Õõt gõtõõnõgĩ Yothẽbõ Ijiba
42
Ma balna ngĩ ũmũda Yokobĩ ngĩ aatĩ labĩna Ijiba ẽẽ, ikiyyia ethek nẽ lõgõõ cĩgĩnĩk ne, “Attiyyu niigia ngato ebewonu berti dõ noko, athii cĩ ovvoyyu Ijiba nyia?”
2 Ĩthõng naboo ĩĩ ne, “Ma kĩĩ kathĩrari na athĩ, ne, aatĩ labĩna Ijiba ẽẽ. Ulluci da õõt utuyyiahetu labĩ õõgĩ, kĩĩ katĩ kivitia kũrũktĩ naaga, kõdẽ ngĩ kadaaĩ.”
3 Ngaatĩ ĩngannĩ gõtõõnõgĩ Yothẽbõ cĩk ẽẽn õmmõtõ ẽẽ, õvõyyĩ ũũtanẽ labĩ Ijiba.
4 Ĩthõng thĩ, athii balna cĩ itionĩ Yokobĩ Benyamin, gõtõnĩ Yothẽbõ kiirioit kĩ gõtõõnõgĩ nĩĩkẽ, nyatarka balna ongollie nẽ athĩ ne, kõdẽ ngĩ õkkõ woccia amũda thõõth cĩ gerthe gõõla.
5 Ngaatĩ irioĩ lõgõõ cĩk Ĩthraĩlĩ wo, kĩ eet cĩk õvvõ ũũta labĩ Ijiba, nyatarka balna thẽk ĩthĩ maka butuny Kanana buu õrrõt.
6 Ĩthõng yoko, ẽẽn balna Yothẽbõ makayyioit cĩ Ijibi, ĩnõõnõ cĩ balna ũũtẽnẽ labĩ ĩcĩ eet vẽlẽk. Ma balna ngĩ õdõlanit gõtõõnõgĩ Yothẽbõ wo, ivitia akattiek nẽẽgẽ ĩnõõnõ kuthungti, ĩthõng ululit nguumti.
7 Ma baa ngĩ acĩn Yothẽbõ gõtõõnõgĩ cĩgĩnĩk wo, ikiyyia aga nẽ ĩnõõgõ, ĩthõng aavu kĩ cĩ athii cĩ agawĩ nẽ ĩnõõgõ vẽlẽk. Ma natẽ, ijin ĩnõõgõ tiirion ethek ne, “Eeginnu niigia eet cĩk avvunnu nga?”
Ngaatĩ ẽthẽcĩ gotoonogua ne, “Keeginna eet cĩk kavvunna Kanana, kathĩnna ne, kivitiaha kutuyyiaha dainit.”
8 Ma baa thẽk ngĩ aga Yothẽbõ gõtõõnõgĩ, athii kẽnnẽ nẽẽgẽ cĩ agawĩ ĩnõõnõ.
9 Ngaatĩ ahadanĩ nẽ ngonothinet wũ balna ongonothinie nẽ, nyatarka ĩnõõgõ, ngaatĩ ẽthẽcĩ ĩnõõgõ ne, “Eeginnu niigia torotiak cĩk avvunnu orottu looc cĩnang, kĩĩ katĩ ĩcĩnĩt katĩ ngĩ athii cĩ tiir lõõcĩ cĩnang.”
10 Ẽdẽcĩ nẽẽgẽ athĩ ne, “Makayyioit cĩnang, athii tõ, keeginna naaga ticcianniok cugunik, ĩthõng kavvunna kũũta labĩ dõ.
11 Keeginna naaga eet cĩk kabũnnana, ĩthõng keeginna eet cĩk kõrõõk codoi, ĩthõng athii cĩ keeginna torotiak.”
12 Ẽdẽcĩ Yothẽbõ ĩnõõgõ ennei ne, “Athii tõ. Avvunnu niigia, kĩĩ katĩ ĩcĩnĩt looc cĩnang ngĩ athii cĩ tiir.”
13 Ẽdẽcĩ kẽnnẽ nẽẽgẽ ĩnõõnõ ennei ne, “Keeginna naaga ticcianniowa cugunniek koo, gõtõõnõk cĩk keeginna õmmõtõ kĩ ramma lõgõõ cĩk et codoi looca cĩ Kananĩ. Ĩthõng nga avĩya gotoonietĩ cĩnang cĩ dĩcĩ arũmẽ kĩ baangiet cĩnang, ĩthõng adaak ĩmma.”
14 Ẽdẽcĩ Yothẽbõ ĩnõõgõ ennei ne, “Kĩ viyyio thẽk ngĩ kaduwacung na agiitia. Eeginnu niigia torotiak.
15 Ĩthõng gõõl cĩ katĩ atĩmaninu niigia coo. Kĩ dĩdĩ nga arũgĩ alaanĩ wo, athii katĩ niigia cĩ uungniccu looc coo gii katĩ ngĩ ikiyyia gotonu cĩ dĩcĩ ẽẽ, ngato.
16 Itionit niigia et ĩmma codoi kõrgẽna cunung kũũk kayaha gotonu, ĩthõng niigia gwuak, ovvoyyu kĩjana, kĩĩ katĩ kumuddiaha naaga, katĩ ngĩ aduwuanu thõõth cĩ ẽẽn dĩdĩ. Ma ngĩ athii cĩ aduwuanu thõõth cĩ ẽẽn dĩdĩ, kĩ dĩdĩ nga arũgĩ alaanĩ wo, eeginnu niigia torotiak!”
17 Ngaatĩ aarĩcẽ Yothẽbõ gõtõõnõgĩ vẽlẽk kĩjana wathinniok iyyio.
18 Ma balna wathinniowẽy ĩcĩk ẽẽn iyyio, ethek Yothẽbõ ĩnõõgõ ne, “Ĩdĩmanit thõõth coo, ĩthõng tĩna uruktu, nyatarka kongollie na Nyekuc.
19 Ma ngĩ eeginnu niigia eet cĩk aduwuanu thõõth cĩ ẽẽn dĩdĩ, anycĩk gotonu codoi doo kaavu kĩjana ngato, ĩthõng oottu niigia gwuak labĩ ĩcĩ korookjiok cuguk cĩk adak butuny ẽẽ.
20 Ĩthõng thĩ, thẽk ayakta gotonu cĩ dĩcĩ ẽẽ, ĩcannĩ ngato, kĩĩ katĩ kagga na katĩ ngĩ aduwuanu thõõth cĩ ẽẽn dĩdĩ, ĩthõng athii woccia katĩ niigia cĩ adaaknu.” Ma natẽ, elemit gotoonogua ngatĩ adĩmanĩ thõõth cĩnnĩ ẽẽ.
21 Ma natẽ noko, othoothitõ nyaguana ĩĩtõ ne, “Dĩdĩ, kedeththi naaga, nyatarka gotooniet cĩnac. Kĩcĩnĩt balna naaga gõõl wũ baa omothini nẽ baa ngĩ ĩlalecet nẽ ageeta, nyatarka rũgẽt cĩnnĩ, ĩthõng thĩ, balna athii cĩ kathĩknĩ naaga ĩnõõnõ, ĩthõng ĩnõõnõ thĩ cĩ yoko kamũdanĩ naaga thoothonniok cĩk gerthek koo.”
22 Ĩthõng ẽdẽc Ruubenĩ ĩthĩ ne, “Ngaanĩ wõnõ balna kuduwawung na agiitia kennewung ne, nyĩ adĩmannu logoo cio buth? Ĩthõng athii balna kẽnnẽ niigia cĩ athĩknenu. Ĩthõng thĩ, yoko kũdũmanit naaga thõõth cĩ biyyie cĩgĩnĩk.”
23 Athii balna nẽẽgẽ cĩ aga ma ngĩ athĩrar Yothẽbõ thõõth cĩ õthõõth nẽẽgẽ ẽẽ, nyatarka balna õkõbaneei eeti ĩmma ĩnõõnõ thõõth.
24 Ngaatĩ enyeeinie nẽ ĩcĩnĩng õkõyyĩ kabanyca, ĩthõng ũũk utulu, ma natẽ, õbõda ikiyyia othoothiõy kĩ ĩnõõgõ naboo. Ĩthõng ẽbẽra nẽ Thimion kĩĩ kaanyĩk ĩnõõnõ kẽcẽbẽ bẽrẽnĩy ĩcĩgĩk vẽlẽk.
Imiiryie gõtõõnõgĩ Yothẽbõ õõt Kanana
25 Ma natẽ, ikiyyia uduwak Yothẽbõ ticcianniok cĩgĩnĩk karyik labĩ dongokuanĩy ĩcĩk gõtõõnõgĩ nĩĩkẽ, ĩthõng ethek ne, imiiryihi nyarobinya cĩgĩk ẽẽ, kutugetinẽy ĩcĩk dongokua cĩgĩk ĩcĩtõ. Ĩthõng naboo ivitia anycĩk dainit ĩnõõgõ cĩ õvvõ adak gõõla. Ma baa ma ngĩ ĩdĩmantek nẽẽgẽ ĩnõõgõ thõõth coo wo vẽlẽk,
26 ivitia odongtek gõtõõnõgĩ Yothẽbõ dongokua cĩgĩk thigiriey cĩgĩk, ngaatĩ thĩ baa õvõyyĩ.
27 Ma baa nginiwa wũ baa oginnie nẽẽgẽ gõõla, ikiyyia upuuk ĩmma dongok cĩnnĩ, ĩthõng adamutak thigiriec labĩ, amũda kẽnnẽ locibiro cĩ nyarobinya cĩgĩnĩk kũtũga cĩ dongok cĩnnĩ.
28 Ngaatĩ aduwacĩ nẽ gõtõõnõgĩ ẽthẽcĩ ne, “Imiiryothĩk kette nyarobinya cĩganniek dongowa ĩcannĩ wo, ĩcĩkkõ aatĩ dongowa.”
Ma baa ngĩ athĩrar gotoonogua thõõth coo wo, abarritit ĩnõõgõ thinneti cĩgĩk kĩĩ gẽrthẽ wak, ngaatĩ ajinõõnĩ nyaguana athĩnnĩ ne, “Adĩmannet Nyekuci ageeta kuu?”
29 Ma balna ngĩ avvu arawaai nẽẽgẽ baatĩnnĩ Yokob looca cĩ Kanana ẽẽ, uduktiak ĩnõõnõ thõõth vẽlẽk cĩ balna adĩmanẽcĩ eeta ĩnõõgõ entek ne,
30 “Othoothicet makayyioiti cĩ looc cĩ Ijibi tiirion, anyia kẽnnẽ ne, keeginna torotiak cĩk kõrõõta looc.
31 Ma natẽ, kuduktiaha ĩnõõnõ kenteea ne, ‘Keeginna eet cĩk kabũnnana, athii cĩ keeginna torotiak.
32 Keeginna balna naaga gõtõõnõk cĩk keeginna õmmõtõ kĩ ramma, lõgõõ cĩk et codoi. Ĩthõng thĩ, balna ũũwĩ lõõcĩ codoi, ĩthõng avĩya gõtõna cĩ dĩcĩ õlõõ arũmẽ kĩ baangiet cĩnang looca cĩ Kananĩ.’
33 “Enneccet kẽnnẽ gaalinti cĩ loocu ageeta ne, ‘Gõõl cĩ katĩ kagawung na agiitia katĩ ma ngĩ eeginnu niigia eet cĩk aduwuanu thõõth cĩ ẽẽn dĩdĩ coo. Ũtũngtek gotonu codoi kũrũmtea kĩ aneeta ngato, ĩthõng oottu niigia gwuak dainit kũũk kẽẽl butuny korookjiowẽy cuguk.
34 Ĩthõng thĩ, õõt ayaktahangũ gotonu wunung wũ dĩcĩ, kĩĩ katĩ kagga na kĩthĩ ne, monogo niigia eeginnu eet cĩk aduwuanu thõõth wũ ẽẽn dĩdĩ athii cĩ eeginnu torotiak. Ĩthõng katĩ kaanyung na agiitia gotonu, ĩthõng utuyiowu ijjio cuguk looca ĩcoo.’ ”
35 Ma balna ngĩ ayuwan nẽẽgẽ dongokua wo, acĩn kẽggẽ locibironya cĩk nyarobinyawu dongokuanĩy ĩcĩgĩk. Ma balna ngĩ acĩn nẽẽgẽ kĩ baatĩnnĩ locibironya cĩk nyarobinyawu wo, ivitia otongollie nẽẽgẽ õrrõt.
36 Ma natẽ, ikiyyia ethek baatĩnnẽ cĩnĩng Yokobĩ ĩnõõgõ ne, “Agamtahangũ niigia aneeta dõõlĩ. Ĩthõng ithii Yothẽbõ kĩ Thimion, ĩthõng yoko idiimtu naboo ngĩ ovvoyyu Benyamin buu. Aabureea gii vẽlẽk aneeta.”
37 Ma natẽ, ẽdẽc Ruubenĩ baatĩnnĩ ethek ne, “Ma ngĩ athii cĩ kõbõdaci na aniitia Benyamin ruk lõgõõ cĩganĩk. Tũngeehia aneeta thõõth vẽlẽk cĩnnĩ, ĩthõng kõbõdanẽ katĩ na ĩnõõnõ.”
38 Ẽdẽcĩ kẽnnẽ Yokobĩ ennei ne, “Athii doolec cannie cĩ iriokcu kĩ agiitia, agamaha balna gõtõnĩ lõõcĩ, ĩthõng ũtũngothĩk yoko nẽ dõ. Ma da woccia katĩ kũmũda nẽ buu thõõth cĩ gerthe gõõla, athii katĩ cĩ amaaracangũ aneeta et cĩ võõrĩ ĩmana wo daaĩth?”