Tẽgẽl 145
Ẽẽn tẽgẽl cĩ Davide coo, cĩ kadĩhĩthĩ Nyekuc.
1 Kabuluththi katĩ na aniitia Nyekuc cannĩ, Alaan cannĩ.
Kadihithi katĩ na thar cugunik kũdũt.
2 Kadihiththi katĩ na aniitia dõõkĩthĩ,
ĩthõng kubulutha thar cugunik kũdũt.
3 Maka Makayyioiti, ũũlĩ woccia thẽk nẽ
ngĩ adĩhĩthĩ õrrõt kũdũt.
Athii woccia eeti cĩ aga ngĩ
ẽẽn makathĩtĩ cĩnnẽ kuu.
4 Adĩhĩthei katĩ eeta yoko tiicanẽ cugunik
eet cĩk ngaanĩ kittiryiay,
ẽkẽb katĩ nẽẽgẽ tiicanẽ cugunik cĩk ijiar vẽlẽk.
5 Aduwa katĩ nẽẽgẽ bulẽnĩt cunni kĩ makathĩt cunni,
ĩthõng katĩ kumuwa na tiicanẽ cugunik cĩk abulie.
6 Ẽkẽb katĩ eeta tiicanẽ cugunik cĩk anatti,
ĩthõng katĩ kuduwa na tiiciok cugunik cĩk obbitik.
7 Ẽbẽlbẽl katĩ nẽẽgẽ, nyatarka bũnnathĩt cunni cobbi õrrõt,
ĩthõng ebelit thõõth cunni cĩ mũrrĩ talintia.
8 Ẽẽn Makayyioiti thimattioit kĩ tamatioit,
cĩ athii cĩ avaracĩth tamanoko,
ĩthõng maka mĩnanĩ cĩnnẽ.
9 Abũnna Makayyioiti kĩ eet vẽlẽk,
amanni kaal vẽlẽk cĩk ẽngẽnyca balna nẽ.
10 Makayyioit, adihiththi katĩ kaala cĩk balna ẽngẽnyca niia vẽlẽk aniitia,
adihiththi katĩ eeta cugunniek cĩk callĩk aniitia.
11 Õthõõth katĩ nẽẽgẽ bulẽnĩt cĩ alaanthẽt cunni,
ĩthõng uduktia tiirthẽt cunni,
12 kĩĩ katĩ kagaacõ woccia eeta vẽlẽk
tiicanẽ cugunik cĩk abulie,
kĩ bulẽnĩt cobbi cĩ alaanthẽt cunni.
13 Alna alaanthẽtĩ cunnie kũdũt,
ĩthõng agami niia looc erkinya kĩ erkinya.
Athũnnĩ Makayyioiti thoothonniok cĩgĩnĩk vẽlẽk,
ĩthõng ĩmĩnan kaal vẽlẽk cĩk balna ẽngẽnyca nẽnẽ.
14 Ẽẽl Makayyioiti eet vẽlẽk cĩk uuk looc,
ĩthõng õdõng eet cĩk apĩrna.
15 Acinni eeta vẽlẽk aniitia kẽbẽrẽnĩy ĩcĩgĩk,
ĩthõng anyiwu niia ĩnõõgõ dainit katĩ ngĩ adiim nẽẽgẽ.
16 Õõ niia athĩn cugunik, ĩthõng anyiwu kaal vẽlẽk
cĩk arũgĩ gii cĩ adiim nẽẽgẽ.
17 Abũnna Makayyioiti goolliowẽy cĩgĩnĩk vẽlẽk,
ĩthõng ĩmĩnan kaal vẽlẽk cĩk balna ẽngẽnyca nẽnẽ.
18 Obokci Makayyioiti kĩ eet vẽlẽk cĩk ala ĩnõõnõ,
eet cĩk ala ĩnõõnõ dĩdĩ thinnetinẽy cĩgĩk.
19 Anyi nẽ eet cĩk ongollie ĩnõõnõ, kaal cĩk adiim nẽẽgẽ.
Athĩrar nẽ ulua cĩnĩng, ĩthõng ẽẽla ĩnõõgõ.
20 Ẽbẽk Makayyioiti eet vẽlẽk cĩk amĩnan ĩnõõnõ,
ĩthõng thĩ, kẽnnẽ aruk katĩ nẽ eet cĩk gerthek.
21 Kadihithi katĩ na Makayyioit,
Anyi nẽ kaal cĩk balna ẽngẽnyca nẽ,
kĩdĩhĩthĩt thar cĩgĩnĩk cĩk dĩhĩmĩk kũdũt.