Agatan Yokobĩ alaan cĩ Ijibi
47
Ma natẽ, ũũk uduwak Yothẽbõ alaan ethek ne, “Iriokta baangĩ cannie kĩ gõtõõnõga, avvu nẽẽgẽ looca cĩ Kananĩ angĩda kaal cĩgĩk, ĩthõng ayakta ijjio cĩgĩk vẽlẽk, ĩthõng yoko aatĩ Gõthẽna.”
2 Ma natẽ, ẽbẽra nẽ gõtõõnõgĩ tur, ĩthõng ũũk eyelek ĩnõõgõ alaan.
3 Ma natẽ, ikiyyia ijin alaanĩ gõtõõnõgĩ Yothẽbõ ethek ne, “Adĩmannu gõõ niigia nyia?”
Ẽdẽcĩ balna nẽẽgẽ alaan ethei ne, “Keeginna naaga tũwayyiok kĩ baa gõõ õõ baajigietĩ.”
4 Ĩthõng naboo entek ĩnõõnõ ne, “Kavvunna nẽnnẽ kattĩyya ngato kĩdĩĩc kaganoko, nyatarka ĩthĩ maka butuny looca cĩ Kananĩ õrrõt, ĩthõng athii kartienti cĩ ẽggẽ kaala cĩk ticcianniok cugunik wo tõ. Ĩthõng yoko, anyet niia nõõnõ kabaakta Gõthẽna.”
5 Ngaatĩ ẽthẽcĩ alaanĩ Yothẽbõ ne, “Õdõlanti yoko baaba kĩ gotoonogu aniitia,
6 kaanyi thĩ yoko na aniitia looc cĩ Ijibi wo, anyĩk niia baaba kĩ gotoonogu kabaaitõ tõõna cĩ abũnna. Anyĩk ĩnõõgõ kaavutõ Gõthẽna. Ĩthõng ma ngĩ aga õõgĩ cĩk ẽgẽẽnyĩ kõrgẽna cĩnĩng, anyĩk ĩnõõgõ kĩĩtõ tũwayyiok cĩk ũũwa teenyua cĩganĩk.”
7 Ma natẽ, ũũk Yothẽbõ ayaha baatĩnnĩ, ĩthõng eyelek alaan. Ngaatĩ agatanĩ Yokobĩ alaan.
8 Ma natẽ, ijin alaanĩ Yokob ethek ne, “Ẽẽn yoko erkinya cugunniek ĩthõng?”
9 Ẽdẽcĩ Yokobĩ alaan ethei ne, “Ẽẽn erkinya cĩganniek cĩk kabaaẽ looca ĩcoo eet tur kĩ etĩmma kõmmõtõ, ĩthõng kaluugi kũdũt. Ĩthõng balna turẽ erkinya cĩganniek, ĩthõng kapĩrna kũdũt. Ĩthõng arũgĩ õõ baajigietĩ cĩganniek kuumuc, ĩthõng athii balna rũgẽtĩ cĩnĩng cĩ õgõõn kĩ cannie wo.”
10 Ma natẽ, agatan Yokobĩ alaan, ĩthõng ũũwa.
11 Ngaatĩ anyĩcẽ Yothẽbõ looc cĩ abũnna õrrõt Ijiba ẽẽ, baatĩnnĩ kĩ gõtõõnõgĩ tõõn cĩ looc cĩ Ramẽthẽthĩ, ĩthõng anyĩk ĩnõõgõ kabaaitõ natẽ, kĩ balna ma ngĩ aduwaai alaanĩ ĩnõõnõ.
12 Ĩthõng naboo anyĩk Yothẽbõ baatĩnnĩ kĩ gõtõõnõgĩ kĩ eet cĩk kõrõõk cĩ baatĩnnĩ vẽlẽk dainit cĩ ẽlẽnõy kĩ dõõlĩ cĩk ciithi cĩgĩk mĩn mĩn.
Butuny looca ĩcĩ Ijibi
13 Athii balna dainti tõ looc vẽlẽk, nyatarka ĩĩ gẽrtha butuny õrrõt, ipiryia eeta cĩk Ijibi kĩ cĩk Kananĩ vẽlẽk, nyatarka butuny.
14 Ngaatĩ alũtanĩ Yothẽbõ nyarobinya vẽlẽk wũk balna woccia amudiay Ijiba kĩ Kanana, wũk balna ũũtanẽ eeta labĩ, ĩthõng ayahak nẽ nyarobinya alaan ciitha cĩnnĩ.
15 Ma balna ngĩ edecciay nyarobinya cĩk eet cĩk Ijibi kĩ cĩk Kananĩ, ivitia eeta cĩk Ijibi vẽlẽk ĩcĩ Yothẽbõ, ĩthõng entek ne, “Anyet niia ageeta dainit. Nyia thẽk woccia gõõ kadaakta kẽbẽrẽnĩy ĩcugunik wo? Edecciay nyarobinya cĩgaak vẽlẽk.”
16 Ĩthõng ethek Yothẽbõ ĩnõõgõ ne, “Ma ngĩ edecciay nyarobinya, ayakta kaal ivitia atalliaĩ dainit.”
17 Ngaatĩ ayahacĩ nẽẽgẽ Yothẽbõ kaal cĩgĩk, ĩthõng anyĩk nẽ ĩnõõgõ dainit cĩ ataala nyangõlẽnyay, athaanẽy, ẽẽthay, tĩĩnĩy kĩ thigiriey ĩcĩgĩk.
18 Ma baa ngĩ edecciay erkit neccie, ivitiak eeta Yothẽbõ naboo, ĩthõng ivitia entek ne, “Ithii gii cĩ woccia nga kamigeeni naaga aniitia tõ makayyioit, yoko ngĩ edecciay ageeta nyarobinya wo, ĩthõng kaala cĩgaak ẽẽn cugunik, ithii gii cĩ woccia ngaanĩ kaanyi aniitia tõ makayyioit, ĩthĩ eleeti cĩgaak dõ kĩ looc cĩ uungnothi.
19 Nyia thẽk woccia naaga kadaakta kẽbẽrẽnĩy cugunik kĩ looc cĩnang vẽlẽk koo? Tũwẽt niia bõng thẽk ageeta kĩ looc cĩnang vẽlẽk, ĩthõng anyet dainit, kĩĩ katĩ kiittia naaga kĩ looc cĩnang nyakapanak cĩk alaanak. Anyet niia kinyomo, kĩĩ katĩ kũrũkta, ĩthõng athii cĩ kadaakna, ĩthõng ĩthĩnga lõõcĩ athii cĩ aavĩ kaganoko.”
20 Ngaatĩ thĩ balna ũũtanẽ Yothẽbõ manẽẽn cĩk eet cĩk Ijibi vẽlẽk, ĩthõng anyĩk ĩnõõgõ alaan. Ma natẽ, ivitia utuyyiõĩ eeta cĩk Ijibi manẽẽn cĩgĩk, nyatarka balna ĩĩ gẽrtha butuny õrrõt. Ngaatĩ baa ẽnnẽ lõõcĩ vẽlẽk cĩ alaano,
21 ma natẽ, aar Yothẽbõ eet cĩk Ijibi vẽlẽk kĩĩtõ nyakapanak.
22 Athii balna nẽ cĩ ũũta looc cĩ paadĩrnyawu, nyatarka anyi balna ĩnõõgõ alaanĩ ahat dõõkĩthĩ. Ĩnõõnõ thĩ cĩ athii nẽẽgẽ cĩ ũũtẽnẽ looc cĩnĩng.
23 Ma natẽ, uduwak Yothẽbõ eet ethek ne, “Kĩ yoko kutuuwung na agiitia kĩ looc cunung vẽlẽk wo, iittu niigia eet cĩk alaanak, irõt thĩ kinyomo cĩkkõ, kĩĩ katĩ eevit looc.
24 Ĩthõng thĩ, ma ngĩ ibbir mana, engeryiak katĩ gõõ alaan labĩ cĩk kĩdĩk.a Ĩthõng thĩ, thẽk labĩna cĩk anyigiay ĩthĩ kinyomo cĩk manẽẽn cuguk, ĩthõng labĩna gwuak ĩthĩ ahat cĩ korookjiok cuguk kĩ dõõlĩ cuguk.”
25 Ngaatĩ ẽdẽcĩ eeta athĩnnĩ ne, “Ẽẽla niia rũgẽt cĩnang. Anyia koccia kumuddiaha naaga mĩnan kẽbẽrẽnĩy ĩcugunik makayyioit cĩnang. Katalla naaga ngatĩ keeginna katĩ nyakapanak cĩk alaanak.”
26 Ngaatĩ aarĩcẽ Yothẽbõ thõõth cĩ ẽngẽracĩ eeta alaan labĩ wo, kĩĩ ngiran cĩ atican eeta Ijiba, ĩthõng thẽk nga adĩmanni thõõth coo kĩĩ itin coo. Looc balna cĩ paadĩrnyawu dõ cĩ nga kũtũ alaanĩ.
27 Ĩthõng balna, ivitia abaaitõ eeta cĩk Ĩthraĩlĩ looca cĩ Ijibi ngatĩ athĩ Gõthẽn. Ivitia umuddia nẽẽgẽ ijjio natẽ, ĩthõng ivitia itirrit nẽẽgẽ, ĩthõng ĩtooryie kĩĩtõ mẽẽlĩ õrrõt.
28 Abaak balna Yokobĩ Ijiba erkinya tũrgẽrẽm, ĩthõng balna ẽẽn erkinya cĩgĩnnẽk vẽlẽk eet tur kĩ eet ramma kĩ tũrgẽrẽm (147).
29 Ma balna ngĩ õbõktẽ wathinniowa cĩk adaaknĩ Yokobĩ, ikiyyia ũtũvvũ nẽ ngẽrĩnĩ Yothẽbõ, ĩthõng ethek ĩnõõnõ ne, “Ngĩ amĩnanna niia aneeta baaba, tadĩk athiit cunni athana cannĩ, ĩthõng ũbũtanu katĩ ngĩ eyeleca niia aneeta thimati cunni, ĩthõng athũnnẽ thõõth cunni. Ketheci na ne, ma kadaaha, nyĩ adayya Ijiba,
30 ĩthõng thĩ, ma kadaaha, dõnga niia aneeta Ijiba, ĩthõng uuwu adaweha nginiwa wũ balna adawini õõ baangĩ.”
Ma natẽ, ẽdẽc Yothẽbõ baatĩnnĩ ethek ne, “Kadĩmani thẽk katĩ na kĩcĩ aduwa niia wo.”
31 Ma natẽ, ethek Yokobĩ Yothẽbõ ne, “Bũtaneea niia da aneeta.” Ngaatĩ abũtanĩ Yothẽbõ kẽbẽrẽnĩy cĩk baatĩnnĩ natẽ noko. Ĩthõng alawõy Ĩthraĩlĩ itir nẽ ẽlẽ cĩnnĩ kẽẽta ĩcĩ towominto.