Ngonothiok cĩk Yothẽbõ
37
Abaak balna Yokobĩ looca cĩ Kananĩ wũ balna aavẽ baatĩnnẽ Aĩthaĩ.
2 Thoothonniok cĩk Yokobĩ cĩkkõ. Ma balna ngĩ ĩĩtõ Yothẽbõ erkinya cĩgĩnnẽk õmmõtõ kĩ tũrgẽrẽm, ũũwayyi balna nẽ kĩ gõtõõnõgĩ cĩgĩnĩk, lõgõõ cĩk Bĩlha kĩ Thĩlpa, cĩk ẽẽn ngaay cĩk baatĩnnĩ. Ĩthõng thĩ, aku aduwaai nẽ baatĩnnĩ thoothonniok cĩk gerthek vẽlẽk cĩk atican gotoonogua.
3 Ĩthõng balna amĩnan Yokobĩ Yothẽbõ õrrõt kijiar gõtõõnõgĩ õõgĩ, nyatarka arittiay balna Yothẽbõ vurtia cĩ atanganyĩ Yokobĩ õrrõt. Aanyĩk nẽ Yothẽbõ cẽrẽm cĩ dĩhĩmĩ.
4 Kedenyiay kĩĩ ne, logoo cĩnnĩ kir cĩ amĩnan nẽ, ĩthõng thĩ, aaburyiek gotoonogua Yothẽbõ, ĩthõng ĩthĩnga othoothi ĩnõõnõ thõõtha ĩcĩ abũnna.
5 Ma baa kõr ĩmma, uduwak Yothẽbõ gõtõõnõgĩ thõõth cĩ ongonothinie nẽ, ĩthõng aaburyiek kẽnnẽ nẽẽgẽ ĩnõõnõ õrrõt.
6 Ĩthõng ethek nẽ ĩnõõgõ ne, “Anycangũ da kuduwawung na agiitia ngonothinet cannĩ.
7 Kaatĩ baa naaga manatõ, ĩthõng kuluucia mũũrac cĩk labinu. Ĩthõng ma baa tamanoko ĩtĩnga mũũracocĩ cannie, ĩthõng ivitia uluttiothĩk mũũraca cuguk cannĩ, ĩthõng akattiek cuguk kuthungti mũũracoc cannĩ.”
8 Ĩthõng entek gotoonogua ĩnõõnõ ne, “Amui niia dĩdĩ athĩ ne, õkkõ eeni niia alaan, ĩthõng agamnyet ageeta?” Ĩthõng aaburyiek nẽẽgẽ ĩnõõnõ õrrõt kũdũt, nyatarka thõõth wũ baa aduwa nẽ ngonothintia cĩnnĩ.
9 Ĩthõng balna ikiyyia õngõnõthẽ Yothẽbõ naboo, ĩthõng uduwak nẽ gõtõõnõgĩ ethek ne, “Ĩthĩhĩt da ngonothinet cĩ kongonothinie na naboo, ngĩ aku kõr kĩ nyĩĩlok kĩ mũnyũny cĩk ẽẽn õmmõtõ kĩ codoi, ĩthõng ivitia akattieha aneeta kuthungti.”
10 Ma baa ngĩ õkkõ aduwaai nẽ baatĩnnĩ kĩ gõtõõnõgĩ wo, ikiyyia egerenyek baatĩnnẽ ĩnõõnõ ethek ne, “Ngonothinet koccia cĩ õgõõn kuu neccie? Kattĩyya woccia thẽk katĩ naaga kĩ yaaya kĩ gotoonogu ĩĩthõng kivitiaha kakattiei aniitia kuthungti?”
11 Alĩlĩwei kẽnnẽ gotoonogua ĩnõõnõ thõng, ĩthõng ayak kẽnnẽ baatĩnnẽ thõõth nĩcẽ thĩnĩna.
Utuyyiõĩ Yothẽbõ gotoonogua
12 Ootti balna gõtõõnõgĩ Yothẽbõ athaa cĩk baatĩnnĩ gewwua ngatĩ õjõõn kĩ Thẽkẽm,
13 ikiyyia ethek Ĩthraĩlĩ Yothẽbõ ne, “Kĩ cĩ yoko aga niia buu, ũũwa gotoonogu kaal ngatĩ õjõõn kĩ Thẽkẽm ẽẽ, ijjia da yoko kitioni bĩt cĩn ĩnõõgõ.”
Ĩthõng ẽdẽc nẽ ĩthĩ ne, “Ii baang.”
14 Ĩthõng thĩ, ethek baatĩnnẽ ĩnõõnõ ne, “Bĩt cĩn gotoonogu kĩ athaa katĩ ma ngĩ aatĩ jurrung. Ĩthõng õbõda ikiyyia uduwaha aneeta.” Ĩthõng ition nẽ ĩnõõnõ kũũk looria ĩcĩ Hẽbõrõnĩ.
Ma baa ngĩ arawothi Yothẽbõ Thẽkẽm,
15 ikiyyia urumtõy kĩ et ĩmma, ĩthõng ijin eeti neccie ĩnõõnõ ethek ne, “Nyia thĩnõ cĩ adiimi niia wo?”
16 Ẽdẽcĩ kẽnnẽ Yothẽbõ ennei ne, “Kadiimi gõtõõnõga cĩganĩk. Aduwacca koccia ngĩtĩ ẽgẽwĩ nẽẽgẽ kaal cĩgĩk?”
17 Ngaatĩ ẽthẽcĩ eeti neccie ĩnõõnõ ne, “Athii nẽẽgẽ ngato tõõ. Kathĩrari balna na ngĩ õthõõth nẽẽgẽ athĩ ne, ‘Kõõt ĩcĩ looc cĩ Dõthanĩ.’ ”
Ĩthõng ũũk Yothẽbõ õwõb gõtõõnõgĩ, ĩthõng ũmũda ĩnõõgõ looca ĩcĩ Dõthanĩ.
18 Ĩthõng ma baa nga kõdõlan nẽ nginicẽ, ĩcĩnĩt nẽẽgẽ ĩnõõnõ ngatĩ akuni, ĩthõng ĩdĩmantek gõõl cĩ adiim arui ĩnõõnõ.
19 Ĩthõng othoothitõ nyaguana ĩĩtõ ne, “Ĩcĩnĩt da, ikiyyia eeti wũ gõõ ongonothi.
20 Kivitia naaga kuruit ĩnõõnõ, ĩthõng kutduktek duwwua ĩmmanĩ ĩcĩ wuuni duwwuẽnĩy ĩcĩkkõ, ĩthõng kõõt kuduktiak eet õlõõ kentek ne, adak kelegiti cĩ boono Yothẽbõ. Ĩthõng da kĩcĩnĩt katĩ gii cĩ adĩmacet ngonothinetĩ cĩnnẽ ẽẽ.”
21 Ma balna ngĩ athĩrar Ruubenĩ thõõth cĩ adiim arui nẽẽgẽ Yothẽbõ ẽẽ, ikiyyia ẽẽla nẽ ĩnõõnõ. Ngaatĩ ẽnnẽcĩ ĩnõõgõ ne, “Athii woccia cĩ karui naaga ĩnõõnõ thõng.
22 Nyĩ arukcu ĩnõõnõ. Utdukteek ĩnõõnõ duwwua ĩcoo ĩcĩ wuuni cĩ õdõõĩ ngato baatha.” Adiim balna Ruubenĩ ngĩ ẽẽla ĩnõõnõ katĩna vurtia, ĩthõng ũũwĩ ĩcĩ baatĩnnĩ.
23 Ma baa ngĩ arawak Yothẽbõ gõtõõnõgĩ, ĩtĩngathõ gotoonogua, ĩthõng uppuruccia ĩnõõnõ cẽrẽm cĩ dĩhĩmĩ,
24 ĩthõng utdukteek ĩnõõnõ duwwua cĩ õdõõĩ ĩcĩtõ.
25 Ma baa nga aatĩ gõtõõnõgĩ Yothẽbõ loota adiim ngĩ aduwue, ĩcĩnĩt nẽẽgẽ meelitin cĩ eet cĩk Ĩthĩmaĩlĩ avvu ĩcĩ looc cĩ Giliadĩ. Õcõda balna nyaakalnya cĩgĩk, kaal õõgĩ cĩk ẽmẽdẽ kĩ mutulianit kĩ mĩĩra gii cĩ õngõlĩ medi, õvvõ nẽẽgẽ looca ĩcĩ Ijibi.
26 Ikiyyia ethek Yudaa gõtõõnõgĩ ne, “Lõgõth, nyia yoko woccia katĩ cĩ kamũda naaga katĩ ngĩ kuruit gotooniet, ĩthõng kulugunyit biyyie cĩgĩnĩk tõdõway?
27 Kivitia kutuyyiõĩ naaga ĩnõõnõ ĩcĩ eet cĩk Ĩthĩmaĩlĩ wo, kũtũngĩt ngatĩ kadĩmanĩ ĩnõõnõ buth. Ĩthõng naboo ẽẽn nõõnõ nẽ gotooniet cĩnac, odoi baangietĩ.” Ngaatĩ ẽlẽmĩ gotoonogua.
28 Ma balna ngĩ avvu eeta cĩk Ĩthĩmaĩlĩ cĩk ũũtẽnẽ ijjio cĩk avvu looca ĩcĩ Midianĩ wo joonui, õõt utuguryia gotoonogua Yothẽbõ duwwua, ĩthõng utuyyiõĩ ĩnõõnõ ĩcĩ eet cĩk Ĩthĩmaĩlĩ, nyarobinyay ĩcĩk ẽẽn etĩmma cĩk ẽẽn thĩĩk cĩk athĩ kathalkathal. Ngaatĩ õvõyyĩ eeta cĩkkõ Yothẽbõ Ijiba.
29 Ma baa ngĩ õbõda Ruubenĩ duwwua, amũdaai kẽnnẽ athii Yothẽbõ natẽ tõõ, avarac nẽ, ĩthõng ẽrẽc ceremua cĩgĩnĩk.
30 Ma natẽ, ũũk uduwak nẽ gõtõõnõgĩ ethek ne, “Athii Yothẽbõ tõõ. Kogooni woccia yoko thẽk na kuu?”
31 Ngaatĩ thĩ agurrianĩ gotoonogua ẽẽth ĩmma, ĩthõng apahit kĩĩ kuvuddik biyyie cẽrẽm cĩ Yothẽbõ.
32 Ma natẽ, ivitia ayaktothĩk cẽrẽm nĩcẽ baatĩnnĩ, ĩthõng entek ne, “Kamũdana balna naaga cẽrẽm coo thõng, cĩn da katĩ ma ngĩ ẽẽn cẽrẽm cĩ ngeruni.”
33 Ĩthõng balna aga Yokobĩ ngatĩ ẽnnẽ cẽrẽm cĩ Yothẽbõ, ĩthõng ĩthĩ nẽ ne, “Cẽrẽm cĩ ngẽrnanĩ cannĩ coo! Adaheha bẽrẽ kelegiti cĩ boono ĩnõõnõ. Ẽdẽca bẽrẽ kelegiti cĩ boono Yothẽbõ dĩdĩ.”
34 Ngaatĩ ẽrẽẽcĩ Yokobĩ ceremua cĩgĩnĩk, ĩthõng itihim ceremua cĩk uluanak, ĩthõng utulu ngẽrĩnĩ iinyia cĩk meelĩk.
35 Avvu balna doolia cĩgĩnnẽk vẽlẽk cĩk maacĩk kĩ cĩk ngayyik agam ĩnõõnõ uluana, abũrĩ kẽnnẽ nẽ ngatĩ agamĩ doolia ĩnõõnõ athĩna. Athĩ kẽnnẽ balna nẽ ne, “Athii tõ, kalu katĩ doolec cannĩ gii ma ngĩ kadaaha kadawothĩk na buu look.” Ngaatĩ thĩ baa alue Yokobĩ ngẽrĩnĩ cĩnnĩ.
36 Monogo nẽnnẽ da baa utuyyiõĩ eeta cĩk looc cĩ Midianĩ Yothẽbõ Ijiba ĩcĩ et cĩ athĩ thar Potivar. Ẽẽn balna nẽ gaalinit cĩ bekciok cĩk alaanak.