Tẽgẽl 74
Tẽgẽl cĩ Athavĩ.
1 Nyekuc, nyia tũbũret kũdũt wo?
Avaraci gõõ niia eet cĩk ẽẽn athaa cugunik wo nyia?
2 Hada eet wũk balna ẽẽla niia baa lõõla,
eet cugunik cĩk looc cunni wũk balna ẽbẽra niinia,
muk Thiir cĩ Thionĩ wũ balna aavẽ niinia.
3 Cĩn da kaal vẽlẽk cĩk balna athaanitõ mĩrõwa wo,
tõõ niia Ciitha cĩ Nyekuco vẽlẽk
wũ balna ũtũngothĩk kathaanẽ kũdũt.a
4 Egerenyit balna mĩrõwa cugunniek kĩ maata
Ciitha cĩ Nyekuco cĩ dĩhĩmĩ,
ĩthõng ecebtek berettua cĩgĩk cĩk jorak natẽ.
5 Aatĩ balna nẽẽgẽ kĩ eeta cĩk agam meleewua
cĩk ẽngẽddĩ kẽẽn cĩk meelĩk.
6 Etengedit nẽẽgẽ meleewuanĩy kĩ maacadẽtẽy
kaal cĩk dĩhĩmĩk cĩk meelĩk Ciitha cĩ Nyekuco.
7 Ũtũũthĩtõ balna nẽẽgẽ Ciith cunni kithii.
Ẽgẽrẽthanit nẽẽgẽ ngĩtĩ aavẽ niia cĩ thar cugunik.
8 Õthõõth nẽẽgẽ thinnetinẽy cĩgĩk athĩ ne,
“Kathaan katĩ naaga ĩnõõgõ kĩĩ lõõcĩ ĩĩr!”
Ũtũũthĩtõ balna nẽẽgẽ vatĩk vẽlẽk
cĩk alawĩ eeta Nyekuc loota ngato.
9 Ithiicõ thoothiowa cugunniek cĩk anaat eeta,
athii eeta cĩk õthõõth molook cĩ Nyekuco cĩk ngaanĩ arũgĩ,
ĩthõng erekcet alna katĩ thõõth coo kuumuc kĩĩ tĩngan.
10 Nyekuc, aranniet katĩ mĩrõwa kuumuc kĩĩ tĩngan?
Adaacci katĩ eeta cĩk aaburnecci aniitia kuumuc kĩĩ tĩngan?
11 Nyia tũbũr ngatĩ ellet ageeta attia cunni cĩ athio wo?
Nyia niia ĩthĩnga uuki ĩnõõgõ attia cunni wo?
12 Nyekuc, ĩthõng thĩ, kẽnnẽ eeni niia Alaan cannĩ balna thẽk baa lõõla.
Ayahai niia elianĩt looc.
13 Aniitia balna cĩ engeri bũlũc kõrgẽna
kĩĩ ramma tiirthẽta cunni.
Õrõyõwanu niia ooti
cĩk nacambanyawu maamĩytõ.
14 Aniitia balna cĩ aathi ooti
cĩk nacambawo maamĩytõ,
ĩthõng anyiwu ĩnõõnõ kĩĩ dainit
cĩ kẽlẽgẽ cĩk aatĩ baatha cĩ õdõõĩ kak.
15 Aniitia balna cĩ apuui kẽbẽrẽ cĩk duwwenu kĩ lilliok,
anyi balna niia duwwuẽn cĩk arik kũdũt kodooitõ.
16 Ẽẽn waathĩnĩ cunni, ĩthõng ĩthĩ baalini buu cunni.
Aniitia cĩ ẽngẽnyca kõr kĩ nyĩĩlok.
17 Aniitia balna cĩ aari lõkõrẽnya vẽlẽk cĩk loocu.
Aniitia cĩ ẽngẽnyca tammu kĩ attien.
18 Makayyioit, hada ngatĩ aranni balna miroiti aniitia,
hada gõõl cĩ ẽtẽẽdĩ eeta cĩk agiithi thar cugunik.
19 Nyĩ anyi niia rũgẽt cĩ eet cugunik kaavu
kĩ kurrienya cĩk adak kẽlẽgẽ cĩk bõõnak.
Nyĩ anyi niia kereheei rũgẽtĩ cĩ eet cugunik
cĩk acananni kũdũt.
20 Thũũtĩ niia ngẽrẽmngẽrẽm cunni,
nyatarka abbĩththĩ muwuri cĩ joro looc vẽlẽk.
21 Nyĩ anyi niia eet cĩk ĩtdany eeta kimiiryie ngawanintia.
Anyĩk ngĩjũrra kĩ eet cĩk apĩrna kĩdĩhĩthĩt thar cugunik.
22 Nyekuc, tĩnga jiena, ĩthõng ẽẽla ẽlẽ cunni.
Hada ngatĩ aranni eeta cĩk agiithi aniitia tub.
23 Nyĩ anyi niia kereheei gẽrẽnyõnĩ cĩ mĩrõk cugunik,
calcallõn cĩ mĩrõk cugunik cĩk alna kũdũt.