Ũũk Yokobĩ looca ĩcĩ Ijibi
46
Ma natẽ, ũlũt Ĩthraĩlĩ ijjio cĩgĩnĩk vẽlẽk ngaatĩ ĩngannĩ õkõyyĩ looca ĩcĩ Ijibi. Ma balna natẽ õdõlan nẽ Beertheba, ĩthõng anyĩk anyinit Nyekuc cĩ baatĩnnĩ cĩnnĩ Aĩthak.
2 Ma baa baalin nĩcẽ, ikiyyia othoothĩk Nyekuci Ĩthraĩl ngonothintia ethek ne, “Yokob, Yokob.” Ẽdẽcĩ kẽnnẽ nẽ athĩ ne, “Ee, aneeta coo.”
3 Ĩthõng ethek Nyekuci ĩnõõnõ ne, “Aneeta Nyekuc, Nyekuc cĩ baaba. Nyĩ ongollie ngatĩ õkõyyẽ Ijiba, nyatarka kõkkõ katĩ kaanyi na aniitia dõõlĩ cĩk meelĩk, ĩthõng katĩ ĩĩtõ nẽẽgẽ eet cĩk looc cĩ tiiri natẽ.
4 Kiiriok katĩ na kĩ aniitia kõdõlanit looc cĩ Ijibi, ĩthõng dĩdĩ kõbõdani katĩ na aniitia naboo. Õkkõ katĩ ammũt Yothẽbõ kir kẽbẽrẽ cugunik katĩ ngĩ adaawu niia.”
5 Ngaatĩ ĩngannĩ Yokobĩ Beertheba, ĩthõng ootti lõgõõ cĩgĩnnẽk ĩnõõnõ Ijiba kĩ dõõlĩ cĩgĩk, ngaay cĩgĩk kaalĩy ĩcĩk õgõõn kĩ toromilẽta cĩk agurut thigirie wũk balna itioniai alaanĩ ĩnõõnõ kõtõõwĩ.
6 Ayak balna nẽẽgẽ kaal cĩgĩk vẽlẽk cĩk balna amũda looca cĩ Kananĩ buu, ĩthõng õõt Yokobĩ kĩ dõõlĩ cĩgĩnĩk vẽlẽk Ijiba.
7 Ayak balna nẽ lõgõõ cĩgĩnĩk kĩ lõgõõ cĩgĩk, kĩ dõõlĩ cĩgĩnĩk cĩk ngayyik kĩ dõõlĩ cĩgĩk cĩk ngayyik, tionniok cĩgĩnĩk vẽlẽk õkõyyĩ Ijiba.
8 Thar cĩk lõgõõ cĩk Ĩthraĩlĩ cĩ athĩ thar õõgĩ Yokob kĩ vurtẽẽn cĩgĩnĩk cĩk balna iriok kĩ ĩnõõnõ õvvõ Ijiba wo cĩkkõ.
10 Lõgõõ cĩk Thimionĩ cĩkkõ, Jemuel, Jamin, Ohad, Jakin, Thohar kĩ Thaul logoo cĩ ngaa cĩ ẽẽn Kananenit.
11 Lõgõõ cĩk Levi cĩkkõ, Gẽrthõn, Kohath kĩ Merari.
12 Lõgõõ cĩk Yudaa cĩkkõ, Ẽr, Õnaan kĩ Thẽẽla, Pẽrẽth kĩ Thẽẽra, ĩthõng thĩ, balna adaaitõ Ẽrĩ kĩ Õnaan looca cĩ Kananĩ. Lõgõõ cĩk Pẽrẽthĩ, Hethron kĩ Hamul.
13 Lõgõõ cĩk Ithacarĩ cĩkkõ, Tõõla, Puah, Jathub kĩ Thĩmron.
14 Lõgõõ cĩk Thebuluni cĩkkõ, Thẽrẽd, Ẽlõn kĩ Jaleel.
15 Lõgõõ cĩk balna arittia Yokobĩ kĩ Lẽha Paddan Arama cĩkkõ, kĩ bũwanyĩnĩ Diina buu. Ẽẽn balna doolia cĩgĩnnẽk cĩk maacĩk kĩ cĩk ngayyik vẽlẽk etĩmma kõmmõtõ kĩ iyyio.
16 Lõgõõ cĩk Gadĩ cĩkkõ, Thẽvõn, Haggi, Thuni, Ethbon, Ẽrĩ, Arodi kĩ Areli.
17 Lõgõõ cĩk Athẽrĩ cĩkkõ, Ĩmna, Ithvaa, Ithvi kĩ Beriha. Athĩ ngõõnĩ cĩnĩng Thẽẽra. Lõgõõ cĩk Beriha cĩkkõ, Heber kĩ Malkiel.
18 Dõõlĩ cĩk balna arittia Yokobĩ kĩ Thĩlpa cĩkkõ, wũk balna anyi Labanĩ bũwanyĩnĩ cĩnnĩ Lẽha, ẽẽn nẽẽgẽ vẽlẽk õmmõtõ kĩ tõrkõnõm.
19 Lõgõõ cĩk ngaa cĩ Yokobĩ wũ athĩ Racẽl cĩkkõ, Yothẽbõ kĩ Benyamin.
20 Arittia balna Yothẽbõ Ijiba Manathi kĩ Evraim ĩcĩ Athenathĩ bũwẽnyĩ Potivẽra et cĩ balna ẽẽn paadĩr cĩ Õõnĩ.
21 Lõgõõ cĩk Benyamini cĩkkõ, Bẽẽla, Bẽkẽr, Athbel, Gẽẽra, Naaman, Ehi, Roth, Muppim, Huppim kĩ Arad.
22 Lõgõõ cĩk balna arittia Yokobĩ ĩcĩ Racẽlĩ cĩkkõ, ẽẽn balna nẽẽgẽ vẽlẽk õmmõtõ kĩ wec.
23 Logoo cĩ Daanĩ coo, Huthim.
24 Lõgõõ cĩk Navtali cĩkkõ, Jathel, Guuni, Jether kĩ Thillem.
25 Lõgõõ cĩk balna arittia Yokobĩ ĩcĩ Bĩlha cĩkkõ, wũk balna anyi Labanĩ bũwanyĩnĩ Racẽl, ẽẽn nẽẽgẽ vẽlẽk tũrgẽrẽm.
26 Eeta vẽlẽk wũk balna iriok kĩ Yokob õvvõ Ijiba, ẽẽn balna nẽẽgẽ vẽlẽk eet iyyio kĩ tõrkõnõm cĩk vurtẽẽn cĩgĩnĩk kir, ĩthõng athii balna cĩ ekebji kalawanẽta cĩgĩnnẽk.
27 Ĩthõng balna lõgõõ cĩk Yothẽbõ wũk baa arittiay ẽẽn ramma natẽ Ijiba, ivitia tionniowa cĩk Yokobĩ wo ĩtooryie ĩĩtõ vẽlẽk eet iyyio kõmmõtõ Ijiba.
Arayyiak Yokobĩ kĩ dõõlĩ cĩgĩnĩk looc cĩ Gõthẽnĩ
28 Ition balna Yokobĩ Yudaa kutuwuanẽ kũũk kõdõlan Yothẽbõ, ĩthõng ijina nẽ gõõl cĩ õkkõ Gõthẽna. Ma balna ngĩ õdõlanit nẽẽgẽ looc cĩ Gõthẽnĩ ẽẽ,
29 ikiyyia ĩdĩmanek Yothẽbõ gii cĩ agurut nyangõlẽ cĩ õgõõn kĩ toromilie ẽẽ, kĩĩ kũũk kurumtõy kĩ baatĩnnĩ Yokob looca ĩcĩ Gõthẽnĩ. Ma balna ngĩ alibai Yothẽbõ ĩnõõnõ wo, ikiyyia arabũũt baatĩnnĩ nĩĩco noko, ĩthõng utulu kuumuc.
30 Ĩthõng ethek Ĩthraĩlĩ Yothẽbõ ne, “Ma yoko ma ngĩ kicini na aniitia, ĩthõng kagawa nga arugi niia wo, kẽlẽma thĩ yoko na ma ngĩ kadaai.”
31 Ma natẽ, uduwak Yothẽbõ gõtõõnõgĩ kĩ baatĩnnĩ kĩ eet cĩk kõrõõk cĩ baatĩnnĩ ethek ne, “Ngaanĩ nõõnõ kõkkõ na kaduwai alaan kennei ne, ‘Ivitia gõtõõnõga kĩ baang cannĩ kĩ eet cĩk kõrõõk cĩnnĩ, wũk balna aatĩ looca cĩ Kananĩ ĩcannĩ ngato.
32 Ẽẽn balna eeta cĩkkõ tũwayyiok, ĩthõng abal kaala. Angĩda balna nẽẽgẽ teenyua cĩk tiinu kĩ cĩk ẽẽthawu kĩ cĩk athaanu kĩ kaal vẽlẽk cĩk ayak nẽẽgẽ.’
33 “Ma ngĩ utuvvuwung alaanĩ, ĩthõng ijinung ennewung ne, ‘Tiic cunung niin?’
34 Uduktiak niigia ĩnõõnõ entek ne, ‘Keeginna ticcianniowa cugunniek koo tũwayyiok rũgẽta cĩnang vẽlẽk, kĩ baa da gõõ atican õõ baangĩ cĩgaak.’ Ma ngĩ uduktiawu ĩnõõnõ ketee, anyung katĩ nẽ aavut ngato looca cĩ Gõthẽnĩ wo, nyatarka aharneei eeta cĩk Ijibi tũwayyiok.”