Tẽgẽl 135
1 Ĩdĩhĩthĩt niigia Makayyioit!
Ĩdĩhĩthĩt thar cĩk Makayyioktak!
Ĩdĩhĩthĩt ĩnõõnõ, niigia ticcianniowa cĩk Makayyioktak
2 niigia wũk aticaninu Ciitha cĩ Makayyiokto
reerunga cĩ Ciith cĩ Nyekuc cĩnac.
3 Ĩdĩhĩthĩt niigia Makayyioit, nyatarka abũnna Makayyioiti,
ebelit niigia dĩhĩthẽnĩt cĩ thar cĩgĩnĩk belintia cĩ talintio.
4 Nyatarka ẽbẽra balna Makayyioiti Yokob kĩĩ et cĩnnĩ,
kĩ eet cĩgĩnĩk cĩk Ĩthraĩlĩ, cĩk athũnnĩ nẽ ĩnõõgõ õrrõt.
5 Kagga na obbua Makayyioiti
ngatĩ maka Makayyioiti cĩnac ijiar
nyekucnya vẽlẽk cĩk athii cĩ ẽnnẽ dĩdĩ.
6 Atican Makayyioiti kaal cĩk anyi ĩnõõnõ katal
tammuatiddina kĩ loota,
kĩ bulucuanĩy kĩ ĩcĩtõõnĩ ĩcĩnĩng vẽlẽk.
7 Anyi nẽ diithua kĩtĩngathõ kivontek looc vẽlẽk looc,
itiona nẽ tammu kĩ badi,
ĩthõng anyĩk nẽ ngõõt kẽtẽẽha
ngĩtĩvõrĩ deheruanĩy ĩcĩgĩnĩk.
8 Uruk balna Makayyioiti abuu looca cĩ Ijibi,
lõgõõ cĩk ẽẽn abuuẽt cĩk eetu kĩ cĩk kelegenu.
9 Aticanini balna Nyekuci kaal cĩk anaat eeta
kĩ cĩk anatti kõrgẽna cĩ eet cĩk Ijibi,a
uukõy kaala cĩkkõ kĩ alaan cĩ Ijibi
kĩ gaala cĩgĩnĩk vẽlẽk.
10 Ẽgẽrẽthan balna nẽ loociok cĩk meelĩk,
ĩthõng uruk balna alaanẽt cĩk tiirtik,
11 Thihon alaan cĩ eet cĩk Amõrĩ,
Og cĩ ẽẽn alaan cĩ Bathanĩ
kĩ alaanẽt vẽlẽk cĩk Kananĩ,
12 aanyĩk balna nẽ loociok cĩgĩk
eet cĩgĩnĩk cĩk Ĩthraĩlĩ.
13 Makayyioit, ahadiay katĩ gõõ
thara cugunniek kũdũt,
Makayyioit, abulie katĩ niia
dõõlẽnĩy ĩcĩk doolenu vẽlẽk
ĩcĩk katĩ avvu dõõkĩthĩ.
14 Nyatarka eteedi katĩ Makayyioiti
eet cĩgĩnĩk ngatĩ abũnnanĩ nẽẽgẽ,
ĩthõng eyelek nẽ
ticcianniok cĩgĩnĩk vẽlẽk thimatĩth.
15 Alaacõ eeta cĩk loociowu nyekucnya cĩk adĩmana
nẽẽgẽ thĩĩhĩy ĩcĩk athĩ kathalkathal kĩ daaba.
16 Ayak nẽẽgẽ kutugeti, ĩthõng thĩ,
kẽnnẽ, athii cĩ aga ngatĩ õthõõthĩ,
ayak nẽẽgẽ kẽbẽrẽ, ĩthõng thĩ,
kẽnnẽ athii cĩ acĩnẽ.
17 Ayak nẽẽgẽ kĩĩna, ĩthõng thĩ,
kẽnnẽ athii cĩ athĩknẽ,
kõdẽ athii cĩ ĩvõngĩth kutugetinẽy ĩcĩgĩk.
18 Ĩthõng eeta cĩk adĩmana nyekucnya cĩkkõ,
õgõõn katĩ kĩ nẽẽgẽ,
ĩthõng eeta vẽlẽk cĩk ẽlẽmĩ nyekucnya cĩkkõ,
õgõõn katĩ kĩ nẽẽgẽ buu.
19 Eeta cĩk Ĩthraĩlĩ, ivitia niigia
ĩdĩhĩthĩt Makayyioit,
eeta cĩk tatũk cĩ Aarõnĩ,
ĩdĩhĩthĩt niigia Makayyioit,
20 eeta cĩk tatũk cĩ Levi,
ĩdĩhĩthĩt niigia Makayyioit,
niigia cĩk ongolinu ĩnõõnõ wo,
ĩdĩhĩthĩt Makayyioit.
21 Ĩdĩhĩthĩt niigia Makayyioit Thiona,
Abaak nẽ ngato Yeruthalẽma.
Kĩdĩhĩthĩt Makayyioit.