Uduwa Yothẽbõ thoothonniok cĩk ngonothiok ramma
40
Ma balna vurtia cĩ wathinniok õõgĩ, ikiyyia eeti wũ agam lõkũlkũl kĩ et wũ avaada ahat cĩ alaan cĩ Ijibi, aanycĩk nẽẽgẽ alaan kavarac.
2 Ngaatĩ avaracĩcẽ alaanĩ gaala cĩkkõ cĩk ẽẽn ramma, wũ anyi ĩnõõnõ mẽrtẽ lõkũlkũla kĩ wũ avaadai ĩnõõnõ ahat,
3 ĩthõng ikiyyia arĩk ĩnõõgõ kĩjana ciitha cĩ gaalinit cĩ bekciowu, ngatĩ balna aavẽ Yothẽbõ ẽẽ.
4 Ma natẽ, aavutõ nẽẽgẽ kĩjana wathinniok õõgĩ, ĩthõng ĩdĩma gaalinti cĩ bekciowu Yothẽbõ kĩĩ makayyioit cĩnĩng, ĩthõng iticanothĩk nẽ ĩnõõgõ.
5 Ma baa baalin ĩmma cĩ ongonothinie eeta cĩk ẽẽn ramma cĩk aticanothi alaan cĩ Ijibi, ayak balna ngonothiowa cĩgĩk ẽẽ, thoothonniok cĩk ẽẽn nyẽgẽlẽ nyẽgẽlẽ.
6 Ma balna ngĩ õkkõ acĩn Yothẽbõ ĩnõõgõ ngerethietĩn nĩcẽ, amũdothi kẽnnẽ ĩnõõgõ acũdũũrĩ õrrõt.
7 Ngaatĩ ajini eet cĩkkõ, cĩk ẽẽn ramma cĩk aticanothi alaan, cĩk balna arũmẽ, kĩ ĩnõõnõ kĩjana ciitha cĩ makayyioit cĩnnĩ ethek ne, “Acũdũrenu wanĩco kette niigia õrrõt noko nyia?”
8 Ẽdẽcĩ kẽggẽ nẽẽgẽ athĩ ne, “Kongonothina waabal naaga, ĩthõng athii eeti cĩ aduwacet ageeta thõõth cĩ ngonothinet cĩnang wo tõ.”
Ma natẽ, ethek Yothẽbõ ĩnõõgõ ne, “Athii wõnõ cĩ ẽẽn Nyekuc cĩ aduwacet ageeta thoothonniok cĩk aduwa ngonothinetĩ? Uduktahangũ da ngonothinet cunung wo.”
9 Ma natẽ, ikiyyia uduwak eeti wũ agam lõkũlkũl wũ gõõ anyi alaan mẽrtẽ Yothẽbõ ngonothinet cĩnnĩ ĩĩ ne, “Ngonothintia cannĩ ẽẽ, kacini kẽẽt cĩ vĩnõwo ĩcĩ nguum cannĩ,
10 ĩthõng ayak kẽẽt cĩ vĩnõwo wo taliibanẽ iyyio. Ma tamanoko katĩ ngĩ uppuuk, acavanit vurẽẽna cĩgĩnnẽk, ĩthõng ibbiritõ.
11 Kayai balna na lõkũlkũl cĩ alaano attia cannĩ, ĩthõng kĩdĩma nyegerua cĩk vĩnõwak ẽẽ, kamacũweha lõkũlkũla ĩcĩ alaano ngaatĩ kaanyĩcẽ ĩnõõnõ.”
12 Ẽdẽcĩ Yothẽbõ ĩnõõnõ ennei ne, “Acini taliibanẽ cĩk ẽẽn iyyio wo, eyekthothi wathinniok cĩk ẽẽn iyyio.
13 Ĩthõng katĩ wathinniowẽy ĩcĩk ẽẽn iyyio, amannici katĩ aniitia alaanĩ, ĩthõng õõgani katĩ nẽ aniitia noko, ĩthõng obodeei tiic cunni, ĩthõng katĩ anyiwu ĩnõõnõ mẽrtẽ cĩ vĩnõwo kĩ baa gõõ ma ngĩ adĩmanẽccẽ niia ĩnõõnõ.
14 Ĩthõng thĩ, ma ngĩ ũbũna thõõth cunnie, nyĩ ereheca ngatĩ eyelecia niia aneeta thimati, duwahia alaan thõõth cannĩ, kĩĩ katĩ kẽtẽẽha na kĩjana ngatĩvõrĩ.
15 Kayahiay balna na looca cĩ Heburu tiirthẽta, ĩthõng yoko ngato buu, nga kẽgẽrẽthan na gimma cĩ woccia karĩwõthĩcẽ kĩjan.”
16 Ma balna ngĩ acĩn naboo eeti wũ avaada ahat cĩ alaano ẽẽ, ngatĩ aduwanĩ Yothẽbõ ngonothinet jurrung, ĩthõng ikiyyia uduwak nẽ Yothẽbõ ethek ne, “Kongonothie balna na buu kayai dongokua iyyio cĩk ahat cĩ avaadiay õõwa cannĩ.
17 Abbĩththĩ balna dongok aheenin cĩk avaadiay cĩk alaanak, avvu kẽnnẽ aduk kĩballĩ ahat cĩ avaadiay nĩcẽ dongowa tiddina.”
18 Ẽdẽcĩ Yothẽbõ ethei ne, thõõth cĩ ngonothinet cunni wo coo, “Dongokwuana cĩk ẽẽn iyyio wo eyekthothi wathinniok cĩk ẽẽn iyyio.
19 Ĩthõng katĩ wathinniowẽy ĩcĩk ẽẽn iyyio, ẽtẽdani katĩ alaanĩ õõ cunni, ĩthõng irimeek kẽẽta tiddina, ĩthõng ivitia katĩ adait kĩballĩ ẽlẽ cunni loota.”
20 Ma vurtia cĩ wathinniok iyyio, baa nga adak alaanĩ peyian cĩ tirianĩt cĩnnĩ kĩ gaala cĩgĩnĩk dainit, ikiyyia ũtũvvũ nẽ et wũ agam lõkũlkũl cĩnnĩ kĩ et cĩ avaada ahat cĩnnĩ cĩ avaadiay.
21 Ma natẽ, ikiyyia õbõdẽẽĩ nẽ et wũ gõõ anyi ĩnõõnõ mẽrtẽ tiica cĩnnĩ, kĩĩ katĩ gõõ kaanyĩk alaan mẽrtẽ naboo.
22 Ĩthõng anyĩk et cĩ avaada ahat cĩnnĩ cĩ avaadiay ẽẽ, kuruwue. Ivitia thoothonniowa vẽlẽk wũk balna aduwa Yothẽbõ aavutõ kĩ balna mĩ aduwaai nẽ ĩnõõgõ.
23 Ĩthõng balna ĩnĩnga ahada eeti wũ agam lõkũlkũl cĩ alaano ẽẽ, Yothẽbõ kũdũt.