Lõkũlkũl cĩ athii
44
Ĩthõng thĩ, baa ikiyyia uduwak Yothẽbõ ticciannioit cĩ agam ciith cĩnnĩ ethek ne, “Arĩhĩ niia eet cĩkkõ labĩ kĩbbĩtĩt dongokua cĩgĩk cĩk woccia ũũlĩ ngatĩ õcõdĩ, ĩthõng arĩhẽ ĩnõõgõ vẽlẽk nyarobinya tugetiney ĩcĩk dongokua cĩgĩk.
2 Ĩthõng arĩk lõkũlkũl wũnanĩ wũ adĩmaniay thĩĩkta ĩcĩ athĩ kathalkathal kũtũga cĩ dongok cĩ logoo cĩ dĩcĩ ẽẽ, ĩthõng arĩhẽ ĩnõõnõ nyarobinya labĩnẽy dongowa cĩnnĩ buu.” Ĩthõng ĩdĩman nẽ kĩ cĩ aduwa Yothẽbõ ẽẽ.
3 Ma balna ngerethietĩn cĩnnĩ, ikiyyia anyĩk nẽ ĩnõõgõ kĩ thigirie cĩgĩk kõõt.
4 Ma balna nga kõdõlanit nẽẽgẽ ngĩtĩ rẽẽnĩ õlõõ cĩ gaalawu buu, ethek Yothẽbõ ticciannioit cĩnnĩ ne, “Wõb eet nĩĩkẽ tamanoko, ĩthõng mĩ õdõlanu ĩnõõgõ, duwak ĩnõõgõ ennek ne, ‘Nyia ũdũmanit thõõth cĩ abũnna gerthetina wo?
5 Ogorothu niigia lõkũlkũl cĩ gõõ awũdẽẽnĩ makayyioiti cannie, ĩthõng uduwaai thõõth cĩ katĩ aku nyia? Lõkũlkũl cĩ gõõ aduwanĩ nẽ thõõth cĩ katĩ aku. Ĩdĩmantu thõõth cĩ gerthe õrrõt.’ ”
6 Ma balna ngĩ arawak ticciannioiti cĩnnẽ ẽẽ, ĩnõõgõ ikiyyia uduwak nẽ ĩnõõgõ thoothonniok cĩkkõ.
7 Ẽdẽcĩ kẽnnẽ nẽẽgẽ ĩnõõnõ ethei ne, “Õthõõth woccia gõõ makayyioiti cunnie noko nyia? Kadĩmaana woccia thinneti cĩk kadĩmania thõõth cĩ õgõõn noko ngatdang?
8 Ĩthõng naboo koboddiai naaga aniitia nyarobinya wũk balna kamũdana kutugetinẽy cĩk dongokua cĩgaak looca cĩ Kananĩ. Nyia woccia kogorothia gõõ thiihit cĩ athĩ kathalkathal, kõdẽ daab ciitha cĩ makayyioit cunni wo?
9 Ma ngĩ ijiowa niia et codoi ĩcĩnang cĩ ayak lõkũlkũl, ruk niia ĩnõõnõ kadaak, ĩthõng thĩ, katĩ kiittia naaga gwuak nyakapanak cĩk makayyioit cunni.”
10 Ẽdẽcĩ eeti neccie athĩ ne, “Abũnna õrrõt, anycĩk thẽk kaavu kĩcĩ aduwuanu niigia wo. Ĩthõng thĩ, eeti cĩ umudiay ayak lõkũlkũl, aku katĩ nẽ ẽẽn nyakapanait cannĩ, ĩthõng thĩ, katĩ niigia gwuak cĩk amirnu oottu jurrung.”
11 Ma tamanoko, itiktek nẽẽgẽ vẽlẽk dongokua cĩgĩk looc, ngaatĩ õõwĩ.
12 Ma natẽ, ẽrẽpan ticciannioiti cĩ Yothẽbõ dongokua, ithianaĩ ĩcĩ gõtõnĩ cobbi kõdõlan nyangororit. Ngaatĩ aku amũdanĩ lõkũlkũl dongowa cĩ Benyamini.
13 Ma balna ngĩ acĩn gotoonogua thõõth coo wo, ivitia erecitõ nẽẽgẽ ceremua cĩgĩk varacintia. Ngaatĩ õdõngẽcĩ nẽẽgẽ vẽlẽk labĩ cĩgĩk thigirie naboo, ĩthõng imiiryie õõt ĩcĩ kõrõõk cĩ gaalawu.
14 Aavĩ balna Yothẽbõ ciitha cĩnnĩ, balna ngĩ eektothi Yudaa kĩ gõtõõnõgĩ ciith. Ngaatĩ avvu atanyĩ eleeti looc nguuma ĩcĩnnĩ.
15 Ĩthõng, ethek Yothẽbõ ĩnõõgõ ne, “Nyia yoko thẽk coo cĩ adĩmannu niigia wo? Athii cĩ agayyu niigia, ngatĩ kagga na thõõth cĩ katĩmanẽ kagũra?”
16 Ma natẽ, ẽdẽc Yudaa Yothẽbõ ethek ne, “Kaduwaci yoko thẽk woccia cĩk athĩ ngẽnẽ makayyioit cannĩ? Atamaacet thõõth cĩ woccia kathĩnna ne, kamirnia avuthita ĩcoo vẽlẽk. Ẽdẽnya Nyekuci gerthetin cĩ ticcianniok cugunik. Ĩthõng yoko, makayyioit cannĩ, kiittia naaga vẽlẽk kĩ et wũ amudiay ayak lõkũlkũl wo, nyakapanak cugunik.”
17 Athĩ kẽnnẽ Yothẽbõ ne, “Athii woccia cĩ kadĩmani thõõth cĩ õgõõn kĩ neccio. Et wũ amudiay ayak lõkũlkũl dõ cĩ katĩ ẽẽn nyakapanait cannĩ. Ĩthõng niigia gwuak imiiryiewu oottu ĩcĩ aavẽ baaba cunung jurrung.”
Ĩlalek Yudaa Yothẽbõ, nyatarka Benyamin
18 Ngaatĩ baa õkõyyĩ Yudaa ĩcĩnnĩ, ĩthõng ethek ne, “Makayyioit cannĩ, nyĩ avaraci niia ticciannioit cunni, anyĩk ticciannioit cunni kuduwak makayyioit cannĩ thõõth ĩmma, ma naboo ngĩ aduwonu niia kĩ alaan thẽk kir wo.
19 Makayyioit cannĩ, ajinnet balna niia ageeta enneccet ne, ‘Ayakcu niigia baaba cunung, kõdẽ gotonu ĩmma?’
20 Ĩthõng kedeci naaga kentei ne, ‘Kayakca baangiet cĩ atangany õrrõt, ĩthõng aavĩ logoo cĩ maacĩ cĩ dĩcĩ cĩ balna arittiay baa ngĩ atangany baangietĩ. Adaak baa gotonia, ĩthõng yoko ĩĩ ĩnõõnõ dõ cĩ nga arũgĩ gotoonikniy ĩcĩk ẽẽn ramma ẽẽ, ĩthõng amĩnan baangietĩ ĩnõõnõ õrrõt.’
21 “Ngaatĩ thĩ baa enneciet niia ageeta ne, ‘Õõt ayaktahangũ ĩnõõnõ, kĩĩ katĩ kikiyyia kĩcĩn na kir ẽla cannĩ.’
22 Ĩthõng kennecci balna naaga aniitia ne, makayyioit cannĩ, ‘Adaaĩ katĩ baangietĩ ma ngĩ ũtũngek logoo coo ĩnõõnõ looc.’
23 Ĩthõng thĩ, balna ennehet niia ageeta ne, ‘Athii katĩ niigia cĩ acĩnnangũ aneeta, gii ma ngĩ irioktawu kĩ gotonu cunung cĩ dĩcẽ ẽẽ.’
24 Ĩthõng baa thĩ kimiiryieha koottia ĩcĩ aavẽ baangietĩ, ĩthõng kuduktiaha thõõth wũ aduwa niia, makayyioit cannĩ.
25 “Ma baa thĩ vurtia cĩnnĩ, ikiyyia ennehet baangĩ ne, ‘Imiiryi õõt utuyyia labĩ õõgĩ naboo.’
26 Ĩthõng kedeccia naaga ĩnõõnõ kenteea ne, ‘Athii koccia naaga cĩ kamiirena kovvoyyia Ijiba katĩ ngĩ athii cĩ kiiriokca kĩ gõtõna cĩnang cĩ dĩcĩ. Athii naaga cĩ kacĩnna nguum cĩ et nĩcẽ gii ngĩ karũmẽna kĩ gotooniet cĩnang cĩ dĩcĩ.’
27 “Makayyioit cannĩ, enneccet balna baangietĩ cĩnang ageeta ne, ‘Agayyu niigia arittia ngaa cannie lõgõõ cĩk maacĩk ramma.
28 Ithii balna codoi ĩcĩnĩng, ĩthõng kĩthĩ na ne, “Adait yoko kẽlẽgẽ cĩk bõõnak ĩnõõnõ, athaantĩk ẽlẽ tuu.” Ĩthõng ngaanĩ na kĩcĩn ĩnõõnõ naboo.
29 Katanganya na, ma ngĩ agamtahangũ gõtõnĩ buu ĩcannĩ, ĩthõng ũũk ijiowa pĩrnanẽt gõõla, anyangũ woccia kẽnnẽ niigia aneeta et cĩ võõrĩ õõ wo, kadaawũ.’
30 “Ĩthõng thĩ, ma ngĩ athii cĩ kiiriokca naaga kĩ logoo coo, katĩ ma ngĩ kamiire na kõkkõ ĩcĩ baangĩ, nyatarka amĩnan nẽ ĩnõõnõ õrrõt,
31 ma ngĩ athii cĩ acĩn baangĩ logoo coo adaaĩ woccia katĩ nẽ. Kayahaca woccia katĩ naaga ticcianniowa cugunniek baangiet cĩnang kadaak mothintia.
32 Kabũtaneei balna na ticciannioiti cunnie baang kennei ne, ‘Kayaha katĩ na ĩnõõnõ jurrung. Ĩthõng ma ngĩ athii na cĩ kõbõdaci ĩnõõnõ aniitia, kelemi thẽk katĩ na ngaanyiniet cunni baang, avuthita cĩ rũgẽt cannĩ vẽlẽk.’