Yudaa kĩ Tamar
38
Ma baa wathinniowẽy nĩĩkẽ, ũtũngek Yudaa gõtõõnõgĩ, ĩthõng õõt ũrũmtẽ kĩ et ĩmma cĩ looc cĩ Adullamĩ cĩ athĩ thar Hira.
2 Ma natẽ, ikiyyia õtõrõta Yudaa bũweec ĩmma cĩ looc cĩ Kananĩ, cĩ athĩ baatĩnnĩ thar Thuua, ngaatĩ thĩ baa atihi ĩnõõnõ kĩĩ ngaa cĩnnĩ,
3 ĩthõng balna thĩna ikiyyia anyaawõy ngaa, ĩthõng ũtũwa logoo cĩ maacĩ, ngaatĩ akanẽcĩ nẽ thar cĩk athĩ Ẽr.
4 Ma balna ikiyyia anyaawõy nẽ naboo, ĩthõng itirria logoo cĩ maacĩ, ĩthõng akatek ĩnõõnõ thar cĩk athĩ Õnaan.
5 Ma vurtia cĩnnĩ, ikiyyia itirria logoo cĩ maacĩ ĩmma naboo, ĩthõng akatek ĩnõõnõ thar cĩk athĩ Thẽẽla baa ngĩ aavĩ nẽ looca cĩ athĩ Kethib.
6 Ngaatĩ aku atiwothĩcẽ Yudaa ngẽrĩnĩ cĩnnĩ cĩ owu Ẽr, atihacĩ bũweec cĩ athĩ Tamar.
7 Ĩthõng thĩ, baa ẽẽn Ẽrĩ ngẽrtĩ Yudaa cĩ ẽẽn abuu, gẽrẽthannioit nguuma cĩ Makayyiokto, ngaatĩ arui Makayyioiti ĩnõõnõ.
8 Ngaatĩ ẽthẽcĩ Yudaa Õnaan ne, “Ataguuth bõng kĩ ngaa cĩ gotononu, ĩthõng iticanothiwu ĩnõõnõ avvu kĩ maac cĩnnẽ, kĩĩ katĩ itiryia dõõlĩ cĩk gotononu.”
9 Ĩthõng thĩ, balna aga Õnaanĩ ngatĩ athii doolia cĩk katĩ arittia nẽ ẽẽ, cĩ ẽẽn cĩgĩnĩk. Ma balna ngĩ oogin nẽ kĩ ngaa cĩ gõtõnõnĩ, ehethini kẽnnẽ nẽ biyyie cĩgĩnĩk atduuti loota, kĩĩ katĩ athii cĩ arittiai gõtõnĩ dõõlĩ.
10 Ĩthõng thĩ, baa ma acĩn Makayyioiti ngatĩ gẽrtha thõõth cĩ abũrnĩ Õnaanĩ ngatĩ aritacĩ gõtõnĩ wũ balna adaaĩ doolia wo, ikiyyia uruk Makayyioiti ĩnõõnõ buu kadaak.
11 Ma natẽ, ũũk uduwak Yudaa kalawan cĩnnĩ Tamar ethek ne, “Miirie bõng thẽk nõõnõ bĩt ĩcĩ kõrõõk cĩ baaba. Bĩt nõõnõ thẽk avvu ĩthĩ ngaa cĩ bõyyĩ natẽ kuumuc kĩtĩlĩtha logoo cannie Thẽẽla kĩĩthĩ maka.” Ĩthõng amuk thĩ balna Yudaa athĩ ne, “Adaaĩ woccia katĩ nẽ buu kĩ gotoonogua ẽẽ.” Ngaatĩ thĩ baa amiirẽnẽ Tamarĩ õkõyyĩ õlõõ ĩcĩ baatĩnnĩ.
12 Ma baa vurtia cĩ erkinya õõgĩ, ikiyyia adaak ngaa cĩ Yudaa doo cĩ Thuua. Ma balna ma ngĩ ẽdẽcak Yudaa ulua cĩnnĩ, ĩtĩnga nẽ ũũk ngatĩ athĩ thar Timnaa ĩcĩ eet wũk balna ẽtẽd ĩm cĩk athaaa cĩgĩnĩk, kĩ gõõnĩ cĩnnĩ Hira cĩ ẽẽn et cĩ Adullamĩ iriok kĩ ĩnõõnõ.
13 Ma baa ngĩ uduwak eeti ĩmma Tamar ethek ne, “Baaba wunni wũ atihẽnẽ neccie õkkõ ĩcĩ Timnaa õkkõ ẽtẽd ĩm cĩk athaa cĩgĩnĩk.”
14 Ikiyyia ũppũrũca Tamarĩ ceremua cĩk uluanak, ĩthõng ubung nguum cĩnnĩ, kĩĩ katĩ athii eeti cĩ aga tõ, ĩthõng ũũk aavu loota katũga ĩcĩ Ẽnaĩmĩ, cĩ aavĩ gõõla cĩ õkkõ ĩcĩ Timnaa. Nyatarka baa acĩn nẽ ngĩ ĩtĩlĩtha Thẽẽla ĩthĩ maka, ĩthõng balna nga kaanyĩwothĩk Tamarĩ ĩnõõnõ kĩĩ ngaa cĩnnĩ.
15 Ma baa mĩ acĩn Yudaa ĩnõõnõ wo, amuk kẽnnẽ nẽ athĩ ne, tẽgẽm nẽ, nyatarka balna ammũt nẽ nguum cĩnnĩ thõng.
16 Athii balna cĩ aga nẽ ngatĩ ẽẽn nẽ kalawan cĩnnĩ, ngaatĩ õkõyyĩ nẽ ĩcĩnnĩ gõõla kabanyca, ĩthõng ethek ne, “Ijjia, kadiimi na koogin kĩ aniitia.”
Ẽdẽcĩ ngaa neccie ennei ne, “Nyia woccia katĩ cĩ anya niia aneeta, kĩĩ katĩ kataguth kĩ aniitia?”
17 Ẽdẽcĩ Yudaa ĩnõõnõ ennei ne, “Kitionaci katĩ na aniitia ẽẽth cĩ dĩcĩ ẽẽthay ĩcĩganĩk.”
Ẽdẽcĩ naboo Tamarĩ athĩ ne, “Nyia woccia katĩ cĩ anya niia aneeta kagam kẽrẽwõyĩ gii mĩ itiona ẽẽth?”
18 Ma natẽ, ẽdẽc Yudaa ĩnõõnõ ethek ne, “Adiimi yoko niia aneeta kaanyi nyia gam rẽẽwõyĩ?”
Ẽdẽcĩ Tamarĩ ĩnõõnõ ennei ne, “Anya nõõnõ thiihit kĩ ngarikowoc cĩ ayahi inyiawa wo, kĩ tẽlẽẽĩ cĩ agami niia attia cunni wo.” Ngaatĩ anyĩcẽ nẽ ĩnõõnõ, ĩthõng ataguuthõ kõdõwẽ ngaatĩ aku aritothĩcẽ nẽ ĩnõõnõ.
19 Ma balna ngĩ imiirie nẽ ũũk õlõõ, ikiyyia ũppũrũca nẽ cẽrẽm cĩ ammũtĩ nguum ẽẽ, ĩthõng itihim ceremua wũk balna uluanak naboo.
20 Ĩthõng ition Yudaa gõõnĩ cĩnnĩ Hira kũũk kayawothĩk ngaa nĩcẽ ẽẽth, kĩĩ katĩ kõbõdaĩ thiihit kĩ ngarikowoc kĩ kẽẽt wũ towominto, ĩthõng thĩ, athii kẽnnẽ cĩ ijiowa nẽ ĩnõõnõ natẽ.
21 Ma natẽ, ijin eet õõgĩ natẽ ethek ne, “Ũũk tegemnyiaiti wũ nyekucnyawu wũ baa gõõ aavĩ gõõla Ẽnaĩmĩ ngato ngatdang?”
Ẽdẽcĩ kẽnnẽ eeta neekie ethei ne, “Kothii ngaa cĩ ẽẽn tegemnyiait cĩ nyekucnyawu ngato kũdũt.”
22 Ma natẽ, imiirie Hira ũũk uduwak Yudaa ethek ne, “Athii cĩ kijiowa ngaa nĩcẽ. Ĩthõng naboo uduktiaha baajigi loocu buu athĩ ne, ‘Kothii da gõõ ngaa cĩ ẽẽn tegemnyiait cĩ nyekucnyawu natẽ kũdũt.’ ”
23 Ngaatĩ athĩnnĩ Yudaa ne, “Anyĩk niia kayak nẽ kaal nĩĩkĩ ayak nẽ ẽẽ, avvu katĩ aranniet eeta kaganoko. Ma nẽnnẽ thẽk balna kitionĩha na ĩnõõnõ ẽẽth cĩ dĩcĩ vẽlẽk, athii kẽnnẽ niia cĩ ijiowa ĩnõõnõ.”
24 Ma baa vurtia cĩ nyĩĩlõwẽ iyyio, ikiyyia uduwak eeti ĩmma Yudaa ethek ne, “Ikiyyia naboo kalawanĩ cunnie Tamarĩ ĩthĩ tegemnyiait, ĩthõng yoko anyaawõy nẽ.”
Ĩthõng, ĩthĩ nẽ ne, “Bĩt tugura ĩnõõnõ ngatĩvõrĩ, ĩthõng utuuthu ĩnõõnõ kadaak!”
25 Ma balna ngĩ ayahiay nẽ ngĩtĩvõrĩ, ikiyyia ition nẽ et ĩmma kũũk kuduwak Yudaa kennek ne, “Aritothĩca baatĩ ijjio cĩkkõ,” ĩthõng naboo ĩĩ ne, “Iyieth da niia katĩ ma woccia aga, thiihit kĩ ngarikowoc kĩ tẽlẽẽĩ ijjio cĩk ngẽnẽ cĩkkõ?”
26 Ma natẽ, aga Yudaa ijjio cĩkkõ, ĩthõng ĩthĩ ne, “Aga Tamarĩ thõõth kijiara aneeta, nyatarka balna athii cĩ kaanyi na ĩnõõnõ kitik logoo cannie Thẽẽla.” Ma thĩ baa vurtia cĩnnĩ, ĩthĩnga Yudaa naboo oogin kĩ ĩnõõnõ kũdũt.
27 Ma baa kõr cĩ idiim utuwuay nẽ, ayak balna nẽ cũũdẽ kẽẽngatõ ĩcĩnnĩ.
28 Ma baa ngĩ uukciay nẽ, arahiay kẽnnẽ logoo ĩmma athiiti cĩnnẽ ngĩtĩvõrĩ, ngaatĩ adĩmanĩ ngaa cĩ ũũkca ngaay dõõlĩ looron cĩ merihi, ĩthõng ecebek attia cĩ logoo nĩcẽ ẽẽ, ĩthõng ĩĩ ne, “Aku coo ĩcowu.”
29 Ĩthõng thĩ, balna natẽ tamanoko imiirie athiiti cĩnnẽ ũũk ĩcĩtõ, ĩthõng utuwuay doolec cĩ vurtio ẽẽ, ĩcowu. Ĩthõng ĩthĩ ngaa cĩ ũũkca ngaay dõõlĩ wo ne, “Gõõl cĩ uukcianẽ niia wo coo!” Ĩthõng akatek nẽ ĩnõõnõ thar cĩk athĩ Pẽrẽth.b
30 Ma vurtia, ikiyyia utuwuay gotonia wũ balna ecebothi looronĩ cĩ merihi, ngaatĩ akanẽcĩ nẽ ĩnõõnõ thar cĩk athĩ Thẽẽra.c