Yothẽbõ kĩ ngaa cĩ Potivar
39
Ma balna thĩna ootti tuyyiowua cĩk Ĩthĩmaĩlĩ Yothẽbõ Ijiba, kũũk kũtũ Potivarĩ ĩnõõnõ. Ẽẽn balna nẽ gaalinit cĩ bekciok cĩk alaanak.
2 Arũmẽ balna Makayyioiti kĩ Yothẽbõ, ĩthõng anyĩk ĩnõõnõ kikiyyia kaavu jurrung, abaak balna nẽ ciitha cĩ makayyioit cĩnnĩ cĩ ẽẽn Ijibenit.
3 Ma baa ngĩ acĩn makayyioiti cĩnnẽ ngatĩ aavẽ Makayyioiti kĩ ĩnõõnõ, ĩthõng naboo anyĩk nẽ ĩnõõnõ kaal vẽlẽk cĩk adĩman nẽ kĩdĩman jurrung,
4 ma balna ikiyyia ĩmĩnan Potivarĩ Yothẽbõ, ĩthõng ĩdĩma anyĩk ĩnõõnõ kĩĩ bekcioit cĩnnĩ, ĩthõng anyĩk ĩnõõnõ kũthũtĩ ijjio vẽlẽk cĩk kõrõõk cĩnnĩ.
5 Ngaatĩ balna aarĩcẽ nẽ ĩnõõnõ kagam kõrõõk cĩnnĩ kĩ ijjio vẽlẽk cĩgĩnĩk, ikiyyia agatan Makayyioiti kõrõõk cĩ Potivarĩ cĩ ẽẽn Ijibenit, nyatarka Yothẽbõ. Agatan balna Makayyioiti kaal vẽlẽk cĩk ayak Potivarĩ ciitha cĩnnĩ kĩ cĩk aatĩ manatõ.
6 Ma balna thĩna anyĩk Potivarĩ Yothẽbõ makathĩt cĩ athũnnĩ kõrõõk cĩnnĩ, athii balna nẽ cĩ edecothi gimma vẽlẽk, arĩcana nẽ ahat cĩ aduk dõ.
Ĩthõng thĩ, baa natẽ, ikiyyia ĩtĩlĩtha Yothẽbõ ĩthĩ et cĩ ayak ẽlẽ cĩ abũnna cĩ dĩhĩmĩ õrrõt,
7 ma baa natẽ, ikiyyia abarritek ngaa cĩ Potivarĩ Yothẽbõ, ĩthõng alaba ethek ne, “Ijjia kõõt kataguth kĩ aneeta lobela.”
8 Abũrĩ kẽnnẽ Yothẽbõ thõõth nĩcẽ, ĩthõng ennek ngaa nĩcẽ ne, “Cĩnũ uungnicia nõõnõ makayyioiti cannie aneeta kagam kaal vẽlẽk cĩk kõrõõk cĩnnĩ, ĩthõng ĩthĩnga nẽ alnai gimma ciitha cĩnnĩ naboo.
9 Athii eeti ĩmma ciitha coo cobbi cĩ ijiarya aneeta tõ. Anya makayyioiti aneeta kagam kaal vẽlẽk, ĩthõng thĩ, aniitia dõ cĩ nga nẽ kaanyanĩ, nyatarka eeni niia ngaa cĩnnĩ. Kadĩmani woccia thõõth cĩ gerthe cĩ õgõõn noko kuu katĩ kẽgẽrẽthanõy nguuma cĩ Nyekuco wo kuu?”
10 Ĩthõng dõõkĩthĩ ala ngaa neccie Yothẽbõ, abũrĩ kẽnnẽ nẽ thõõth cĩ ajini ngaa neccie ẽẽ, kõdẽ athii cĩ õkõyyĩ ĩcĩnnĩ joonui.
11 Ma baa kõr ĩmma, ũũk iticanõy Yothẽbõ ciitha cĩ makayyioit cĩnnĩ, ĩthõng balna athii ticcianniowa cĩk gõõ aticanni kĩ ĩnõõnõ ciitha tõ.
12 Aku kẽnnẽ agam ngaa neccie cẽrẽm cĩ Yothẽbõ, ĩthõng ethek ne, “Ijjia kõõt kataguth kõdõwẽ!” Ũũngnĩcẽ kẽnnẽ Yothẽbõ ĩnõõnõ cẽrẽm, ĩthõng ivir ũũk ngatĩvõrĩ.
13 Ma baa ngĩ acĩn nẽ ngatĩ ũũngnĩcẽ Yothẽbõ cẽrẽm cĩnnĩ ciitha athĩnẽy ĩcĩgĩnĩk kĩĩ kivir kũũk ngatĩvõrĩ,
14 ikiyyia nẽ ũtũvvũwa ticcianniok cĩk kõrõõk cĩnnĩ, ĩthõng ethek ne, “Ĩcĩnĩt nõõnõ, aku da balna Hebureniti coo ngato kĩ ageeta, kĩĩ katĩ kikiyyia kigiithiet thõng! Ẽẽktaca ngato noko adiim ngĩ arya aneeta kĩthĩ ngaa cĩnnĩ, ngaatĩ kaarẽ uuwunya.
15 Ma ngĩ athĩkna nẽ kaari na uuwunya wo, ilib ngato noko ũũk ngatĩvõrĩ, ĩthõng ũtũngehia cẽrẽm cĩnnĩ wo aneeta.”
16 Ma natẽ, ikiyyia itiang ngaa neccie cẽrẽm cĩ Yothẽbõ ẽẽ, gii baa ma ngĩ õbõda maac cĩnnẽ kõrõõk.
17 Ngaatĩ aku nẽ aduwacĩ maac cĩnnĩ iyiainit cĩnnẽ ẽthẽcĩ ne, “Aku Hebureniti wũ balna ayahacet niia ẽẽn nyakapanait ngato, ĩthõng idiim ngĩ kooginna kĩ aneeta.
18 Ĩthõng baa ngĩ acĩn kaari uuwunya wo, ilib ũtũngehia aneeta cẽrẽm cĩnnĩ ciitha.”
19 Ma baa ngĩ athĩhĩ makayyioiti cĩ Yothẽbõ thõõth cĩ aduwaai ngaa cĩnnẽ ĩnõõnõ wo, ĩthĩ ne, “Gõõl cĩ baa adĩmania nyakapanaiti cunnie wo aneeta neccio,” avarac thĩ baa nẽ õrrõt.
20 Ma baa natẽ, ikiyyia agam makayyioiti cĩnnẽ ĩnõõnõ, ĩthõng arĩk ĩnõõnõ kĩjana wũ gõõ ẽcẽbĩ alaanĩ eet cĩgĩnĩk.
Ĩthõng thĩ, ma baa ngĩ aavĩ Yothẽbõ kĩjana ĩcĩtõ,
21 aavĩ balna Makayyioiti kĩ ĩnõõnõ, ĩthõng balna anyĩk ĩnõõnõ thimatĩth kĩ bũnnathĩt kẽbẽrẽnĩy ĩcĩk gaalinit cĩ ẽbẽk eet cĩk ecebjie kĩjana.
22 Ngaatĩ thĩ baa ẽbẽranĩ gaalinti cĩ kĩjano Yothẽbõ kĩĩ makayyioit cĩ eet cĩk ecebjie, ĩthõng ĩrĩcana tiic cĩ adĩman eeta kĩjano.
23 Athii balna gaalinti cĩ kĩjano ẽẽ, cĩ omoththie, nyatarka balna ĩĩ Yothẽbõ makayyioit cĩ kaal vẽlẽk, nyatarka aavĩ balna Makayyioiti Nyekuci ĩcĩnnĩ, ĩthõng anyĩk kaal cĩk adĩman nẽ vẽlẽk kũbũnta.