Urumtõy Yokobĩ kĩ gõtõnĩ
33
Ma baa kõr cĩ arumone Yokobĩ kĩ Ethau, iriowa balna Ethau kĩ eet cĩk maacĩk cĩk ẽẽn eet etĩmma. Ĩthõng anyĩk Yokobĩ dõõlĩ kõtõõthõ kĩ ngaagĩ cĩgĩk Lẽha kĩ Racẽl kĩ ngaay cĩgĩnĩk cĩk ẽẽn ticcianniok ramma.
2 Ition nẽ ticcianniok wũk ẽẽn ramma Thĩlpa kĩ Bĩlha, kutuwuantẽĩ nẽẽgẽ kõdõwẽ kĩ dõõlĩ cĩgĩk, kĩĩ kõwõb Lẽha kĩ dõõlĩ cĩgĩnĩk, kĩĩ thĩ naboo kõwõb Racẽlĩ kĩ Yothẽbõ.
3 Uwuantẽcĩ balna Yokobĩ, ĩthõng ulul õõ ngõnana tũrgẽrẽm baa ngĩĩ nẽ õjõõn kĩ gõtõnĩ.
4 Avira kẽnnẽ Ethau kikiyyia karabũt Yokob, ĩthõng ĩthaa ĩnõõnõ õrrõt talintia, ĩthõng utuluthõ nẽẽgẽ vẽlẽk.
5 Ma natẽ, ĩcĩn Ethau ngaay kĩ dõõlĩ, ĩthõng ijin gõtõnĩ ethek ne, “Cĩk ngẽnẽ ngaay cĩkkõ kĩ dõõlĩ cĩkkõ cĩk iriowanu kĩ aniitia wo?”
Ẽdẽcĩ Yokobĩ ethei ne, “Ẽẽn cĩkkõ dõõlĩ cĩk balna anya Nyekuci mĩnanintia cĩnnĩ ticciannioit cunni wo.”
6 Ngaatĩ thĩ avvunni ngaay rammak wũk ẽẽn ticcianniok kĩ dõõlĩ cĩgĩk vẽlẽk, ĩthõng ululliek nẽẽgẽ ooti Ethau.
7 Ma natẽ, õwõbẽĩ Lẽha kĩ dõõlĩ cĩgĩnĩk ivitia ulullie. Ma vurtia cĩnĩng, ivitia ulullie Racẽlĩ buu kĩ Yothẽbõ.
8 Ĩthõng balna natẽ, ijin Ethau Yokob ethek ne, “Nyia cĩ angĩdacca kaal cĩk meelĩk kurumtõy kĩ aneeta wo?”
Ẽdẽcĩ kẽnnẽ Yokobĩ ethei ne, “Makayyioit cannĩ, kitiona na ĩnõõgõ, kĩĩ katĩ ĩthĩ niia gõõna cannĩ.”
9 Ẽdẽcĩ kẽnnẽ Ethau ethei ne, “Gõtõna, kayai na kaal cĩk meelĩk õrrõt. Thũũtĩ niia kaal cugunik koo.”
10 Ẽdẽcĩ kẽnnẽ Yokobĩ athĩ ne, “Athii tõ, lẽm niia kaal cĩkkõ kĩĩ yelinit cĩ gõõnĩthẽt cannĩ. Ĩthõng yoko ẽlẽma niia aneeta õlõõ cunni, ĩthõng kĩcĩna na nguum cunni, õgõõn balna kĩ cĩ kacini na cĩ Nyekuco.
11 Abũnna balna Nyekuci ĩcannĩ, ĩthõng kayaha na kaal vẽlẽk. Lẽm baai thẽk anyinit cĩ kayahaci na wo.” Ĩthõng balna alna Yokobĩ ĩlaleei ĩnõõnõ kuumuc, ĩthõng ẽlẽm Ethau.
12 Ĩthõng ĩthĩ Ethau ne, “Kĩdĩmantothĩk da kõõ, kiiriok katĩ na kĩ aniitia.”
13 Ĩthõng thĩ, ethei kẽnnẽ Yokobĩ ĩnõõnõ ne, “Makayyioit cannĩ, aga niia addi wueet dõõlẽnĩy, ĩthõng naboo kathũnnẽ athaa cĩk awurtie kĩ tĩĩn cĩk awurtie. Ma ngĩ kangidi na ĩnõõgõ õrrõt kõr codoi, adaaĩ katĩ kaala vẽlẽk.
14 Makayyioit cannĩ, ĩthĩnga yoko te thĩ niia uwuantẽcẽ nyia, ĩthõng anya aneeta ticciannioit cunni wo, kẽtdẽmtdẽmtaha kĩ dõõlĩ, athaa, kĩ tĩĩn kĩdĩĩc, kĩ meelitin cĩ eetu, karumõy katĩna naboo looca cĩ Thẽĩrĩ.”
15 Ẽdẽcĩ kẽnnẽ Ethau ĩnõõnõ ethei ne, “Nya thĩ kũtũngẽẽĩ eet cĩganĩk koo õõgĩ.”
Ẽdẽcĩ Yokobĩ ethei ne, “Nyia dĩman ketee wo? Nya thĩ thẽk aneeta kũmũda mĩnan kẽbẽrẽnĩy ĩcugunik makayyioit cannĩ.”
16 Ngaatĩ amiirẽnẽ Ethau õkõyyĩ ngatĩ athĩ Thẽĩr.
17 Ma thĩ balna natẽ ũũk Yokobĩ ngatĩ athĩ Thukoth, ĩthõng ẽtẽngẽny ciith cĩnnĩ kĩĩ kũlũk boore cĩ kaal cĩgĩnĩk. Ĩnõõnõ thĩ cĩ akanõthĩcẽ nginicẽ thara cĩk athĩ Thukotha wo.
Õdõlan Yokobĩ Thẽkẽm
18 Ma baa ngĩ ĩtĩnga Yokobĩ looca cĩ Paddan Aramĩ, ikiyyia õdõlan nẽ kõrõõk cĩ gaalawu Thẽkẽm jurrung looca cĩ Kananĩ, ĩthõng ẽtẽngẽny kõrõõk cĩnnĩ kabanyca ĩcĩ kõrõõk cĩ gaalawu.
19 Ĩthõng thĩ, balna ũtũwa Yokobĩ ngĩtĩ engenycini nẽ ẽẽ, ĩcĩ lõgõõ cĩk Hamõrĩ cĩ ẽẽn baatĩ Thẽkẽmĩ nyarobinyay ĩcĩk ẽẽn eet tur cĩk ẽẽn thĩĩk cĩk athĩ kathalkathal.
20 Ma natẽ, ikiyyia ẽtẽngẽny nẽ ngĩtĩ todongintio natẽ, kĩĩ kũtũvvũ nginicẽ kethek ne, El Elohe Ĩthraĩl.b