Tẽgẽl 141
Tẽgẽl cĩ Davide.
1 Makayyioit, kalayyi na aniitia,
ijjia baai niia tamanoko ĩcannĩ.
Thĩk niia molook cannĩ katĩ ngĩ kavvuyyi na.
2 Anyĩk niia woccia lawinit cannĩ
cĩ aavĩ ĩcĩ nguum cunni wo, kaavu kĩ mõõcacĩ,
anyĩk niia woccia athĩn cĩganĩk cĩk kodongi tiddina wo,
kaavutõ kĩ gii cĩ cavĩto cĩ jiatinu.
3 Makayyioit, bẽk niia kũtũk cannĩ katĩ ngĩ kothoothi,
bẽk thõõth cĩ aduwa ahaatĩ cannie.
4 Nyĩ anya niia kidiim ngĩ kadĩmani kaal cĩk gerthek,
kõdẽ kĩdĩman kaal cĩk gerthek kĩ eet cĩk gerthek,
nyĩ anya niia buu katar thõng kaal
cĩk ẽmẽdẽ cĩk anya nẽẽgẽ aneeta.
5 Anyĩk niia et cĩ abũnna kuuka aneeta,
nyatarka athimatĩca katĩ nẽ aneeta,
anyĩk niia ĩnõõnõ kennea ne, kabaca balna na,
õgõõn kĩ ngooroc cĩ aavĩ õõwa ĩcannĩ.
Athii katĩ õõ cannie cĩ abũrĩ ĩnõõnõ.
Ĩthõng thĩ, kalayyi na aniitia
aaburek eet cĩk gerthek,
6 atdukua katĩ eeti ĩmma makayyiok cĩgĩk thilẽnĩy,
ĩthõng aliman katĩ eeta cĩk gerthek
ngatĩ othooththi thõõth cannie jurrung.
7 Athĩ katĩ nẽẽgẽ ne, “Athanothi katĩ ammẽ cĩgaac look,
õgõõn kĩ ngĩ ẽẽv eeti mana.”
8 Ĩthõng thĩ, acinni kẽbẽrẽ cĩganniek aniitia,
Makayyioit Tiiryioit cannĩ,
kalugunyie na ĩcunni, nyĩ anya aneeta daaĩth.
9 Ẽẽlawa detintia cĩ edettia eeta aneeta,
detintia cĩ edettia eeta nĩĩkĩ gerthek ẽẽ.
10 Anyĩk niia ĩnõõgõ kutduktothĩk detinit cĩnĩng ẽẽ dõ,
ĩthõng ẽẽla aneeta kũũk jurrung.