Ĩtdany eeti Diina aar kĩĩ ngaa cĩnnĩ
34
Ẽẽn balna Diina bũwanyĩnĩ Lẽha wũ balna arittia Yokobĩ, õkkõ balna nẽ eheronothi ngaay wũk abaak natẽ.
2 Ma balna ngĩ acĩn Thẽkẽmĩ Diina wo, agam ĩnõõnõ kĩĩ kĩtdany. Ẽẽn Thẽkẽmĩ ngẽrtĩ Hamõrĩ, ĩthõng ẽẽn et cobbi cĩ looc cĩ eet cĩk ẽẽn Hivit
3 Itiawak thĩnĩn cĩnnẽ Diina dõõ cĩ Yokobĩ, ĩthõng ĩmĩnan nẽ doolec, ĩthõng othoothĩk ĩnõõnõ jurrung.
4 Ĩthõng uduwak Thẽkẽmĩ baatĩnnĩ Hamõr ennek ne, “Tĩhaha aneeta doo cio kĩĩ ngaa cannĩ.”
5 Ma baa ngĩ athĩhĩ Yokobĩ thõõth cĩ ẽgẽrẽthanini doo cĩnnẽ Diina ẽẽ, aatĩ balna lõgõõ cĩgĩnnẽk bõõnatõ kaalĩy. Ẽlẽmanõõĩ thĩ nẽ thõõth coo ngaatĩ avvunni lõgõõ cĩgĩnnẽk kõrõõk.
6 Ma balna natẽ, ũũk Hamõrĩ baatĩ Thẽkẽmĩ othoothiõy kĩ Yokob.
7 Avvu kẽggẽ lõgõõ cĩk Yokobĩ tiica, ma baa ma ngĩ athĩhĩ nẽẽgẽ thõõth cĩ ĩtdanyinie ngoonia cĩnĩng, ivitia nẽẽgẽ õngõngõcõ, ĩthõng avaracitõ õrrõt, nyatarka ĩdĩmanek Thẽkẽmĩ thõõth cĩ ẽẽn ngõryathẽt eet cĩk Ĩthraĩlĩ, thõõtha ĩcĩ ĩtdanyĩ doo cĩ Yokobĩ, thõõth cĩ koccia athii cĩ adĩmanni.
8 Ĩthõng thĩ, uduwak Hamõrĩ Yokob kĩ lõgõõ cĩgĩnĩk, ethek ne, “Amĩnan ngẽrnannie Thẽkẽmĩ Diina. Anycihiangũ baai kitik.
9 Anycetu yoko niigia dõõlĩ cuguk kitiktia naaga, ĩthõng cĩgaak itihit cuguk.
10 Kotholit naaga kĩ agiitia looc coo. Abaait niigia jurrung, ũtẽc ijjio cĩk adiimnyu, ĩthõng abaaktu ngato.”
11 Ĩthõng uduwak Thẽkẽmĩ baatĩnnĩ kĩ gõtõõnõgĩ Diina ethek ne, “Ẽlẽmtangũ niigia aneeta, ĩthõng kaanyung katĩ na agiitia kaal cĩk ajinnu niigia wo.
12 Ijinit kaal cĩk adiimnyu niigia cĩk tihẽntak, ma ngĩ mẽẽlĩ buu kothii thõõth ĩmma. Kadĩmani katĩ na gii vẽlẽk, anycangũ nẽnnẽ niigia aneeta doolec kitiwu.”
13 Nyatarka thõõth wũ balna ẽgẽrẽthanĩ Thẽkẽmĩ ngõõnĩ cĩnĩng Diina, ma balna natẽ othoothitõ lõgõõ cĩk Yokobĩ ngatĩ ĩgõõlĩ Thẽkẽm kĩ baatĩnnĩ Hamõr.
14 Ĩthõng entek nẽẽgẽ ĩnõõgõ ne, “Athii woccia cĩ kẽlẽmania naaga ngõõna kitik eeti cĩ ngaanĩ kẽtẽdẽ ẽlẽ. Ẽẽn woccia coo ngawani cobbi õrrõt kĩ ageeta.
15 Aavĩ thõõth codoi doo cĩ kadiimnya naaga kaduwaccung agiitia. Mĩ eteddu niigia eleeti cĩk lõgõõ cuguk cĩk maacĩk vẽlẽk, kaanycung thĩ katĩ naaga ĩnõõnõ itihit.
16 Kĩĩ katĩ thĩ kaanycung naaga agiitia dõõlĩ cĩgaak cĩk ngayyik, ĩthõng koottia naaga buu cuguk. Ĩthõng kũrũmtẽ katĩ naaga kĩ agiitia kõdõwẽ kĩĩtõ eet cĩk looc codoi.
17 Ĩthõng thĩ, ma ngĩ athii niigia cĩ elemu ngatĩ eteddu niigia eleeti cuguk, kayakca katĩ naaga ngooniet cĩnang, ĩthõng koottia.”
18 Elemit balna Hamõrĩ kĩ ngẽrĩnĩ Thẽkẽm thõõth coo.
19 Ĩthõng balna amĩnan eeta Thẽkẽm õlõõtõtõ cĩnĩng, ĩthõng balna atalĩ Thẽkẽmĩ ngatĩ adĩmanĩ nẽ thõõth cĩ aduwa nẽẽgẽ ẽẽ, nyatarka balna amĩnan nẽ Diina.
20 Ĩthõng thĩ, balna irioit Hamõrĩ kĩ ngẽrĩnĩ Thẽkẽm õõt araana ĩcĩ obbi cĩ kõrõõk cĩ gaalawu kõõt kothoothiõy kĩ eet cĩk obbitik.
21 Athĩ nẽẽgẽ ne, “Ẽẽn eeta cĩkkõ eet cĩk abũnna õrrõt, kabaait kõdõwẽ, ĩthõng kutuyyiõy jurrung kĩĩ kitihit nẽẽgẽ dõõ cĩgaac, ĩthõng kitihit naaga cĩgĩk. Maka lõõcĩ coo awũpannet ageeta kĩ ĩnõõgõ buu.
22 Ĩthõng thĩ, avvu katĩ ẽlẽmĩ eeta cĩkkõ kivitia kaavut kõdõwẽ, thõõtha codoi doo ĩcĩ woccia kabũũranini naaga vẽlẽk cĩk maacĩk kaavut kĩ ĩnõõgõ.
23 Yoko ma kĩdĩmanit ketee, athii woccia katĩ cĩ ẽẽn kaala cĩgĩk vẽlẽk cĩgaac? Kelemit thẽk naaga thõõth cĩnĩng wo, ĩthõng kabaaitõ kĩ ĩnõõgõ kõdõwẽ.”
24 Ma natẽ, ivitia elemit eeta wũk ẽhẽẽt ngatĩvõrĩ araana ĩcĩ obbi cĩ kõrõõk cĩ gaalawu vẽlẽk muwẽẽnĩt cĩ aduwaai Hamõrĩ kĩ Thẽkẽm wo, ngaatĩ ẽtẽẽdĩ eeta cĩk maacĩk vẽlẽk eleeti cĩgĩk.
25 Ma baa vurtia cĩ wathinniok iyyio ĩcĩ eteddi nẽẽgẽ eleeti vẽlẽk, ĩthõng ngaanĩ ẽcẽrẽt eleeti, ivitia lõgõõ cĩk Yokobĩ rammak, Thimion kĩ Levi gõtõõnõgĩ Diina kir nyetubanya cĩgĩk, ĩthõng uuktõy kĩ ĩnõõgõ, ĩthõng õõt ĩnĩktõthĩk kõrõõk cĩ gaalawu, ngaatĩ arui eet cĩk maacĩk vẽlẽk.
26 Uruit balna nẽẽgẽ Hamõr kĩ ngẽrĩnĩ Thẽkẽm, ĩthõng ootti Diina ciitha cĩ Thẽkẽmĩ, kĩĩ kõõt.
27 Ma balna ngĩ ivitia õdõlanit logoolia cĩk Yokobĩ ngĩtĩ adaaknĩ eeta ẽẽ, õõt ẽbẽlanit kõrõõk cĩ gaalawu ngini wũ balna ĩtdanyĩ Thẽkẽmĩ ngõõnĩ cĩnĩng ẽẽ.
28 Õõt ĩngĩdĩt nẽẽgẽ athaa kĩ ẽẽtha, tĩĩna kĩ thigirie õlõõ cĩ gaalawu kĩ ijjio vẽlẽk cĩk aatĩ looca nĩĩcẽ.
29 Ma baa ngĩ ootti nẽẽgẽ balinit cĩnĩng kĩ ngaay kĩ dõõlĩ cĩgĩk vẽlẽk, ũlũnganit ijjio buu vẽlẽk cĩk amũda nẽẽgẽ ciithẽnẽy ĩcĩtõ.
30 Ĩthõng ethek Yokobĩ Thimion kĩ Levi ne, “Ĩcĩnĩt da ayaktahangũ niigia aneeta gerthetin kĩ eet cĩk ẽẽn Kanan kĩ eet cĩk ẽẽn Perithit, eet cĩk abaak looca ĩcoo wo. Keeginna naaga dĩcẽ, ĩthõng ma ngĩ ũrũmtẽ nẽẽgẽ, ĩthõng aaburyieha aneeta, ĩthõng uukta, kedeciana katĩ na kĩ kõrõõk cannĩ vẽlẽk.”
31 Ẽdẽcĩ kẽggẽ nẽẽgẽ ĩnõõnõ ethei ne, “Abũnna ma ngĩ aar nẽ ngõõna cĩnang kĩĩ tegemnyiait?”