50
Ma balna natẽ ithianaĩ Yothẽbõ utulu kĩĩ karabũt baatĩnnĩ, ĩthõng ũcũcũwa.
2 Ma vurtia, ikiyyia uduwak Yothẽbõ akĩĩmẽt cĩk gõõ aticanothi ĩnõõnõ, kivitia kõõt kẽtẽcõ kẽẽng cĩ baatĩnnĩ Ĩthraĩl, ĩthõng ũtũũnyĩtõ kẽgẽrõy ĩcĩk athii cĩ anyi ĩnõõnõ kummu tamanoko.
3 Adĩman balna akĩĩmẽta tiic coo wathinniok eet ramma. Ĩthõng thĩ, utuluthõ balna eeta cĩk Ijibi Yokob wathinniok eet iyyio kõmmõtõ.
4 Ma balna mĩ edecciay wathinniowa cĩk uluanak, ũũk ala Yothẽbõ gaala cĩk kõrõõk cĩ alaano ethek ne, “Mĩ thẽk amannĩcangũ, õõt uduktiahiangũ alaan entek ne,
5 ‘Anya balna aneeta baangĩ kũbũtan kõngan. Ennecca nẽ aneeta ne, “Kidiima na kadaaha, bĩt dawa niia aneeta ngiloma cĩ dawintio looca cĩ Kananĩ.” Ma ngĩ ẽlẽmahia aneeta alaanĩ ngatĩ kõkõyyẽ, kõkkõ thĩ katĩ kõbõda na.’ ”
6 Ma balna natẽ, ẽdẽc alaanĩ Yothẽbõ ethek ne, “Bĩtõ, bĩt daa baaba, kĩ balna ma ngĩ ennecci nẽ aniitia ne, bũtan, ĩthõng ĩdĩmanu ẽẽ.”
7 Ngaatĩ ĩngannĩ Yothẽbõ õkkõ ammũtĩ baatĩnnĩ. Ition balna ĩnõõnõ gaala cĩk alaanak vẽlẽk, makayyiok cĩk kõrõõk cĩnnĩ kĩ makayyiok cĩk looc cĩ Ijibi vẽlẽk,
8 alũnganni balna eeta cĩk kõrõõk cĩ Yothẽbõ vẽlẽk, kĩ gõtõõnõgĩ, kĩ eet cĩk kõrõõk cĩ baatĩnnĩ. Uungnothi balna doolia cĩgĩk kĩ kaal dõ looca ĩcĩ Gõthẽnĩ.
9 Iriok balna Yothẽbõ kĩ eet cĩk amacuc nyangõlẽnya kĩ kaal cĩk õgõõn kĩ toromilẽta wũk gõõ agurut nyangõlẽnya, ĩthõng mẽẽlĩ balna eeta cĩk iriok kĩ ĩnõõnõ ẽẽ, õrrõt.
10 Ma balna ma ngĩ õdõlanit nẽẽgẽ kilongoni nginiwa ĩcĩ athĩ Atad ngatĩ õjõõn kĩ Lĩĩl cĩ Yordanĩ, ivitia utuluthõ nẽẽgẽ õrrõt wuciitha, ma natẽ ikiyyia arĩk Yothẽbõ ulua cĩ wathinniok tũrgẽrẽm cĩ alue baatĩnnĩ.
11 Ma balna ngĩ acĩn eeta cĩk Kananĩ ĩnõõgõ ngatĩ aatẽ uluana kilongona cĩ Atadĩ, atanathõ ĩĩtõ ne, “Lõgõth ayak eeta cĩk Ijibi ulua cĩ obbi õrrõt.” Ĩnõõnõ thĩ cĩ akanõthĩcẽ ngĩtĩ õjõõn kĩ Yordan wo, thara cĩk athĩ Abẽl Mĩthraima wo.
12 Ngaatĩ õvvõ adĩmanĩ lõgõõ cĩk Yokobĩ wo kĩ balna thẽk mĩ aduwaai nẽ ĩnõõgõ.
13 Ngaatĩ õdõngĩ nẽẽgẽ ĩnõõnõ õvõyyĩ ĩcĩ looc cĩ Kananĩ, ĩthõng õõt adaacõ ĩnõõnõ ngiloma cĩ mana cĩ Makpẽla, ngatĩ õjõõn kĩ Mamrẽ, nginiwa wũ balna ũũta Abrahamĩ ĩcĩ Evronĩ et cĩ ẽẽn Hiit, kĩ mana vẽlẽk.
14 Ma vurtia ĩcĩ ummutti nẽẽgẽ baatĩnnĩ vẽlẽk, ivitia imiiryie Yothẽbõ kĩ gõtõõnõgĩ õõt Ijiba kĩ eet vẽlẽk wũk balna ition ĩnõõnõ kõõt kũmũtĩt baatĩnnĩ.
Otongollie gõtõõnõgĩ Yothẽbõ ĩnõõnõ
15 Ma balna vurtia cĩ daaĩth cĩ Yokobĩ, ivitia ummuit gõtõõnõgĩ Yothẽbõ ĩĩtõ ne, “Aavĩ koccia katĩ Yothẽbõ, ĩthõng ahadaet thoothonniok wũk gerthek wũk balna kadĩmanĩ naaga ĩnõõnõ buth, ĩthõng aabureheta?”
16 Ngaatĩ õkõlẽcĩ nẽẽgẽ Yothẽbõ thooc ẽthẽcĩ ne, “Aduwacet balna ageeta baaba balna nga arũgĩ enneccet ne,
17 ‘Thõõth cĩ katĩ aduwaccu niigia Yothẽbõ coo. Entek ne, kathĩ na ne, Tũngek niia thoothonniok wũk balna adĩmaneci gotoonogu aniitia buth.’ Tũngehet baai thẽk ageeta ticcianniok cĩk Nyekuc cĩ baaba.” Ma balna ngĩ õdõlan nyemut coo Yothẽbõ wo, ikiyyia akatĩ nẽ ulua.
18 Ma tamanoko, ivitia gõtõõnõgĩ Yothẽbõ uukti eleeti cĩgĩk looc kẽbẽrẽnĩy cĩgĩnĩk, ĩthõng entek ne, “Kiittia naaga nyakapanak cugunik.”
19 Ẽdẽcĩ kẽnnẽ Yothẽbõ ĩnõõgõ ethei ne, “Nyĩ ongolinangũ. Keeni woccia na Nyekuc cĩ kuukcunga?
20 Adĩmannangũ balna niigia aneeta buth dĩdĩ, ũũwũ kẽnnẽ Nyekuci thõõth nĩcẽ kĩĩ thõõth cĩ abũnna cĩ kẽẽlanẽ eet cĩk meelĩk kĩ yoko ngĩ adĩman nẽ wo.
21 Nyĩ omothinu, kathunnung katĩ na agiitia kĩ dõõlĩ cuguk vẽlẽk.” Ma baa ngĩ uduwak Yothẽbõ gõtõõnõgĩ thõõth coo, ĩĩ mayyẽ thinneti cĩk gõtõõnõgĩ cĩgĩnĩk.
Daaĩth cĩ Yothẽbõ
22 Abaak balna Yothẽbõ Ijiba, kĩ gõtõõnõgĩ gii baa ngĩ, adaak nẽ baa ngĩ, ĩĩtõ erkinya cĩgĩnnẽk, eet tur kõmmõtõ (110),
23 ĩthõng ĩcĩn nẽ dõõlĩ cĩk dõõlĩ cĩk dõõlĩ cĩk Evraimi. Ĩthõng ayak Manathi ngẽrtĩ Yothẽbõ ngẽrĩnĩ cĩ athĩ Makĩr. Ĩthõng ẽlẽm Yothẽbõ dõõlĩ cĩk Makĩrĩ kĩĩtõ cĩgĩnĩk.
24 Baa nga kadaak Yothẽbõ, uduwak nẽ gõtõõnõgĩ ethek ne, “Aku katĩ ellung Nyekuci agiitia, ĩthõng ikiyyia uuwung looca wũ balna abũtaneei nẽ õõ Abrahamĩ, Aĩthak kĩ Yokob.”
25 Ĩthõng anyĩk Yothẽbõ lõgõõ cĩk Ĩthraĩlĩ kũbũtanit kĩĩtõ ne, “Aku katĩ ellung Nyekuci agiitia, ĩthõng ayaktu niigia ammẽ cĩganĩk looca coo, ĩthõng oottu.”
26 Ngaatĩ adaaknĩ Yothẽbõ Ijiba baa ngĩ ĩĩtõ erkinya cĩgĩnnẽk eet tur kõmmõtõ (110). Ma balna ngĩ ẽtẽẽcõ akĩĩmẽta kẽẽng cĩnnĩ, ĩthõng ũtũũnyĩtõ kẽgẽrõy ĩcĩk gõõ anyi et kithii cĩ ammu tamanoko ẽẽ, ĩdĩmta aryik ẽlẽ cĩnnĩ nyethuduwoca Ijiba.