Tẽgẽl 115
1 Makayyioit, athii cĩ ẽẽn ageeta cĩk woccia kabuluthena,
ĩthõng thĩ, anyĩk niia thar cugunik kubullie,
nyatarka mĩnan cunni kĩ thõõth cunni cĩ athũnnẽ niinia.
2 Nyia da loociowa kĩĩtõ ne,
“Aavĩ Nyekuci cĩnĩng wo nga?”
3 Aavĩ Nyekuci cĩnang tammuatiddina,
adĩman nẽ thoothonniok vẽlẽk cĩk adiim nẽnẽ.
4 Engenyciay nyekucnya cĩgĩk
thĩĩhĩy ĩcĩk athĩ kathalkathal kĩ daaba
athĩnẽy cĩk eetu.
5 Ayak nẽẽgẽ kutugeti, ĩthõng thĩ,
kẽnnẽ athii cĩ aga ngatĩ õthõõthĩ,
ayak nẽẽgẽ kẽbẽrẽ, ĩthõng thĩ,
kẽnnẽ athii cĩ acĩnẽ.
6 Ayak nẽẽgẽ kĩĩna, ĩthõng thĩ,
kẽnnẽ athii cĩ athĩknẽ,
ayak ũngũẽ, ĩthõng thĩ,
athii cĩ ocoyyi.
7 Ayak nẽẽgẽ athĩna, ĩthõng thĩ,
kẽnnẽ athii cĩ athĩrar ngatĩ awumi gimma,
ayak thoo, ĩthõng thĩ,
athii cĩ woccia õwõ,
kõdẽ nẽnnẽ woccia õthõõth
moloowa cĩnĩng.
8 Õgõõn katĩ eeta wũk balna ẽngẽnyca
nyekucnya cĩkkõ kĩ nẽẽgẽ,
ĩthõng eeta vẽlẽk cĩk aryik thinneti cĩgĩk ĩcĩnĩng
õgõõn kĩ nẽẽgẽ buu.
9 Eeta cĩk Ĩthraĩlĩ, aryik niigia thinneti cuguk kĩ Makayyioit,
ellung nẽ agiitia, ĩthõng uthuutunga.
10 Niigia paadĩrnya cĩk Aarõnĩ,
aryik niigia thinneti cuguk kĩ Makayyioit,
ellung nẽ agiit, ĩthõng uthuutunga.
11 Niigia eeta cĩk ongolinu ĩnõõnõ,
aryik niigia thinneti cuguk kĩ Makayyioit,
ellung nẽ agiitia, ĩthõng uthuutunga.
12 Ahadanet Makayyioiti ageeta,
ĩthõng agatannet katĩna nẽ ageeta,
agatan katĩ nẽ eet cĩk Ĩthraĩlĩ,
ĩthõng agatan paadĩrnya cĩk Aarõnĩ vẽlẽk,
13 agatan katĩ Makayyioiti eet cĩk ongollie ĩnõõnõ,
eet cĩk obbitik kĩ cĩk kĩdĩk vẽlẽk.
14 Anycĩk woccia Makayyioit kaanyung agiitia dõõlĩ,
ĩthõng anycĩk dõõlĩ cuguk buu,
cĩk katĩ ngaanĩ avvu vurtia kĩtooryie.
15 Agatannung woccia Makayyioiti agiitia,
ĩnõõnõ balna cĩ ẽngẽnyca tammutiddin kĩ looc.
16 Ẽẽn tammutiddin cĩ Makayyiokto dõ,
ĩthõng balna aanyĩk nẽ looc eeta.
17 Athii eeta cĩk balna adaaitõ cĩ adĩhĩth Makayyioit,
nyatarka ĩjaktõy nẽẽgẽ.
18 Ĩthõng thĩ, kẽnnẽ naaga cĩk ngaanĩ karũgĩ wo,
kĩdĩhĩthĩt Makayyioit, ithiananĩ kõr coo ĩĩthõng kĩĩ kũdũt.
Ĩdĩhĩthĩt niigia Makayyioit.