Thõõth cĩ aturna cĩ Yokobĩ cĩ lõgõõ cĩgĩnĩk
49
Ma vurtia cĩnnĩ, ũtũvvũwa Yokobĩ lõgõõ cĩgĩnĩk vẽlẽk, ĩthõng ethek ne, “Aavut da loota kuduwawung agiitia thoothonniok cĩk katĩ avvuneccung agiitia wathinniowẽy ĩcĩk katĩ avvu.
2 “Uluttie, ĩthõng ĩthĩktowu niigia vẽlẽk lõgõõ cĩk Yokobĩ wo,
ĩthĩrarit thõõth cĩ baaba cunung Ĩthraĩl.
3 “Niia Ruubenĩ, eeni niia abuu cannĩ,
eeni niia tiirthẽt cannĩ, cĩ eeni yelinit cĩ tiirthẽt cannĩ,
ijiari niia eet bulẽnta kĩ makathĩta.
4 Doolec cannĩ cĩ ogooni kĩ tõwõnĩ, ithii katĩ tiirthẽtĩ cunnie,
nyatarka thĩ balna itiowu niia ciith cannĩ,
ĩthõng aaru ngaa cĩ baaba kĩĩ ngaa cunni.
5 “Eegin Thimionĩ kĩ Levi gõtõõnõk,
ẽẽn nyetubanya cĩgĩk cĩk ẽtẽẽdĩ eeta.
6 Athii woccia na cĩ kadiimie ngatĩ kithiowẽ thõõth cĩnĩng,
athii na cĩ kithio ngĩtĩ alũtẽnĩ nẽẽgẽ,
nyatarka aruk nẽẽgẽ eet varacintia,
ĩthõng ẽtẽd nẽẽgẽ tõmõnya kĩĩtõ ngõõltĩ, ĩthõng imicci kaganoko.
7 Kaciini na varac cĩnĩng ẽẽ, õrrõt,
nyatarka gerthetin cĩ thinneti cĩgĩk ẽẽ, vẽlẽk.
Kathaani katĩ na ĩnõõgõ looca cĩ Yokobĩ,
kathaantothĩk looc cĩ Ĩthraĩlĩ vẽlẽk.
8 “Ĩthõng niia Yudaa, adihiththi katĩ gõõ aniitia gotoonogu,
ĩthõng athĩna cugunniek agam katĩ gõõ mĩrõk cugunik vẽlẽk,
ĩthõng ululeci katĩ lõgõõ cĩk baaba aniitia nguumti cĩgĩk.
9 Yudaa, eeni niia maa cĩ dĩcĩ, cĩ õbõda daintia cĩ kelekto,
ogoloti niia kĩ maa, ĩthõng atangu loota,
ogooni niia kĩ maa cĩ athii eeti cĩ aturran ĩnõõnõ tõ.
10 Athii katĩ kẽẽt cĩ alaano cĩ enyeeinie ĩcĩ Yudaa,
ĩthõng athii katĩ eeti ĩmma cĩ adĩm kẽẽt cĩ alaano thoonĩy ĩcĩgĩnĩk,
gii katĩ ngĩ ikiyyia baatĩ kẽẽt coo,
ĩthõng otongollie eeta cĩk loociowu ĩnõõnõ.
11 Ecebei katĩ nẽ thigiriec cĩnnĩ kẽẽta cĩ vĩnõwo
ẽbẽra katĩ nẽ taliibanit cĩ abũnna cĩ ẽcẽbĩ thigiriec cĩnnĩ cĩ dĩcĩ,
ĩthõng ũtũũny katĩ nẽ ceremua cĩgĩnĩk mẽrta ĩcĩ vĩnõwo,
ũũny cẽrẽm cĩnnĩ biyyietĩy ĩcĩk mẽrtẽ cĩ vĩnõwo.
12 Ayak nẽ kẽbẽrẽ cĩk ollik cĩk ijiar mẽrtẽ cĩ vĩnõwo.
Ĩthõng võõrĩ nyĩgĩta cĩgĩnnẽk kijiaritõ ira.
13 “Abaak katĩ Thebuluni titimma cĩ bũlũco,
ĩthõng adĩmaneei katĩ nẽ ngĩtĩ avvu aatẽ kõvõwõlẽta,
avĩjak katĩ lõõcĩ cĩnnẽ gii ngĩĩ õjõõn kĩ kõrõõk cĩ gaalawu cĩ Thidonĩ.
14 “Õgõõn Ithacarĩ kĩ thigiriec cĩ tiiri
cĩ õõngĩ kõrgẽna ĩcĩ nyatajanya ramma loota.
15 Ma katĩ ngĩ acĩn nẽ ngĩtĩ abũnna cĩ ayuwuthi,
ĩthõng ĩdĩhĩmẽ lõõcĩ cĩnnẽ wo,
agiiny katĩ nẽ inyia cĩnnĩ, kĩĩ katĩ karyiwothĩk ijjio,
ĩthõng ẽlẽm nẽ tiic cĩ atĩnganothi kĩ nyakapanaiti thõng.
16 “Ẽngẽr katĩ Daanĩ thoothonniok cĩk eet cĩgĩnĩk gõõla ĩcĩ abũnna,
ẽẽn katĩ eeta cĩgĩnĩk tatũk cĩ Ĩthraĩlĩ.
17 Õgõõn katĩ Daanĩ kĩ kũwaat cĩ aavĩ gõõla
cĩ adak thoo cĩk nyangõlẽwo,
kĩĩ katĩ kuuk eeti cĩ amacuc ĩnõõnõ wo, looc ĩcĩ bowuco.
18 “Makayyioit, kereyyi na aniitia ijjia ẽẽla aneeta.
19 “Akatĩ katĩ mĩrõwa kõrõõk cĩ Gadĩ,
ĩthõng uuk katĩ nẽ ĩnõõgõ katĩ ngĩ imiiryie.
20 “Ayak katĩ Athẽrĩ ahat cĩ abũnna,
adĩman katĩ gõõ nẽ dainit cĩ ẽmẽdẽ
cĩ woccia atarnanĩ alaanĩ.
21 “Õgõõn Navtali kĩ mĩtdĩrrĩngĩ cĩ ooguay nyeritiewa,
ĩthõng itirria nyio cĩk dĩhĩmĩk.
22 “Õgõõn Yothẽbõ kĩ kẽẽt cĩ vĩnõwo cĩ aari kĩĩ tĩhĩdĩng,
aari kĩĩ tĩhĩdĩng ngatĩ õjõõn keberecĩ cĩ duwwo,
ĩthõng otodit taliibanẽ cĩgĩnnẽk lũwat.
23 Avaracii balna mĩrõwa ĩnõõnõ, ĩthõng iccia nyarangĩtẽy,
iccia ĩnõõnõ, nyatarka aaburneei.
24 Ĩthõng thĩ, alna tiir kirihiti cĩnnẽ,
tiirti athĩna cĩgĩnnẽk,
nyatarka athĩn cĩk Nyekuc cĩ Tiiri vẽlẽk cĩ Yokobĩ,
nyatarka ẽẽn nẽ Tũwayyioit,
ĩthõng ĩthĩ thiir cĩ alugunyẽnĩ Ĩthraĩlĩ,
25 nyatarka aku elinti cunnie ĩcĩ Nyekuc cĩ baaba,
nyatarka agatanni Nyekuci cĩ Tiiri cĩ Ijiar vẽlẽk aniitia
gatanintia ĩcĩ aku tammuatiddina
gatanintia ĩcĩ aku maamĩy loota
gatanintia ĩcĩ aku kẽẽnga kĩ keethitia.
26 Tiir gatanĩ cĩ baaba ijiar,
gataninit wũ baa thiiryiok wũk obbitik wũk rẽẽntĩk,
kõdẽ thiiryiok cĩk kĩdĩk cĩk aatĩ kũdũt.
Anyĩk gatan coo vẽlẽk kaavu õõwa ĩcĩ Yothẽbõ,
nguuma cĩ makayyioit cĩ gõtõõnõgĩ cĩgĩnĩk.
27 “Õgõõn Benyamini kĩ kudumocĩ
cĩ adak boobo õrrõt,
adak nẽ kelegit ngerenniet,
ẽngẽr nẽ kaal cĩk ayaha jora jiat.”
28 Eet cĩk tatũgẽt cĩk Ĩthraĩlĩ cĩk ẽẽn õmmõtõ kĩ ramma wo cĩkkõ, ĩthõng gõõl cĩ balna agatanĩ Yokobĩ ĩnõõgõ vẽlẽk mĩn mĩn jurrung wo coo.
Daaĩth cĩ Yokobĩ
29 Ngaatĩ aduwacĩ ĩnõõgõ ẽthẽcĩ ne, “Kõbõwẽ yoko na kidiima ngĩ kadaaha. Õõt katĩ adayyiangũ aneeta kĩ õõ baangĩ ngiloma cĩ mana cĩ Evronĩ et cĩ ẽẽn Hiit,
30 ngilom cĩ aavĩ manatõ ĩcĩ Makpẽla, õjõõn ĩcĩ Mamrẽĩ looca cĩ Kananĩ, wũ balna ũũta Abrahamĩ ĩcĩ Evronĩ et cĩ ẽẽn Hiit kĩĩ ngĩtĩ dawintio.
31 Ngĩtĩ balna thẽk adawini Abrahamĩ kĩ ngaa cĩnnĩ Thaara neccie, ĩthõng balna adayyie Aĩthaĩ kĩ ngaa cĩnnĩ Rẽbẽka buu natẽ, kada balna na Lẽha buu natẽ.
32 Uutiay balna mana kĩ ngilom ĩcĩ eet cĩk Hiiti.”
33 Ma balna ngĩ ẽdẽcak Yokobĩ thõõth cĩ irionĩcẽ nẽ lõgõõ cĩgĩnĩk ẽẽ, õdõnga nẽ thoo cĩgĩnĩk, ĩthõng atangu lobela, ĩthõng adaaha, ĩthõng ũũk eetĩnẽy ĩcĩgĩnĩk.