Tẽgẽl 143
Tẽgẽl cĩ Davide.
1 Makayyioit, thĩha niia kĩcĩ kalayyie wo,
thĩk niia ulua cannĩ cĩ tamatintio, nyatarka
thõõth cĩ athũnnẽ, kĩ thõõth cunni cĩ edeemothi
ijjia ẽẽla aneeta.
2 Nyĩ eteedi niia ticciannioit cunni thõõth,
nyatarka athii eeti ĩmma cĩ arũgĩ
cĩ abũnna nguuma ĩcunni tõõ.
3 Ingkayya miroiti cannie aneeta,
orroceca nẽ aneeta looc,
anya nẽ aneeta kabaak muwura tõõ
kĩ eeta wũk baarenu adaaitõ.
4 Ĩthĩ muwẽẽnĩtĩ cĩ abũnna dĩc ĩcannĩ,
acananni thĩnĩn cannie ẽla cannĩ.
5 Kahada na erkinya wũk balna õõta,
kahada na tiiciok cugunik,
ĩthõng kumuwa tiiciok wũk balna ĩdĩmanu niia.
6 Kodongeci na aniitia athĩn cĩganĩk lawintia,
nyatarka adiimnyi ririwacĩ cannie aniitia,
õgõõn kĩ ngĩ kadiimi na maam
baatha cĩ õdõõĩ kak.
7 Makayyioit, tajana niia aneeta tamanoko,
ithii tiirthẽtĩ cannie.
Nyĩ alugunyi niia nguum cunni ĩcannĩ,
kõdẽ katĩ ngĩ kogooni na
kĩ eeta cĩk õvvõ loota loowatõ.
8 Ngerethietĩna gõõ vẽlẽk anya aneeta kilimana
thõõth cĩ mĩnan cunni cĩ athii cĩ edeciay,
nyatarka kaari na thĩnĩn cannĩ kĩ aniitia.
Yelea niia aneeta gõõl cĩ kõkõyyẽ na,
nyatarka kajinni na behintia cunni.
9 Makayyioit, ẽẽlawa baai thẽk aneeta mĩrõwẽy ĩcĩganĩk,
nyatarka kalugunyie na ĩcunni.
10 Limana niia aneeta diimẽnẽt cunni,
nyatarka eeni niia Nyekuc cannĩ,
anyĩk woccia niia Ririwac cunni cĩ abũnna,
keyeleha nẽ aneeta gõõl cĩ edeemothi.
11 Makayyioit, nyatarka thar cugunik,
ẽẽla rũgẽt cannĩ, bũnnathĩta cunni,
nyehia niia aneeta pĩrnanta.
12 Anyĩk niia mĩrõk cĩganĩk kitivantẽ,
nyatarka mĩnan cunni cĩ athii cĩ edeciay,
thaan ĩnõõgõ vẽlẽk,
nyatarka keeni na nyakapanait cunni.