Agatan Yokobĩ lõgõõ cĩk Yothẽbõ
48
Ma balna vurtia cĩ wathinniok õõgĩ, ikiyyia eeti ĩmma uduwak Yothẽbõ ennek ne, “Ĩmmõrĩ baaba.” Ngaatĩ irioĩ Yothẽbõ kĩ lõgõõ cĩgĩnĩk cĩk maacĩk Manathi kĩ Evraim.
2 Ma balna ngĩ aduwaai eeti ĩmma Yokob athĩ ne, “Ikiyyia ngerunie Yothẽbõ,” õbõda tiirthẽtĩ cĩ Yokobĩ, ĩthõng ĩtĩnga nẽ aavu jiena lobela cĩnnĩ.
3 Ma natẽ, uduwak Yokobĩ Yothẽbõ ethek ne, “Alibaca balna aneeta Nyekuci cĩ Tiiri cĩ Ijiar vẽlẽk ngatĩ athĩ Luuth looca cĩ Kananĩ, ngaatĩ agatania aneeta,
4 ĩthõng ennea ne, ‘Kõkkõ katĩ kaanyi na aniitia tirra dõõlĩ cĩk meelĩk. Ayahi katĩ meelitin cĩ eetu, ĩthõng katĩ kaanyi looc coo, kĩĩ cĩ dõõlĩ cĩk dõõlĩ cugunik kũdũt vurtia cunni.’
5 “Ĩthõng yoko, lõgõõ wugunniek wũk balna arittiay ẽẽn ramma Ijiba baa nga kikiyyia na, Evraimi kĩ Manathi ẽẽn nẽẽgẽ vẽlẽk cĩganĩk, õgõõn kĩ yoko ma ngĩ ẽẽn Ruubenĩ kĩ Thimion cĩganĩk koo.
6 Ĩthõng doolia gwuak cĩk arittiay vurtia cĩnĩng ẽẽn katĩ nẽẽgẽ cugunik, looca cĩ aragĩth katĩ nẽẽgẽ, avvẽ katĩ nẽẽgẽ thaaryiowẽy ĩcĩk gõtõõnõgĩ cĩgĩk.
7 Ma baa ngĩ kõbõda na Paddana, ikiyyia adaak Racẽlĩ looca cĩ Kananĩ, baa ngaanĩ kõwõyya gõõla, ngatĩ õjõõn kĩ Evrath, ĩthõng kadaweha na ĩnõõnõ natẽ.” Athĩ Evrath thar õõgĩ Bẽtẽlẽhẽm.
8 Ma baa ngĩ ĩcĩn Yokobĩ lõgõõ cĩk Yothẽbõ ẽẽ, ijin nẽ ĩnõõnõ ethek ne, “Dõõlĩ cĩk ngẽnẽ cĩkkõ?”
9 Ẽdẽcĩ Yothẽbõ ethei ne, “Ẽẽn cĩkkõ lõgõõ cĩk balna anya Nyekuci aneeta ngato.” Ĩthõng ĩthĩ Ĩthraĩlĩ ne, “Yahaha ngato kĩĩ kagatan na ĩnõõgõ.”
10 Ĩthõng thĩ, balna ngĩ õbõwẽ Ĩthraĩlĩ ĩthĩ ruben, nyatarka atangany nẽ, ĩthĩnga acĩnẽ jurrung. Ngaatĩ ayahacĩ Yothẽbõ ĩnõõnõ lõgõõ cĩgĩnĩk kĩĩtõ õjõõntĩ ĩcĩnnĩ, ngaatĩ ĩthaawĩ baatĩnnẽ ĩnõõgõ arabũũt thõng.
11 Ma natẽ, ethek Ĩthraĩlĩ Yothẽbõ ne, “Athii balna na cĩ kamui kathĩ ne, kacinni katĩ aniitia naboo, ĩthõng thĩ, yoko ẽlẽmahia Nyekuci kĩcĩn dõõlĩ cugunik buu.”
12 Ngaatĩ ẽnyẽẽĩ Yothẽbõ lõgõõ cĩgĩnĩk ẽẽ, kuthungtiniy ĩcĩk baatĩnnĩ, ĩthõng akat kuthungti, ĩthõng ulul nguum cĩnnĩ natẽ.
13 Ma balna ngĩ ĩtĩnga Yothẽbõ, ayawothĩk nẽ Ĩthraĩl lõgõõ cĩgĩnĩk ẽẽ, rammatuguan, ĩthõng ayawothĩk Yothẽbõ Ĩthraĩl logoo cĩnnĩ cĩ dĩcĩ Evraim attia ĩcĩ angettio, ĩthõng kĩĩ kaanyĩk abuu cĩnnĩ Manathi attia ĩcĩ athio.
14 Ĩthõng thĩ, balna nga kagatan Ĩthraĩlĩ ĩnõõgõ, abarĩc nẽ athĩn cĩgĩnĩk kĩĩ katadĩk athiit cĩ athio õõwa ĩcĩ Evraimi logoo cĩ dĩcĩ, ĩthõng atadĩk cĩ angettio õõwa ĩcĩ Manathi logoo cobbi.
15 Ngaatĩ agatanĩ nẽ Yothẽbõ athĩnnĩ ne,
“Anyĩk woccia Nyekuc cĩ õõ baangĩ,
Abraham kĩ Aĩthak wũk balna iriok kĩ Nyekuc,
Nyekuc wũ baa ũwayya aneeta buu
rũgẽta cannĩ kĩĩ itin coo,
16 anyĩk woccia anjĩlõ wũ balna ẽẽlana aneeta pĩrnanta
kagatan dõõlĩ cĩkkõ.
Anyĩk woccia ĩnõõgõ kutuvuyyie thaarĩy ĩcĩganĩk
kĩ thaarĩy ĩcĩk õõ baangĩ Abrahamĩ kĩ Aĩthak,
anyĩk woccia ĩnõõgõ kitirrit kĩbbĩtĩt looc.”
17 Ma balna ngĩ acĩn Yothẽbõ baatĩnnĩ ngatĩ atadĩcẽ athiit cĩ athio õõwa cĩ Evraimi ẽẽ, ikiyyia avarac nẽ, ngaatĩ õdõngĩ athiit cĩ baatĩnnĩ õõwa cĩ Evraimi, ĩthõng atadĩk õõwa cĩ Manathi.
18 Ĩthõng ethek Yothẽbõ ĩnõõnõ ne, “Athii tõ baang, doolec cĩ ẽẽn abuu coo, tadĩk athiit cunni cĩ athio õõwa cĩnnĩ.”
19 Abũrĩ kẽnnẽ baatĩnnẽ ethei ne, “Kagga thẽk na ngẽrnanĩ. Aku katĩ ayak nẽ buu eet cĩk meelĩk. Ĩthõng thĩ, thẽk aku katĩ gotonia cĩ dĩcõ maka buu kijiar ĩnõõnõ, ĩthõng avvu katĩ vurtẽẽna cĩgĩnnẽk kĩĩtõ eet cĩk loociok cĩk meelĩk.”
20 Ma natẽ, agatan nẽ ĩnõõgõ waathĩn nĩcẽ,
“Thaarĩy cugunik abũũng katĩ eeta cĩk Ĩthraĩlĩ gataninit coo.
‘Anyĩk woccia Nyekuc kaanyi aniitia tugu kĩ Evraimi kĩ Manathi.’ ”
Ngaatĩ thẽk anyĩcẽ Ĩthraĩlĩ Evraim makathĩt cĩ ijiari gõtõnĩ cobbi Manathi.