Ngonothiok cĩk alaanak
41
Ma baa vurtia cĩ erkinya ramma, õngõnõthẽ alaanĩ ma baa ngonothintia cĩnnĩ, acĩn ngĩ abĩlĩ nẽ titimma cĩ lĩĩl cĩ athĩ thar Naaĩl,
2 acĩn nẽ tĩĩn tũrgẽrẽm cĩk adĩhĩ kukulkullie ngĩ ẽẽkta lĩĩla tõ, ĩthõng ivitia ẽggẽcõ titimma.
3 Ĩthõng ma vurtia cĩnnĩ, ẽtẽẽkta tĩĩna cĩk gerthek, cĩk akaran, cĩk ẽẽn tũrgẽrẽm, Lĩĩlatõ ĩcĩ Naaĩlĩ naboo,
4 ĩthõng adait tĩĩna cĩk akaran wo, tĩĩn cĩk adĩhĩ ẽẽ. Ĩthõng ĩcĩnẽ thĩ alaanĩ.
5 Ma baa naboo ngĩ atangu alaanĩ, ikiyyia nẽ õngõnõthẽ naboo ngĩ acĩn akula labitotĩ codoi cĩ abiiri ooti tũrgẽrẽm cĩk obbitik cĩk abũnna.
6 Ma vurtia cĩnĩng, ikiyyia ukula labitotĩ codoi cĩ abiiri ooti tũrgẽrẽm cĩk mĩrmĩrĩk, ĩthõng ũtũũth ngõõtĩ cĩ avungana tõõna cĩ alibanĩ kõrra kĩĩ gẽrthẽ.
7 Ngaatĩ akuui ooti cĩk labĩ cĩk ẽẽn tũrgẽrẽm cĩk mĩrmĩrĩk ẽẽ, ooti cĩk labĩ cĩk abũnna ẽẽ. Ngaatĩ naboo acĩnẽnĩ alaanĩ acĩn kẽnnẽ ngĩ ẽẽn ngonothinet kaganoko.
8 Ma ngerethietĩn cĩnnĩ, õmõthẽ alaanĩ, ĩthõng ũtũvvũ nẽ ngarẽt kĩ eet cĩk ẽgẽẽnyĩ, ĩthõng uduwak ĩnõõgõ thõõth cĩ ngonothinet cĩnnẽ. Kothii kẽnnẽ codoi doo ĩcĩnĩng cĩ aduwaai ĩnõõnõ thõõth cĩ ngonothinet nĩcẽ buu.
9 Ngaatĩ ĩngannĩ eeti wũ agam lõkũlkũl cĩ alaano, ĩthõng õthõõth ĩĩ ne, “Kõr coo, kahada na gerthetin cannĩ.
10 Avaracii baa kõr ĩmma alaanĩ ticcianniok cĩgĩnĩk, ĩthõng ẽcẽba nẽ aneeta kĩ et cĩ avaada ahat cĩnnĩ cĩ avaadiay ciitha cĩ gaalinit cĩ bekciowu.
11 Kongonothina balna naaga vẽlẽk baalina ĩmmanĩ, ĩthõng ngonothiowa cĩgaak vẽlẽk ayak nyemutua cĩk ẽẽn nyẽgẽlẽ nyẽgẽlẽ.
12 Ĩthõng thĩ, balna karũmẽna kĩ ngĩthorowoc cĩ ẽẽn Heburenit, cĩ balna ẽẽn ticciannioit cĩ gaalinit cĩ bekciowu. Ma balna ngĩ kaduwacca naaga ĩnõõnõ ngonothiok cĩgaak wo, ikiyyia uduwaet thoothonniok cĩk ngonothiok cĩgaak wo mĩn mĩn.
13 Ĩthõng balna ivitia edenyciay thoothiowa neekie kĩ baa ngĩ aduwa nẽ ẽẽ, ĩthõng balna obodehia aneeta alaanĩ tiic cannĩ, ĩthõng balna ikiyyia ucud et cĩ avaada ahat cĩnnĩ cĩ avaadiay.”
14 Ma balna ition alaanĩ eet kõõt kayakta Yothẽbõ kĩjana tamanoko. Ĩthõng balna õdõõta nẽ camũn cĩgĩnĩk, ĩthõng itihim ceremua cĩk ẽẽn nyẽgẽlẽ, ĩthõng ũũk nẽ ĩcĩ aavẽ alaanĩ.
15 Ma natẽ, ikiyyia ethek alaanĩ Yothẽbõ ne, “Kongonothie balna na, ĩthõng kothii et cĩ aduwacca thõõth cĩ ngonothinet nĩcẽ. Ĩthõng thĩ, balna kathĩrari athĩ eeta ne, mĩ athihi niia ngonothinet cĩ aduwaci eeti, aga niia ngatĩ aduwanẽ thõõth cĩ ngonothinet nĩcẽ.”
16 Ẽdẽcĩ Yothẽbõ alaan athĩ ne, “Athii na cĩ kaduwanẽ, Nyekuc dõ woyyia cĩ aduwaai alaan thõõth cĩ ngonothinet cĩnnĩ ẽẽ.”
17 Ĩthõng ethek alaanĩ Yothẽbõ ne, “Ngonothintia cannĩ, kongonothie na kabili titimma cĩ Lĩĩl cĩ Naaĩlĩ,
18 ma natẽ, kĩcĩna tĩĩn tũrgẽrẽm cĩk adĩhĩ kukulkullie ẽẽkta lĩĩla tõ nĩcẽ, ĩthõng ivitia ẽggẽcõ kartẽ.
19 Ma vurtia ĩcĩnĩng, ẽtẽẽkta tĩĩna tũrgẽrẽm naboo cĩk akaran õrrõt. Nga na kĩcĩn tĩĩn cĩk akaran kĩĩ gerthe kaavutõ noko looca cĩ Ijibi vẽlẽk.
20 Ĩthõng balna ivitia adait tĩĩna cĩk akaran ẽẽ, tĩĩn cĩk adĩhĩ ẽẽ.
21 Ma baa ngĩ adait nẽẽgẽ ĩnõõgõ vẽlẽk, kothii ĩmma cĩ aga a ne, adait nẽẽgẽ gimma, edenyiay nẽẽgẽ õgõõn kĩ viyyio ma ngĩ akaran ẽẽ. Ĩthõng thĩ, kĩtĩnga na jiena.
22 “Ĩthõng ngonothintia cannĩ ẽẽ, kacini naboo ooti tũrgẽrẽm cĩk labinu, cĩk abiiri jurrung, cĩk alĩnna labitota ĩcĩ odoi doo.
23 Ma vurtia cĩnĩng, ivitia itilithia ooti cĩk labĩ cĩk ẽẽn tũrgẽrẽm cĩk gerthek cĩ avungana ngõõtĩ cĩ aku tõõna ĩcĩ alibanĩ kõrra.
24 Ma natẽ, ukkũẽcõ ooti cĩk labĩ cĩk gerthek koo, ooti cĩk labĩ cĩk ẽẽn tũrgẽrẽm cĩk abũnna ẽẽ. Ĩthõng kuduwaha na ngonothinet cannĩ ngarẽta, kothii kẽnnẽ codoi ĩcĩnĩng cĩ aduwacca thõõth cĩ ngonothinet nĩcẽ.”
25 Ngaatĩ ẽthẽcĩ Yothẽbõ alaan ne, “Aduwõy thoothonniowa cĩk ngonothiok cugunik wo vẽlẽk, ĩthõng eyelek Nyekuci alaan gii cĩ katĩ õkkõ adĩman nẽnẽ.
26 Tĩĩna cĩk ẽẽn tũrgẽrẽm cĩk adĩhĩ kukulkullie ẽẽ, eyehethothi erkinya tũrgẽrẽm. Ĩthõng ooti cĩk labĩ cĩk ẽẽn tũrgẽrẽm cĩk abiiri jurrung ẽẽ, eyehethothi nẽẽgẽ buu erkinya tũrgẽrẽm. Ayak ngonothiowa cĩkkõ vẽlẽk thõõth codoi dõ.
27 Ĩthõng naboo tĩĩna cĩk ẽẽn tũrgẽrẽm wũk gerthek wũk akaran eyehethothi erkinya tũrgẽrẽm, õgõõn naboo ooti cĩk labĩ cĩk ẽẽn tũrgẽrẽm buu wũk gerthek wũk balna avungan ngõõtĩ cĩ aku tõõna ĩcĩ alibanĩ kõr, eyehethothi nẽẽgẽ erkinya tũrgẽrẽm cĩk butunyak.
28 “Õgõõn kĩ thõõth wũ kaduwai na alaan kennei ne, eyelek Nyekuci alaan gii cĩ katĩ õkkõ adĩman nẽnẽ.
29 Ẽẽn katĩ erkinya tũrgẽrẽm cĩk odotianẽ dainti looca ĩcĩ Ijibi vẽlẽk.
30 Ĩthõng thĩ, katĩ vurtia cĩ erkinya cĩk ẽẽn tũrgẽrẽm maka katĩ butuny ĩcĩnĩng. Ĩthõng erehei katĩ eet erkinya wũk balna odotianẽ dainti Ijiba, ĩthõng adak katĩ eet boobo.
31 Gẽrtha katĩ butuny õrrõt, ĩthõng kothii et ĩmma cĩ ahada a ne, odotiay balna dainti.
32 Thõõth wũ balna ongonothinie alaanĩ ngõnana ramma, nyatarka thõõth cĩ baa ĩdĩmanek Nyekuci coo, ĩthõng adĩman katĩ nẽ tamanoko.
33 “Ĩthõng yoko, anyĩk niia woccia alaan kidiima et ĩmma cĩ ẽgẽẽnyĩ, ĩthõng anyĩk kĩĩ makayyioit cĩ looc cĩ Ijibi.
34 Anyĩk niia woccia alaan kẽbẽra gaala õõgĩ kebeit eet cĩk ẽtẽda labĩ, kĩĩ katĩ kaanycĩk alaan cĩ Ijibi labĩ õõgĩa erkinyiay ĩcĩk ẽẽn tũrgẽrẽm ĩcĩk nga odotianẽ dainti.
35 Anyĩk niia woccia gaala cĩkkõ kuluttia labĩ cĩk meelĩk erkinyiay ĩcĩk katĩ avvu cĩk abbirni lõõcĩ ẽẽ, ĩthõng itiangit labĩ korookjiowẽy ĩcĩk gaalawu, kĩĩ katĩ kayait eeta ahat.
36 Anyĩk koccia niia dainit coo kiitiangẽ kĩĩ cĩ loocu, kĩĩ katĩ kuduit eeta erkinyiay ĩcĩk ẽẽn tũrgẽrẽm, ĩcĩk katĩ ẽẽn lõõcĩ butuny Ijiba, kĩĩ katĩ athii cĩ agĩĩranẽ butuny eeta.”
Eberiay Yothẽbõ kĩĩ Makayyioit Ijiba
37 Acĩn balna alaanĩ kĩ gaala cĩgĩnĩk thõõth coo dĩhĩma.
38 Ngaatĩ ajini alaanĩ ĩnõõgõ ẽthẽcĩ ne, “Kamũda woccia et ĩmma cĩ aduwõy kĩ et coo nga, cĩ aavĩ Ririwacĩ cĩ Nyekuco ĩcĩnnĩ wo?”
39 Ngaatĩ ẽthẽcĩ alaanĩ Yothẽbõ ne, “Kĩcĩ anyi Nyekuci aniitia gaa thoothonniok cĩkkõ vẽlẽk koo, athii eeti ĩmma naboo cĩ aga thoothonniok cĩkkõ tõ, ĩthõng ẽgẽẽny kaavu kĩ niia wo tõ.
40 Eeni katĩ niia makayyioit cĩ kõrõõk cannĩ, ĩthõng athikni thẽk katĩ gõõ eeta cĩganniek vẽlẽk aniitia. Ĩthõng thĩ, aneeta dõ alaan cĩ keeni maka ĩcunni thõõtha cĩ taabawo dõ.”
Agam Yothẽbõ Ijib
41 Ngaatĩ ẽthẽcĩ alaanĩ Yothẽbõ ne, “Kaanyi na aniitia makathĩt cĩ looc cĩ Ijibi vẽlẽk.”
42 Ma natẽ, ũpũrũca alaanĩ thiihit cĩ makathĩto attia cĩnnĩ, ĩthõng ũpũrũcẽĩ nẽ athiit cĩ Yothẽbõ. Ĩthõng itihimẽẽĩ nẽ ĩnõõnõ ceremua cĩk dĩhĩmĩk, ĩthõng naboo ũpũrũcẽĩ nẽ ngarikowoc cĩ ẽẽn daab inyiawa cĩnnĩ.
43 Ĩthõng aanyĩk nẽ ĩnõõnõ gii cĩ õgõõn kĩ toromilie cĩ agurut nyangõlẽ, cĩ ẽyẽla athĩ ne, õwõbẽcĩ nẽ alaan makathĩta, ĩthõng egerenyit eeta cĩk uwuantẽcĩ ĩnõõnõ ĩĩtõ ne, “Ẽnyẽktĩ gõõla!” Ngaatĩ aarĩcẽ nẽ ĩnõõnõ kĩĩ makayyioit cĩ looc cĩ Ijibi vẽlẽk.
44 Ngaatĩ ẽthẽcĩ alaanĩ Yothẽbõ ne, “Keeni na alaan, ĩthõng ma nga duwa niia thõõth ĩmma, athii eeti ĩmma cĩ adĩman gii ĩmma Ijiba tõ.”
45 Ĩthõng balna ikiyyia akatek alaanĩ Yothẽbõ thar cĩk athĩ Thavanath Panẽa, ĩthõng itihak ĩnõõnõ bũweec cĩ athĩ Athenath doo cĩ Potivẽra paadĩrb cĩ kõrõõk cĩ gaalawu cĩ athĩ Õõn kĩĩ ngaa cĩnnĩ. Ngaatĩ õkkõ õwõyyĩ Yothẽbõ looc cĩ Ijibi vẽlẽk.
46 Ẽẽn balna Yothẽbõ erkinya cĩgĩnnẽk etĩmma kõmmõtõ balna ngĩ ẽtẽrẽhanĩ nẽ tiic cĩ alaan cĩ Ijibi. Ĩthõng õtõõwĩ nẽ looc vẽlẽk cĩ Ijibi.
47 Abiiri balna lõõcĩ erkinyiay ĩcĩk ẽẽn tũrgẽrẽm ẽẽ, õrrõt.
48 Ma balna ũlũta Yothẽbõ dainit Ijiba erkinyiay ĩcĩk ẽẽn tũrgẽrẽm wũk balna ngaanĩ odotianẽ dainti Ijiba, ĩthõng itiang nẽ korookjiowẽy ĩcĩk gaalawu ĩcĩk obbitik. Ĩthõng itiang nẽ labĩ cĩk evviay manẽẽnĩy joonui õlõõ ĩcĩ gaalawu cĩ obbi nĩĩcẽ.
49 Ĩthõng balna itiang Yothẽbõ dainit cobbi õrrõt cĩ aduwõy kĩ kathaac cĩk bũlũcak, nyatarka balna maka dainti õrrõt katamac ĩnõõnõ ngatĩ woccia ẽkẽbĩ.
50 Ma balna ngaanĩ kivitia erkinya cĩk butunyak, ivitia itiryia Yothẽbõ kĩ ngaa cĩnnĩ lõgõõ cĩk maacĩk cĩk ẽẽn ramma. Ẽẽn balna ngaa cĩnnẽ bũwẽnyĩ Potivẽra paadĩr cĩ looc cĩ Õõnĩ.
51 Akaneei balna Yothẽbõ logoo cĩ ẽẽn abuu thar cĩk athĩ Manathi,c ma natẽ, õthõõth ĩthĩ ne, “Athĩ thar cĩgĩnĩk Manathi, nyatarka anya Nyekuci aneeta kĩlĩtawa pĩrnanẽtĩ cannie vẽlẽk kĩ eet cĩk kõrõõk cĩ baangĩ.”
52 Ma balna vurtia cĩnnĩ, ikiyyia akatek logoo cĩ maacĩ cĩ õwõbẽcĩ cĩ mayyĩ ẽẽ, thar cĩk athĩ Evraim,d ĩthõng õthõõth ĩthĩ ne, “Nyatarka anya Nyekuci kayak doolec looca cĩ kamannẽ na wo.”
53 Ĩthõng balna ivitia edecciay erkinya wũk ẽẽn tũrgẽrẽm cĩk odotianẽ dainti Ijiba,
54 ĩthõng balna ikiyyia butuny erkinyiay ĩcĩk ẽẽn tũrgẽrẽm kĩ balna ngĩ aduwa Yothẽbõ. Aavĩ balna butuny coo loociok õõgĩ vẽlẽk, ĩthõng thĩ, balna looc cĩ Ijibi dõ cĩ balna ayak dainit.
55 Ma balna ngĩ ukuuwa butuny looc cĩ Ijibi vẽlẽk, ivitia utuluththik eeta alaan, nyatarka dainit. Ngaatĩ aduwacĩ alaanĩ eet cĩk Ijibi vẽlẽk ẽthẽcĩ ne, “Õõt ĩcĩ Yothẽbõ, ĩthõng ĩdĩmantu gii vẽlẽk cĩ aduwaccung nẽ.”
56 Ma balna thẽk ngĩ athanothĩk butuny looc cĩ Ijibi vẽlẽk, ikiyyia upuuk Yothẽbõ deherua, ĩthõng ũtũwõĩ labĩ ĩcĩ eet cĩk Ijibi, nyatarka balna athanothĩk butuny coo Ijib vẽlẽk.
57 Ma natẽ, ũlũngantiay eeta loociowẽy vẽlẽk ivitia ũtũẽcõ labĩ ĩcĩ Yothẽbõ Ijiba, nyatarka balna õdõwa butuny eet loociowẽy ĩcĩgĩk.