnõ ĩcĩ owu kennei na Nyekuc ne, ibalallẽ thaarĩy cĩk Yesu Kiristo, nyatarka agiitia vẽlẽk. Kadĩmani na ketee, nyatarka ẽkẽb eeta loociowẽy vẽlẽk leminit cunung. 9 Ẽẽn Nyekuci cĩ katicanothi na thĩnĩna cannĩ vẽlẽk, cĩ kirionĩcẽ eet Nyemut cĩ Abũnna cĩ Ngẽrĩnĩ wo, ẽẽn nẽ keberec cannĩ cĩ aga gõõl cĩ kahadanung na agiit dõõkĩthĩ 10 lawintia cannĩ itinnya vẽlẽk, ĩthõng kalayyie yoko kathĩ ne, dimẽnta cĩ Nyekuco, oowĩca koccia nẽ aneeta gõõl cĩ kakunie kacinnung agiitia.

11 Kabarriteei na ngatĩ kakunie kacinnung agiitia, kĩĩ katĩ kivitia kotholit gatan codoi doo wũ balna anya aneeta Ririwacĩ cĩ Nyekuco, kĩĩ katĩ umuddia niigia tiirthẽt lemintia cunung. 12 Thõõth cĩ kaduwa na wo, kathĩ na ne, ketheryioy nyaguana lemintia. 13 Gõtõõnõga kĩ ngõõnõga, athii cĩ kadiimnyung na agiitia kĩlĩtawung ngatĩ kamui balna na itinnya cĩk meelĩk kikiyyia kicinung agiitia, ĩthõng thĩ, kẽnnẽ kalaamothĩha kĩĩ itin coo, kĩĩ katĩ kalaba eet kõrgẽna cunung kelemit Nyekuc, kĩ balna ngĩ kadĩmani eetĩnẽy cĩk athii cĩ ẽẽn Yudei.

14 Kayai na tiic cĩ katicanothĩcẽ eet cĩk Girihi kĩ cĩk athii cĩ ẽẽn Girik, kĩ cĩk ẽgẽẽnyĩ, kĩ cĩk athii cĩ ẽgẽẽnyĩ buu. 15 Ĩnõõnõ thĩ cĩ kabarritẽcẽ na ngatĩ kirionicung agiit Nyemut cĩ Abũnna buu eet cĩk attiyyu Rũmatẽy wo.

Tiirthẽt cĩ Nyemut cĩ Abũnna

16 Athii cĩ kangawani na ngatĩ kirionẽ Nyemut cĩ Abũnna, nyatarka ẽẽn nẽ tiirthẽt cĩ Nyekuco cĩ ẽẽla eet vẽlẽk cĩk ẽẽn lemnyiok cĩk Yudei nõõnõ ĩcĩ owu, ĩthõng thĩ, ĩthĩ eet cĩk athii cĩ ẽẽn Yudei vurtia. 17 Aduwa Nyemut cĩ Abũnna wo, gõõl cĩ anyi Nyekuci eet kũbũnta, nyatarka ẽlẽmĩ nẽẽgẽ ĩnõõnõ. Kĩcĩ aduwa Nyaraga cĩ Nyekuco athĩ ne, “Arũgĩ katĩ eeti cĩ abũnna, nyatarka ẽlẽmĩ Nyekuci leminit cĩnnĩ.”

Ẽẽn eeta vẽlẽk gẽrẽthanniok

18 Ẽyẽla Nyekuci varac cĩnnĩ tammuatiddina, cĩ eyeheei nẽ eet vẽlẽk cĩk ẽẽn gẽrẽthanniok, cĩk ammũt thõõth cĩ ẽẽn dĩdĩ gerthetina cĩnĩng, 19 nyatarka aga nẽẽgẽ thõõth cĩ Nyekuco jurrung, balna ngĩ eyelek Nyekuci ĩnõõgõ thõõth cĩnnĩ. 20 Balna thẽk tengenyintia cĩ loocu, ivitia edenyciay thoothiowa cĩk Nyekucak jurrung wũ gõõ athii cĩ edenyiay, tiirthẽta cĩnnĩ ĩcĩ alna kũdũt, kĩ kaal vẽlẽk cĩk anyi ĩnõõnõ kĩĩ Nyekuc, ĩthõng ivitia agayyie kaala cĩk Nyekucak wo, kaalĩy ĩcĩk balna ẽngẽnyca nẽ, kĩĩ katĩ athii eeta cĩ athĩ ne, athii cĩ aga nẽẽgẽ Nyekuc.

21 Kõdẽ woyyia baalia ngĩ aga nẽẽgẽ Nyekuc, athii balna cĩ abuluth nẽẽgẽ ĩnõõnõ kaavu kĩ Nyekuci dĩdĩ, kõdẽ kentek ĩnõõnõ ne, ibalallẽ, ĩthõng thĩ, ikiyyia ẽgẽrẽthanẽ muwẽẽnĩtĩ cĩnĩng, ĩthõng igiiththie thinneti cĩgĩk ĩĩ ollie cuc. 22 Kõdẽ woyyia balna ngĩ athĩ nẽẽgẽ ne, ẽgẽẽnyĩ, ivitia ĩĩtõ nẽẽgẽ giithiak, 23 ĩthõng ũtũngtek ngatĩ alawĩ Nyekuc cĩ abulie cĩ alna kũdũt, ĩthõng alaacõ ririwanĩnẽ cĩk engenyciay kaavutõ kĩ eeta, kĩ kĩballĩ kĩ kẽlẽgẽ cĩk bõõnak kĩ kẽlẽgẽ cĩk õgõlõt loota cĩk adaaĩ.

24 Ĩthõng thĩna, thẽk ikiyyia ũtũngek Nyekuci ĩnõõgõ kabarrittiek ngatĩ adĩmanĩ nẽẽgẽ thoothonniok cĩk anyĩcẽ nẽẽgẽ eleeti cĩgĩk ngawani nyaguana mĩn, thõõtha ĩcĩ adĩmanĩ thoothiok cĩk ẽẽn riiriny eletinẽy ĩcĩgĩk cĩk oginnie eeta kĩ ngaay taktak. 25 Ivitia ũtũwẽcõ nẽẽgẽ thõõth cĩ Nyekuco cĩ ẽẽn dĩdĩ, ĩthõng iticantõõĩ thõõth cĩ ẽẽn võlõng, ala nẽẽgẽ kĩĩ kiticantothĩk kaal cĩk ẽngẽnyca Nyekuci, ĩthõng ũtũbũrĩt ngatĩ alawĩ Nyekuc Tengenyioit cĩ adĩhĩth eeta kũdũt. Amẽn.

26 Nyatarka thoothonniok cĩkkõ, ikiyyia ũtũngek Nyekuci ĩnõõgõ, kidiimitõ thoothonniok cĩk ẽẽn riiriny, kõdẽ woyyia ngaay cĩgĩk buu, ivitia ũtũngtek maacua cĩgĩk, ĩthõng ataguuthõ kĩ gõõnõgĩ cĩk ngayyik. 27 Ĩthõng gõõla codoi dõ noko, ivitia ũtũbũrĩt eeta cĩk maacĩk buu ngaay cĩgĩk, ĩthõng ataguuthõ kĩ gõõnõgĩ cĩk maacĩk. Ivitia aritõ nẽẽgẽ gõõnõgĩ kĩĩtõ ngaay cĩgĩk, ĩnõõnõ thĩ, cĩ uuki Nyekuci ĩnõõgõ, nyatarka gerthetin cĩnĩng wo.

28 Ĩthõng thĩ, thẽk kĩcĩ amuk nẽẽgẽ a ne, ẽẽn thõõth cĩ Nyekuco giithakthẽt, ikiyyia ũtũngẽẽĩ Nyekuci ĩnõõgõ muwẽẽnĩt cĩ gerthe, kĩĩ katĩ kĩdĩmanit nẽẽgẽ thoothonniok cĩk athii woccia cĩ adĩmanni. 29 Ivitia ẽgẽrẽthantõy nẽẽgẽ goolliowẽy cĩk meelĩk, ĩthõng ĩĩtõ eet cĩk gerthek, cĩk ngarubik, ĩthõng ĩdĩmantek gõõnõgĩ thoothonniok cĩk gerthek. Ehethini kaal cĩk eetu, aruk eeta, ẽpẽkanõy kĩ gõõnõgĩ, ĩgõõl eet, ĩthõng ummuit ngatĩ adĩmanĩ thoothonniok cĩk gerthek. Aaburi ngatĩ ẽtẽẽdĩ gõõnõgĩ, 30 õthõõth gõõnõgĩ buth, aaburneei Nyekuc, ẽngẽrẽnĩ, ĩthõng irianit õrrõt, ĩthõng ummuit goolliok cĩk jõr cĩk adĩmanĩ thoothonniok cĩk gerthek. Athii cĩ athĩrar baajigi kĩ ngaagĩ. 31 Ẽẽn nẽẽgẽ eet cĩk kothii muwẽẽnĩt, athii cĩ athũnnĩ thõõth cĩ aduwa nẽẽgẽ, athii cĩ ayak mĩnan, ĩthõng athii cĩ amanni et ĩmma. 32 Kõdẽ woyyia ngĩ aga nẽẽgẽ thõõth cĩ abũnna cĩ aduwa Nyekuci athĩ ne, eeta cĩk atican thoothonniok cĩk aatĩ noko, adaaĩ woccia thõng, alna kẽnnẽ atican thoothonniok cĩk õgõõn noko, ĩthõng elemit gõõnõgĩ kiticanit thoothonniok cĩk gerthek cĩkkõ.