Imiirie Yokobĩ ũũk Bethela
35
Ngaatĩ aduwacĩ Nyekuci Yokob ẽthẽcĩ ne, “Tĩnga miirie bĩt Bethela, ĩthõng etengenyu ngĩtĩ otodongothĩcẽ Nyekuc natẽ nginiwa wũ baa kalibaci na aniitia, baa ma ngĩ aviri niia ĩcĩ gotononu Ethau. Tẽngẽny kõrõõk cunni natẽ.”
2 Ma baa natẽ, uduwak Yokobĩ eet cĩk kõrõõk cĩnnĩ vẽlẽk kĩ wũk iriok kĩ ĩnõõnõ ethek ne, “Ũtũngtek kaal cĩk aryu niigia kĩĩtõ nyekucnya cuguk koo, ĩthõng ũtũngtek thoothonniok cuguk cĩk gerthek, ĩthõng itihimtu ceremua cĩk dĩhĩmĩk.
3 Ĩthõng katĩ vurtia, kõvvõ katĩ naaga Bethela. Kengenyeti katĩ na ngĩtĩ kõtõdõngõthĩcẽ na Nyekuc natẽ, wũ balna athĩhĩ nẽ lawinit cannĩ baa ma ngĩ kapĩrna na, ĩthõng aavĩ dõõkĩthĩ tõõna ĩcannĩ.”
4 Ngaatĩ anyĩcẽ nẽẽgẽ vẽlẽk Yokob kaal cĩk aar nẽẽgẽ kĩĩtõ nyekucnya ẽẽ, kĩ kaal cĩk kiinu, ĩthõng adaweek Yokobĩ kẽẽta vurtia ngatĩ õjõõn kĩ kõrõõk cĩ gaalawu cĩ Thẽkẽmĩ.
5 Ma baa ngĩ ĩtĩngathõ Yokobĩ kĩ dõõlĩ cĩgĩnĩk, anyĩk balna Nyekuci eet cĩk korookjiok cĩk gaalawu kotongollie ĩnõõgõ, ĩthõng athii eeti ĩmma cĩ õwõb ĩnõõgõ tõõ.
6 Ma baa natẽ, ivitia õdõlanit Yokobĩ kĩ eet cĩk kõrõõk cĩnnĩ vẽlẽk ngĩtĩ athĩ Luuth looca cĩ Kananĩ. Athĩ thar õõgĩ cĩk Luuthi Bethel.
7 Ĩthõng baa ẽtẽngẽny Yokobĩ ngĩtĩ otodongothĩcẽ nẽ Nyekuc natẽ, ĩthõng akatek thar cĩk athĩ, El Bethel,a nyatarka ngĩtĩ balna alibacĩ Nyekuci ĩnõõnõ Bethela kõr wũ balna aviri nẽ ĩcĩ Ethau.
8 Ma baa ngĩ aatĩ nẽẽgẽ natẽ, adaak Debora ticciannioiti cĩ Rẽbẽka, ĩthõng adayyiek nẽẽgẽ ĩnõõnõ kẽẽta vurtia joonui Bethela, ĩthõng akattiek nẽẽgẽ nginicẽ thar cĩk athĩ ne, Alon Bacuth.b
9 Ma baa ngĩ õbõda Yokobĩ Paddan Arama, ikiyyia ilibak Nyekuci ĩnõõnõ naboo ngaatĩ agatanĩ ĩnõõnõ.
10 Ma natẽ, ethek Nyekuci ĩnõõnõ ne, “Athinni aniitia thar Yokob, ĩthõng thĩ, yoko ĩthĩnga katĩ athinni aniitia thar Yokob, athĩ katĩ thar cugunik Ĩthraĩl.” Ngaatĩ thĩ akanẽcĩ Nyekuci ĩnõõnõ thar cĩk athĩ Ĩthraĩl.
11 Ĩthõng ethek Nyekuci ĩnõõnõ ne, “Aneeta Nyekuc cĩ Tiiri cĩ Ijiar vẽlẽk, tirria dõõlĩ cĩk meelĩk. Arittia katĩ niia eet cĩk loociok cĩk meelĩk, ĩthõng avvu katĩ arittiay alaanẽta ẽla cunni.
12 Kaanyi katĩ na aniitia looc wũ balna kaanyi õõ Abrahamĩ kĩ Aĩthak, ĩthõng naboo katĩ kaanyĩha dõõlĩ cĩk dõõlĩ cugunik buu vurtia cunni.”
13 Ngaatĩ thĩ baa õkõyyĩ Nyekuci tammuatiddina nginiwa wũ balna õthõõthõnẽ nẽ kĩ ĩnõõnõ.
14 Ma natẽ, ĩdĩma Yokobĩ bĩĩ, ĩthõng arĩk kĩbĩl nginiwa wũ baa õthõõthõnẽ nẽ kĩ Nyekuc, ĩthõng utduutik ngooroc kĩ mẽrtẽ laaraba.
15 Ngaatĩ akanẽcĩ Yokobĩ ngĩtĩ baa õthõõthõnẽ nẽ kĩ Nyekuc ẽẽ, ẽthẽcĩ ne, Bethel.
Daaĩth cĩ Racẽlĩ
16 Ma baa ngĩ ĩtĩngathõ Yokobĩ kĩ dõõlĩ cĩgĩnĩk Bethela, baa nga rẽẽntĩ nẽẽgẽ gõõla cĩ õkkõ cĩ Evrathĩ, aamẽẽ Racẽlĩ idiim ngĩ utuwuay, ĩthõng awuci kẽnnẽ kẽẽng õrrõt.
17 Ma baa ngĩ aamnyi nẽ õrrõt wo, ikiyyia ethek ngaa cĩ ũũkca ĩnõõnõ wo ne, “Nyĩ ongollie, ayahai niia logoo ĩmma.”
18 Ma balna ngĩ nga akudan Racẽlĩ, uduwa nẽ thõõth codoi doo cĩ athĩ ne, “Athĩ logoo cannĩ thar Ben Oni.”c Aku kẽnnẽ akaneei Yokobĩ doolec thar cĩk athĩ Benyamin.d
19 Ma balna ngĩ adaak Racẽlĩ, ivitia adaacõ eeta ĩnõõnõ gõõla ĩcĩ õkkõ ĩcĩ kõrõõk cĩ gaalawu cĩ Evrathĩ, cĩ athĩ thar õõgĩ Bẽtẽlẽhẽm.
20 Ma natẽ, adaweek Yokobĩ bicioit ĩmma kĩbĩl mũrũũr, bĩĩyẽnĩy ĩcĩk adawini Racẽlĩ. Ĩthõng kĩĩ itin coo nga ẽyẽla bicioiti neccie bĩĩyẽn cĩk Racẽlĩ.
21 Ngaatĩ õkõyyĩ Yokobĩ wũ balna athĩ thar Ĩthraĩl naboo, ĩthõng ũũk ẽtẽngẽny nẽ tuggu cĩnnĩ ĩcĩ owu ngatĩ athĩ thar Mĩgdal Ẽdẽr.
22 Ma baa nga abaak nẽ looca nĩcẽ, ĩtĩnga Ruubenĩ ũũk ĩtdõõl Bĩlha ngaa cĩ baatĩnnĩ. Ĩthõng ĩthĩk Yokobĩ thõõth coo.
Lõgõõ cĩk Yokobĩ
Ayak balna Yokobĩ lõgõõ cĩk maacĩk õmmõtõ kĩ ramma.
23 Athĩ lõgõõ cĩk Lẽha, thar cĩgĩk Ruuben wũ ẽẽn abuu, Thimion, Levi, Yudaa, Ithacar kĩ Thebulun.
24 Athĩ lõgõõ cĩk Racẽlĩ, thar cĩgĩk Yothẽbõ kĩ Benyamin.
25 Athĩ lõgõõ cĩk Bĩlha ticciannioit cĩ Racẽlĩ, thar cĩgĩk Daan kĩ Navtali.
26 Athĩ lõgõõ cĩk Thĩlpa ticciannioit cĩ Lẽha, thar cĩgĩk Gad kĩ Athẽr.
Lõgõõ cĩk Yokobĩ cĩkkõ, wũk balna arittiay looca cĩ Paddan Aramĩ.
27 Ma baa natẽ, ikiyyia ũrũbothĩk Yokobĩ baatĩnnĩ Aĩthak Mamrẽa ngatĩ õbõwõy kĩ Kiriath Arba ngatĩ balna abaaĩ Abrahamĩ kĩ Aĩthak. Athĩ Kiriath Arba thar õõgĩ Hẽbõrõn.
28 Arũgĩ balna Aĩthaĩ erkinya cĩk ẽẽn eet tur kĩ eet wec (180).
29 Ma balna ngĩ atangany Aĩthaĩ õrrõt, ĩthõng adaak adaacõ ĩnõõnõ doolia cĩgĩnnẽk Ethau kĩ Yokob.