Tẽgẽl 139
Ẽẽn tẽgẽl cĩ Davide coo, cĩ eyeleei makayyioiti belliok kebelit.
1 Makayyioit, icinu niia thĩnĩn cannĩ ĩcĩtõõnĩ,
ĩthõng agawa niia aneeta vẽlẽk.
2 Agayya niia aneeta katĩ ngĩ kaavẽ loota,
kõdẽ ngĩ kabili,
aga niia muwẽẽnĩt cannĩ,
kõdẽ woyyia ngĩ aavẽ niia rẽẽna ĩcannĩ.
3 Acini niia katĩ ngĩ kõkkõ na ngatĩvõrĩ,
kõdẽ ngĩ koongi loota,
acini niia goolliowẽy vẽlẽk
ĩcĩk kõkõyyẽ na,
4 ĩcowu ma ngaanĩ kuduwa na thõõth buu,
Makayyioit, agawu niia thõõth cĩ katĩ kaduwa na.
5 Bĩt ĩcĩ owu ĩcannĩ, ĩthõng õwõba aneeta,
ĩthõng alaamaha niia athĩnẽy ĩcugunik.
6 Gõõl cĩ agawua niia aneeta ẽẽn thõõth cĩ athii cĩ kagga na,
maka õrrõt ĩcannĩ ngatĩ kagawẽ ĩnõõnõ.
7 Kaviri koccia na kõkkõ ĩjang Ririwaca ĩcunni?
Kaviri koccia na nguuma cunni kõkkõ ĩjang?
8 Mĩ kũwa na tiddina tammuatiddina, aavẽ niia natẽ,
mĩ kũwa na loowatõ, aavẽ niia natẽ tõõ.
9 Mĩ woccia kukul na kavutẽnẽy kũũk tõõna ĩcĩ alibanĩ kõr,
kõdẽ mĩ kũwa tõõna ĩcĩ bũlũco ĩcĩ okolothĩcẽ kõr,
10 kõdẽ natẽ buu athunnia athiiti cunnie aneeta,
agamnya athiiti cunnie cĩ athio aneeta uthuutianĩ.
11 Mĩ woccia kĩthĩ na ne, “Dĩdĩ alugunyia katĩ muwuri aneeta,
ĩthõng katĩ ikiyyia lanyĩtĩ ĩthĩ baalin ĩcannĩ,”
12 kõdẽ ngĩ acĩnẽ niia muwuratõ
aduwõy muwuri kĩ waathĩn,
nyatarka ẽẽn muwuri lanyĩt ĩcunni.
13 Dĩdĩ, ẽngẽnyca niia ẽlẽ cannĩ ĩcĩtõõnĩ,
ĩdĩmanaha balna niia aneeta kẽẽnga cĩ yaangĩ.
14 Kadihiththi na aniitia, nyatarka
adĩmanna balna niia aneeta gõõla ĩcĩ anatti õrrõt,
kaala vẽlẽk cĩk adĩmani niia dĩhĩmẽ õrrõt,
thõõtha ĩcoo kagga na jurrung.
15 Athii gii ĩmma cĩ alugunyi tõõ ĩcunni,
ngĩ kadĩmaniay balna na ngatĩ alugunyi kẽẽnga.
Balna ngĩ kadĩmaniay kẽẽngatõ cĩ yaangĩ,
16 ĩcĩnta balna kẽbẽrẽ cugunniek aneeta
balna nga kĩdĩmaniay ẽlẽ cannie.
Wathinniowẽy vẽlẽk ĩcĩk rũgẽt cannĩ
eheeddi balna nyaragawa cunni
balna ngaanĩ kitirriay na.
17 Nyekuc, mẽẽlĩ muwẽẽntiowa cugunniek,
nyatarka aneeta tiirti õrrõt!
Kijiar ngatĩ woccia kamuwe na!
18 Mĩ katĩmani ngatĩ kẽkẽbẽ muwẽẽntiok cugunik,
mẽẽlĩ woccia nẽẽgẽ ijiar kathaac cĩk titim cĩ bũlũco.
Ĩthõng mĩ kĩngathi wo,
kamũdai ngaanĩ kaavẽ kĩ aniitia.
19 Nyekuc, kadiimi na ngĩ woyyia arui niia
eet vẽlẽk cĩk gerthek!
Ẽnyẽktĩ thẽk niigia ĩcannĩ,
agiitia cĩk amĩnannu ngatĩ aruwu eeta!
20 Adaacci nẽẽgẽ aniitia,
ẽgẽrẽthan mĩrõwa cugunniek thar cugunik.
21 Makayyioit, aga niia ngĩ
kaaburneei na eet cĩk aaburnecci aniitia,
ĩthõng kũtũbũra na ĩnõõgõ cĩk aburni aniitia.
22 Kaaburneei na ĩnõõgõ dĩdĩ,
ẽẽn nẽẽgẽ buu mĩrõk cĩganĩk.
23 Nyekuc, cĩn thĩnĩn cannĩ ĩcĩtõõnĩ,
kĩĩ tĩmana aneeta, ĩthõng agawu mothinit cannĩ.
24 Cĩn niia mĩ kowobi na gõõl ĩmma cĩ gerthe,
ĩthõng kẽnnẽ bitia aneeta gõõla ĩcĩ alna kũdũt.