Tẽgẽl 148
1 Ĩdĩhĩthĩt niigia Makayyioit.
Ĩdĩhĩthĩt Makayyioit tammuatiddina,
ĩdĩhĩthĩt niigia ĩnõõnõ diithiowẽy tiddina.
2 Ĩdĩhĩthĩt niigia ĩnõõnõ, anjĩlẽta cĩgĩnnẽk vẽlẽk!
Ĩdĩhĩthĩt ĩnõõnõ, nyĩcẽkẽrĩ cĩk tammutiddino!
3 Dĩhĩth ĩnõõnõ, niia kõr kĩ nyĩĩlok,
ĩdĩhĩthĩt ĩnõõnõ, niigia vẽlẽk mũnyũnya cĩk alanyĩt wo.
4 Niia tammutiddin, dĩhĩth ĩnõõnõ, ĩthõng niigia maama
cĩk ivonei diithiowa tiddina wo, ĩdĩhĩthĩt ĩnõõnõ.
5 Anycĩk kaal vẽlẽk kĩdĩhĩthĩt thar cĩkMakayyioktak,
nyatarka balna engenyciay nẽẽgẽ tĩrĩthẽnta ĩcĩnnĩ.
6 Adĩmana balna nẽ ĩnõõgõ kaavutõ kũdũt ngatĩnĩng,
ĩthõng anyi balna nẽ thõõth cĩnnĩ kithii cĩ enyekci kũdũt.
7 Ĩdĩhĩthĩt niigia Makayyioit loota,
niigia kẽlẽgẽ cĩk attiyyu bũlũca ĩcĩtõõnĩ wo,
8 badi cĩ tammuo kĩ mũllẽn, lorudo kĩ diithua,
ngootiok cĩk obbitik cĩk athĩrar nẽẽgẽ vẽlẽk ĩnõõnõ,
9 niigia thiiryiowa kĩ bĩĩyẽn vẽlẽk,
kẽẽn cĩk nyegeruanu kĩ kẽẽn cĩk cũlaĩk itinnya vẽlẽk,
10 kẽlẽgẽ cĩk bõõnak kĩ kẽlẽgẽ cĩk olu,
kẽlẽgẽ cĩk kĩdĩk kĩ kĩballĩ cĩk akuli,
11 alaanẽt cĩk loocu kĩ eet vẽlẽk cĩk loociowu,
eet cĩk agam looc kĩ eet cĩk ẽtẽd thoothonniok cĩk loocu,
12 eet cĩk maacĩk cĩk ẽẽn ngĩthõrõk kĩ ngaay cĩk ẽẽn ngĩthõrõk,
eet cĩk nyaatĩk cĩk maacĩk kĩ dõõlĩ.
13 Anycĩk ĩnõõgõ vẽlẽk kĩdĩhĩthĩt thar cĩk Makayyioktak,
nyatarka makatẽ thara cĩgĩnnẽk,
ivonei bulẽnĩtĩ cĩnnẽ tammutiddin
kĩ looc vẽlẽk looc.
14 Aanyĩk balna nẽ eet cĩgĩnĩk kĩĩtõ tiirti,
aanyĩk nẽ eet cĩgĩnĩk cĩk callĩk
kagaacõ ngatĩ woccia adĩhĩthĩ nẽẽgẽ ĩnõõnõ,
eeta cĩk Ĩthraĩlĩ cĩk aatĩ joonui thĩnĩna ĩcĩnnĩ.
Ĩdĩhĩthĩt niigia vẽlẽk Makayyioit.