Tegeluanu 98

Tẽgẽl 98

Tẽgẽl.

1 Ebelliek niigia Makayyioit tẽgẽl cĩ jõr,

nyatarka ĩdĩman balna nẽ kaal cĩk anaat eeta.

Ayahak athiiti cĩnnẽ cĩ athio jiariniet,

ẽyẽla ĩbaa cĩnnẽ cĩ dĩhĩmĩ tiirthẽt cĩnnĩ cĩ elianto.

2 Aanyĩk balna Makayyioiti jiariniet cĩnnĩ kagawẽ,

ĩthõng ẽyẽla balna nẽ bũnnathĩt cĩnnĩ

kagaacõ eeta cĩk loociowu.

3 Ahada balna nẽ mĩnan cĩnnĩ,

kĩ thõõth cĩnnĩ cĩ athũnnĩ nẽ eet cĩk Ĩthraĩlĩ,

ĩcĩnĩt balna eeta vẽlẽk turnanta cĩ loocu,

elianĩt cĩ Nyekuc cĩnac.

4 Ebelliek niigia Makayyioit tegelua cĩk talintiak

eeta cĩk loociok vẽlẽk,

ĩdĩhĩthĩt ĩnõõnõ tegeluanĩy cĩk talintiak,

5 ebelliek Makayyioit tẽgẽl kidoria,

kidoria kĩ moloowa cĩ tegelo,

6 nyeepunyay kĩ otoona cĩ mĩrkĩcõ,

egerenyit niigia talintia nguuma

cĩ Makayyioit cĩ ẽẽn Alaan.

7 Anycĩk bũlũc kĩ kaal cĩk aatĩ ĩcĩtõ kegerenyit bẽlbẽllõna,

anycĩk eet cĩk loocu vẽlẽk kegerenyit bẽlbẽllõna.

8 Anycĩk lilliok kapanitõ athĩn cĩgĩk,

anycĩk thiiryiok codoi codoi kebelliõy talintia.

9 Anycĩk niigia ĩnõõgõ kebelliõy nguuma cĩ Makayyiokto,

nyatarka aku ẽngẽr nẽ thõõth cĩ eetu loota.

Ẽngẽr katĩ nẽ thõõth cĩ eetu bũnnatina,

gõõla cĩ aduwõy.