Anyĩk Yothẽbõ ẽlẽ cĩnnĩ kagawẽ
45
Ma baa ngĩ ĩnĩnga Yothẽbõ õmõgĩ thõõth kõrgẽna cĩ ticcianniok cĩgĩnĩk ẽẽ, ethek nẽ ĩnõõgõ ne, “Eteeit õõt ngatĩvõrĩ ciitha cannĩ.” Ma baa ngĩ aavutõ Yothẽbõ kĩ gõtõõnõgĩ mĩn, ikiyyia uduwak nẽ ẽlẽ cĩnnĩ gõtõõnõgĩ.
2 Ngaatĩ alue nẽ õrrõt, ĩthõng ĩthĩhĩt eeta cĩk Ijibi ĩnõõnõ, ĩthõng ĩthĩhĩt eeta cĩk kõrõõk cĩ alaano ulua nĩcẽ.
3 Ma natẽ, ethek Yothẽbõ gõtõõnõgĩ ne, “Aneeta Yothẽbõ coo! Nga arũgĩ baangĩ?” Ĩthõng thĩ, athii kẽggẽ gotoonogua cĩ atajanĩ, nyatarka abarrit balna nẽẽgẽ õrrõt.
4 Ma natẽ, ethek Yothẽbõ gõtõõnõgĩ ne, “Ĩvĩjakta da yoko ivitia ĩĩtõ õjõõntĩ ĩcannĩ.” Ma baa ngĩ avĩjaha nẽẽgẽ ẽẽ, ikiyyia uduwak nẽ ĩnõõgõ thõõth jurrung ethek ne, “Aneeta gotonu Yothẽbõ coo wũ balna ũũteniangũ ĩcĩ eet cĩk Ijibi.
5 Ĩthõng yoko, nyĩ nga omothinu õrrõt, ĩthõng nyĩ nga avaracicu eleeti cuguk, nyatarka thõõth wũ balna ũũteniangũ niigia aneeta ngato. Nyekuc balna cĩ itionana aneeta ĩcĩ owu kikiyyia kẽẽla rũgẽt cĩ eetu.
6 Ĩĩtõ yoko erkinya ramma cĩk agamĩ butuny looc, ĩthõng katĩ erkinyiay cĩk ẽẽn tur naboo ĩcĩk nga avvu, athii katĩ eeti ĩmma cĩ evyi, kõdẽ ẽtẽda labĩ tõ.
7 Ĩthõng thĩ, balna itionana aneeta Nyekuci kutuwũanĩay ĩcunung ĩcĩ owu kikiyyia kaanyĩk tionniok cuguk kũrũgĩt, kĩĩ katĩ kẽẽlawung agiitia tiirthẽta cobbi wo.
8 Athii balna cĩ ẽẽn agiitia cĩk itionanangũ aneeta ngato, Nyekuc cĩ balna itionana aneeta. Aarĩca balna nẽ aneeta kĩthĩ gaalinit cobbi õlõõ ĩcĩ alaano, ĩthõng aarĩha aneeta kĩthĩ gaalinit cĩ eet cĩk Ijibi vẽlẽk.
9 “Ĩthõng yoko, õõt uduktiak baang taman entek ne, athĩ Yothẽbõ ne, ‘Aanya Nyekuci aneeta kĩthĩ makayyioit cĩ looc cĩ Ijibi. Ijjia ĩcannĩ tamanoko.
10 Aavẽ katĩ niia looca cĩ Gõthẽnĩ ngatĩ kabakanonĩ joonui kĩ aneeta thõng. Yaha thẽk dõõlĩ cugunik kĩ dõõlĩ cĩk dõõlĩ cugunik vẽlẽk, yaha tĩĩna, ẽẽtha, athaa, kĩ ijjio vẽlẽk cĩk ayahi niia.
11 Kathunni katĩ na aniitia natẽ, nyatarka ngaanĩ attĩyya erkinya tur cĩk butunyak. Ĩthõng thĩ, ma athii cĩ akuni niia, agĩĩra katĩ butuny eet cĩk kõrõõk cunni kĩ kaal vẽlẽk kadaaitõ.’
12 “Icintu niigia buu eletinẽy ĩcuguk, kĩ gõtõna Benyamin buu ngĩ ẽẽn aneeta kir cĩ kõthõõthõy kĩ agiitia wo.
13 Õõt uduktiak baang cannĩ makathĩt vẽlẽk cĩ anyĩwothĩca aneeta Ijiba kĩ kaal vẽlẽk cĩk icintu niigia wo. Ĩthõng ayaktawu ĩnõõnõ ngato tamanoko.”
14 Ngaatĩ thĩ baa arabũũtĩ Yothẽbõ gõtõnĩ cĩnnĩ Benyamin, ĩthõng utulu, ma natẽ, arabũũt Benyamini buu ĩnõõnõ, ĩthõng akatĩ ulua.
15 Ĩthõng ũcũcũ Yothẽbõ gõtõõnõgĩ vẽlẽk, ĩthõng utulu. Ma vurtia ivitia othoothiõy gotoonogua kĩ ĩnõõnõ jurrung.
16 Ma balna ngĩ õdõlan nyemut kõrõõk cĩ alaano athĩ ne, ivitia gõtõõnõgĩ Yothẽbõ wo, ivitia ebelbelit alaanĩ kĩ eet cĩgĩnĩk vẽlẽk õrrõt.
17 Ma natẽ ethek alaanĩ Yothẽbõ ne, “Duwak gotoonogu ethek ne, ‘Ĩdĩmanit thõõth coo. Odongtek niigia dainit thigirie, ĩthõng imiiryiewu oottu looca cĩ Kananĩ,
18 ĩthõng abũnna thẽk ma ngĩ ayahanu niigia baaba, ngaay kĩ dõõlĩ cuguk vẽlẽk ĩcannĩ. Kaanyung katĩ na agiitia looc cĩ abũnna Ijiba, ĩthõng ebelbellu katĩ niigia, ĩthõng adaktu niigia kaal vẽlẽk cĩk akula ngato.’
19 “Ĩthõng duwak gotoonogu cugunik ethek ne, ‘Ootti niigia kaal cĩk õgõõn kĩ toromilẽta cĩk agurut thigirie Ijiba, kĩĩ katĩ õõt ayakta niigia dõõlĩ kĩ ngaay, ĩthõng ayaktawu niigia baaba cunung buu.
20 Nyĩ alnacu ijjio cĩk uungniccu niigia vurtia, nyatarka ẽẽn katĩ lõõcĩ cĩ Ijibi vẽlẽk cunung.’ ”
21 Ngaatĩ ẽlẽmĩ lõgõõ cĩk Ĩthraĩlĩ ẽẽ, ngatĩ adĩmanĩ thõõth cĩ aduwaai alaanĩ ẽẽ. Ikiyyia anyĩk Yothẽbõ ĩnõõgõ kaal cĩk õgõõn kĩ toromilẽta wũk agurut thigirie Ijiba kĩ balna mĩ aduwaai alaanĩ, ĩthõng naboo anyi ĩnõõgõ dainit buu cĩ adak jiena.
22 Ma natẽ, engereek nẽ gõtõõnõgĩ ceremua cĩk jõr codoi codoi, ĩthõng anyĩk Benyamin ceremua goolliok tur kĩ thĩĩk cĩk athĩ kathalkathal cĩk ẽẽn eet õmmõtõ kĩ eet tur (300).
23 Ĩthõng thĩ, ijjio balna cĩk itioni nẽ baatĩnnĩ cĩkkõ, thigirie õmmõtõ cĩk õdõng kaal cĩk abũnna cĩk Ijibi, kĩ thigirie cĩk ngayyik õmmõtõ cĩk õdõng labĩ kĩ ahat cĩ avaadiay kĩ dainit cĩ õvvõ adak gõõla.
24 Ma natẽ, itionĩk nẽ gõtõõnõgĩ gõõla, ĩthõng ethek ne, “Nyĩ ovvoyyu ẽpẽkanonu gõõla.”
25 Ngaatĩ thĩ baa ĩngannĩ nẽẽgẽ Ijiba, ĩthõng õõt ũrũbtothĩk baatĩnnĩ cĩnĩng Yokob looca cĩ Kananĩ.
26 Ĩthõng balna uduktiak nẽẽgẽ baatĩnnĩ entek ne, “Nga arũgĩ Yothẽbõ, ĩthõng ẽẽn nẽ makayyioit cĩ Ijibi.” Atdirlangnyi kẽnnẽ baatĩnnẽ, ĩthõng athii cĩ ẽlẽmĩ thõõth cĩnĩng.
27 Ĩthõng uduktiak nẽẽgẽ ĩnõõnõ gii vẽlẽk wũ aduwaai ĩnõõgõ Yothẽbõ. Ĩthõng ma baa mĩ acĩn nẽ kaal cĩk õgõõn kĩ toromilẽta wũk agurut thigirie wũk balna itiona Yothẽbõ kivitia kõdõngtaĩ ĩnõõnõ, ikiyyia ĩthĩ thĩnĩn cĩ Yokobĩ cuu.
28 Ngaatĩ õthõõthĩ Yokobĩ athĩnnĩ ne, “Kẽlẽma na thõõth cunung. Kamui na ngaanĩ arũgĩ ngẽrnannie cannie Yothẽbõ, ĩthõng kadiimi kõkkõ kacini na ĩnõõnõ katĩ nga kadaak na.”