Imiiryie gõtõõnõgĩ Yothẽbõ kĩ Benyamin õõt Ijiba
43
Ĩthõng balna nga maka butuny looca cĩ Kananĩ noko.
2 Baa ngĩ edecciak nẽẽgẽ labĩ wũk balna õvvõ ũũta Ijiba, ikiyyia ethek baatĩnnẽ ĩnõõgõ ne, “Imiiryi bõng õõt utuyyiahetu dainit ĩmma naboo.”
3 Ẽdẽcĩ kẽnnẽ Yudaa ĩnõõnõ ennei ne, “Atĩrĩthet balna eeti neccie ageeta õrrõt enneccet ne, ‘Athii woccia cĩ kacinnung agiitia naboo, katĩ mĩ athii cĩ iriowanu niigia kĩ gotonu cĩ dĩcĩ ẽẽ.’
4 Ngĩ anyet niia kiiriokta kĩ gotooniet cĩnang Benyamin, kovvoyyia katĩ kũũtaci aniitia dainit.
5 Ĩthõng thĩ, ngĩ athii cĩ itioni niia ĩnõõnõ, athii katĩ naaga cĩ kovvoyyia natẽ, nyatarka balna aduwacet eeti neccie ageeta enneccet ne, ‘Athii katĩ cĩ acĩnnu nguum cannĩ naboo gii ngĩ irioktawu kĩ gotonu.’ ”
6 Ĩthõng ijin baatĩnnẽ Ĩthraĩlĩ ĩnõõgõ ethek ne, “Nyia thẽk ayaktahangũ thõõth cĩ gerthe aneeta wo, ngatĩ aduwaccu et nĩcẽ enneccu ne, ayakcu gotonu ĩmma wo?”
7 Ẽdẽcĩ nẽẽgẽ athĩ ne, “Ajinnet baa eeti thoothonniok cĩk olu kũdũt enneccet ne, ‘Nga arũgĩ baaba? Ayakcu niigia gotonu ĩmma?’ Ngaatĩ kaduwacia ĩnõõnõ thoothonniok cĩk ajinnet nẽ ẽẽ. Kagayya woccia da naaga kuu kathĩnna ne, enneccet katĩ nẽ ne, ‘Õõt ayakta gotonu ngato’?”
8 Ĩthõng uduwak Yudaa baatĩnnĩ Ĩthraĩl ethek ne, “Baang, anyet niia Benyamin kiiriokta keelliaha gõõla, kĩĩ katĩ kũrũgĩt athii cĩ kadaaknĩ naaga kĩ aniitia kĩ dõõlĩ cĩgaak.
9 Kabũtani na kathĩ ne, kõbõdanẽ katĩ na ĩnõõnõ jurrung, ĩthõng ma ngĩ athii cĩ kõbõdanẽ ngaanya thĩ niia aneeta kũdũt.
10 Ma baalia athii cĩ kẽdẽcania itin coo, kõdõlanta woyyia baalia naaga nginicẽ, ĩthõng kimiiryieha ngõnana ramma.”
11 Ma natẽ, ẽdẽc baatĩnnẽ Ĩthraĩlĩ ĩnõõgõ ethek ne, “Ma ngĩ thẽk õgõõn noko, ĩdĩmanit da ketee. Aryik da kaal cĩk looc cĩnac cĩk abũnna õrrõt dongokuanĩy ĩcuguk, ĩthõng ayaktothiwu et nĩcẽ kĩĩ anyintiok cĩgĩnĩk, ayait mutulianit kĩ lotec cĩ dĩcĩ, kĩ kaal õõgĩ cĩk ẽmẽdẽ kĩ bur cĩk lotolongecak kĩ culumaddi.
12 Ayait naboo nyarobinya goolliok ramma, imiiryiõĩ nyarobinya wũk balna amũdanu tugetiney ĩcĩk dongokua cuguk, kõdẽ yoko da balna erehei et cĩ aari ẽẽ.
13 Ootti gotonu cunung Benyamin buu, ĩthõng imiiryiewu oottu eta nĩĩcẽ tamanoko.
14 Anyĩk woccia Nyekuc cĩ Tiiri cĩ Ijiar vẽlẽk kaanyĩk et nĩcẽ kalal thĩnĩn, kĩĩ katĩ kaanyĩk Benyamin kĩ gotonu wũ balna uungniccu nĩĩcẽ buu koboddia jurrung. Ma ngĩ idiim lõõcĩ agamaha dõõlĩ, anyĩk kagamahanĩ.”
15 Ngaatĩ ayahĩ gotoonogua anyintiok kĩ nyarobinya goolliok ramma, ĩthõng irioit kĩ Benyamin buu. Ngaatĩ õvõyyĩ ĩcĩ Ijibi, ĩthõng õõt urumtõy kĩ Yothẽbõ.
16 Ma balna ngĩ acĩn Yothẽbõ ĩnõõgõ ngatĩ iriowanĩ kĩ Benyamin wo, uduwak ticciannioit cĩ agam ciith cĩnnĩ ethek ne, “Bĩtĩ eet cĩkkõ ciitha cannĩ, bĩt cuwanek tõmõt, ĩthõng ĩdĩmanewu dainit, kaduwena katĩ na kĩ ĩnõõgõ waathĩna tobbi.”
17 Ngaatĩ õkkõ adĩmanĩ ticciannioiti neccie kĩ balna ma ngĩ aduwaai Yothẽbõ ĩnõõnõ, ĩthõng ũũwĩ eet nĩĩkẽ ciitha ĩcĩ Yothẽbõ.
18 Ĩthõng ma baa gõõla otongollie eeta neekie õrrõt baa ngĩ õkõyyĩ eeti neccie ĩnõõgõ ciitha cĩ Yothẽbõ. Ahad balna nẽẽgẽ athĩ ne, “Kayahiay naaga ngato, nyatarka nyarobinya wũk balna amiirothi dongokuanĩy ĩcĩgac. Adiim nẽ agamnyet ageeta, ĩthõng aret kiittia nyakapanak, ĩthõng ũũwĩ thigirie cĩgaac.”
19 Ĩthõng ma baa ngĩ arawothi nẽẽgẽ ciith cĩ Yothẽbõ, uduktiak nẽẽgẽ ticciannioit cĩ agam ciith entek ne,
20 “Makayyioit, kavvunna balna naaga kõr ĩmma Ijiba ngato ĩcĩ owu, kavvunna kũũtana labĩ.
21 Ma baa ngĩ kovvoyyia kayuwuthia gõõla, ĩthõng kuyuwanta naaga dongokua cĩgaak. Kamũdana kẽnnẽ naaga vẽlẽk nyarobinya wũk balna kũũtania labĩ kutugetinẽy ĩcĩk dongokua cĩgaak. Ĩthõng yoko, koboddiaha naaga nyarobinya vurtia.
22 Erekcet eeti cĩ aariciet nyarobinya dongokuanĩy cĩgaak wo vẽlẽk. Kayahana yoko nyarobinya õõgĩ buu cĩk kavvu kũũtania labĩ naboo.”
23 Ẽdẽcĩ kẽnnẽ ticciannioiti athĩ ne, “Nyĩ anyiccu thinneti cuguk kabarritit kaganoko. Nyekuc cunung, Nyekuc cĩ baaba cĩ aaricung agiitia nyarobinya nĩĩkẽ. Kagamtaha balna naaga nyarobinya wũk balna ayahanu niigia vẽlẽk.” Ngaatĩ ayahacĩ nẽ ĩnõõgõ Thimion ngatĩvõrĩ.
24 Ma natẽ, ũũwĩ ticciannioiti ĩnõõgõ ciitha ĩcĩ Yothẽbõ, ngaatĩ anyĩcẽ maam cĩk ũũnyanẽ nẽẽgẽ thoo, ĩthõng naboo ayahak nẽ thigirie cĩgĩk buu kartẽ.
25 Ĩthõng ĩdĩmantek gotoonogua anyintiok cĩk katĩ avvu anyi Yothẽbõ katĩ ngĩ ikiyyia nẽ ngĩ aavu kõr tiddina, nyatarka balna ĩthĩraritõ nẽẽgẽ athĩ ne, avvu katĩ aduwue nẽẽgẽ natẽ.
26 Ma baa ngĩ ikiyyia õdõlan Yothẽbõ kõrõõk, ivitia aanycĩk nẽẽgẽ Yothẽbõ anyintiok wũk balna ayaha nẽẽgẽ, ĩthõng akattiek ĩnõõnõ kuthungti, ĩthõng ulullie.
27 Ngaatĩ ajini Yothẽbõ ĩnõõgõ avuthit cĩ kõrõõk cĩnĩng ẽthẽcĩ ne, “Õgõõn baaba wũ balna athinnu niigia ne, atangany õrrõt kuu? Nga thẽk arũgĩ nẽ?”
28 Ẽdẽcĩ nẽẽgẽ athĩ ne, “Nga baangietĩ cĩnang ticciannioiti cunnie ẽẽ, arũgĩ, ĩthõng abũnna.” Ma natẽ akattiek ĩnõõnõ kuthungti natẽ naboo.
29 Ma balna ngĩ acĩn Yothẽbõ looc, ĩthõng ĩcĩn gõtõnĩ kir cĩ yaatĩnnĩ Benyamin wo, ijin nẽ ĩnõõgõ ethek ne, “Gotonu wũ balna athinnu ne, cĩ dĩcĩ coo?” Ngaatĩ athĩnnĩ nẽ ne, “Anyĩk Nyekuc kagatanina ngẽrnanĩ cannĩ.”
30 Ma natẽ noko, atal thĩnĩn cĩ Yothẽbõ baa ma ngĩ acĩn Benyamin, ĩthõng ĩtĩnga ittio ciith cĩnnĩ ũũk ĩcĩtõ, ngaatĩ õkkõ alue, nyatarka amĩnan nẽ ĩnõõnõ.
31 Ma balna ngĩ ũtũũnya nẽ nguum cĩnnĩ vẽlẽk, ikiyyia ẽtẽha ngĩtĩvõrĩ, ĩthõng anyĩk thĩnĩn cĩnnĩ kõkõm, ĩthõng ennek eet nẽ engerit dainit.
32 Akannai balna ticcianniowa Yothẽbõ dainit cĩnnĩ lobela cĩ duwẽnto mĩn, ĩthõng akannai naboo balna ticcianniowa gwuak gõtõõnõgĩ buu dainit lobela cĩ duwẽnto mĩn, ĩthõng aanycĩk eet cĩk Ijibi cĩk arũmẽ kĩ Yothẽbõ natẽ buu kuduktõy lobela cĩnĩng mĩn. Athii eeta cĩk Ijibi cĩ aduwẽẽnĩ kĩ eet cĩk Heburu, nyatarka aaburneei nẽẽgẽ ĩnõõgõ.
33 Atdirlangan balna thõõth cĩ ẽthẽdanĩ gõtõõnõgĩ Yothẽbõ wo, ĩnõõgõ baa ngĩ ẽthẽdan nẽẽgẽ. Ẽtẽrẽhanĩ ĩcĩ gõtõnĩ cobbi kõdõlan nyangororit.
34 Akanniai balna ĩnõõgõ dainti cĩ aavĩ lobela ĩcĩ Yothẽbõ, ĩthõng balna akanniai Benyamin dainti cĩ ijiar cĩ gotoonikni ngõnana tur. Ngaatĩ thĩ baa aduwẽẽnĩ gõtõõnõgĩ Yothẽbõ kĩ ĩnõõnõ, ĩthõng aavutõ jurrung.