Tẽgẽl 88
Ẽẽn tẽgẽl coo cĩ lõgõõ cĩk lõgõõ cĩk Kõõra, cĩ eyeleei makayyioiti belliok kebelit. Tẽgẽl cĩ balna ẽhẽẽd Himanĩa cĩ eet cĩk Ethra.
1 Makayyioit, Nyekuc Ellioit cannĩ,
kaluecci na aniitia waathĩn kĩ baalin vẽlẽk.
2 Anyi woccia niia lawinit cannĩ kikiyyia ĩcunni,
thĩk ulua cannĩ kĩtata cunni.
3 Nyatarka ayak thĩnĩn cannie canan cobbi õrrõt,
ĩthõng ĩthĩ õjõõn rũgẽtĩ cannie kĩ daaĩth.
4 Kaavẽ balna na kĩ eeta gwuak cĩk adaaitõ,
ĩthõng kaavẽ na kĩ eeti cĩ edeciay tiirthẽtĩ cĩnnẽ.
5 Kũtũngõthĩha balna na kõrgẽna cĩ daakciawu,
kaavu kĩ eeta cĩk adaaitõ, ĩthõng oogin loowatõ,
cĩk erekteei nẽẽgẽ aniitia,
cĩk ĩthĩnga ẽẽla niia.
6 Utdukea balna niia aneeta loowa cĩ wuuni,
ngatĩ ẽẽn muwur õrrõt, ĩthõng wuun õrrõt.
7 Ukkuwa varacĩ cunnie aneeta,
anyiwu balna niia maam cĩk tiirtik õrrõt
kukkuyyia aneeta.
8 Anyiwu balna niia gõõnõga kutuburyia aneeta,
ĩthõng anyiwu ĩnõõgõ kakattiaha aneeta.
Kĩlĩwothĩha na, ĩthõng ithii gõõl cĩ kavirie tõõ,
9 ipiryia kẽbẽrẽ cĩganniek ngatĩ kacanannie.
Makayyioit, kavvuyyi na aniitia dõõkĩthĩ,
ĩthõng kodongeei athĩn cĩganĩk lawintia.
10 Eyeleei woccia niia eet cĩk adaaitõ
thoothonniok cĩk anaat eeta?
Arũkna woccia nẽẽgẽ daaĩtha,
ĩthõng idihiththi aniitia?
11 Othooththi mĩnanĩ cunnie loowa cĩ daaĩtho,
kõdẽ othooththi thõõth cĩ athũnnẽ niia
looca cĩ daakciawu?
12 Acĩn woccia eeta thoothonniok cĩk anaat eeta
ngatĩ ẽẽn muwur,
kõdẽ acĩn woccia eeta bũnnathĩt cunni
looca cĩ erehei eet kaala vẽlẽk?
13 Makayyioit, kavvuyyi na aniitia kĩĩ ẽẽlanĩ,
kalayyi na aniitia dõõkĩthĩ ngerenniet.
14 Makayyioit, abũrna niia aneeta,
ĩthõng ulugunyu nguum cunni ĩcannĩ nyia?
15 Balna thẽk ngaanĩ keeni na dĩc,
kacanannie na kõbõwẽ daaĩthĩ,
kĩpĩra balna na ukwẽẽnta cunni,
ĩthõng ithii aneeta muwẽẽnĩtĩ cĩ abũnna.
16 Ukkuwa balna varacĩ cunnie aneeta,
ẽgẽrẽthana tongolinti cunnie aneeta.
17 Alĩkca balna nẽẽgẽ aneeta
waathĩn vẽlẽk kĩ tõwõnĩ,
ĩlĩkta nẽẽgẽ aneeta,
ĩthõng ithii gõõl cĩ kõkõyyẽ na tõõ.
18 Agamaha balna niia aneeta gõõnõga
kĩ eet cĩk kamĩnani nana,
ikiyyia muwuri ĩthĩ gõõna cannĩ dõ.