Itionĩk Yokobĩ gõtõnĩ anyintiok
32
Ma balna ngĩ ũũk Yokobĩ buu gõõla cĩnnĩ, ikiyyia urumtõy nẽ kĩ anjĩlẽt cĩk Nyekucak gõõla.
2 Ma balna ngĩ acĩn Yokobĩ ĩnõõgõ wo, ikiyyia umuk ĩthĩ ne, “Ngĩtĩ aavẽ Nyekuci coo.” Ngaatĩ akanẽcĩ nginicẽ thar cĩk athĩ, Mahanaim.a
3 Ma natẽ, ition Yokobĩ tionniak cĩgĩnĩk ĩcĩ owu kõõt kĩcĩnĩt gõtõnĩ cĩnnĩ Ethau looca cĩ athĩ Thẽĩr, cĩ naboo athĩ Ẽdõm.
4 Ĩthõng uduwak nẽ ĩnõõgõ ethek ne, “Õõt uduktiak makayyioit cannĩ Ethau entek ne, ‘Aneeta Yokob ticciannioit wunni wũ balna karũmẽna kĩ Laban kĩĩ itin coo.
5 Kayaha na tĩĩna, ẽẽtha, thigirie kĩ ticcianniok cĩk ngayyik kĩ cĩk maacĩk. Ĩthõng kitionii yoko na makayyioit cannĩ nyemut coo, kĩĩ katĩ kũmũda na avuthit cĩ abũnna kẽbẽrẽnĩy ĩcugunik.’ ”
6 Ma balna ngĩ oboddia tionniaha õõt ĩcĩ Yokobĩ, ivitia uduktiak nẽẽgẽ ĩnõõnõ entek ne, “Kõdõlanta gotonu Ethau, ĩthõng yoko aku nẽ adiim ngĩ arumonu kĩ aniitia, ĩthõng iriowa nẽ kĩ eet cĩk ẽẽn eet etĩmma.”
7 Ma balna natẽ abarrit Yokobĩ, ĩthõng ẽngẽr nẽ eet wũk arũmẽ kĩ ĩnõõnõ goolliok ramma, ĩthõng naboo ẽngẽr, athaa, tĩĩn kĩ nyaakalnya kĩĩ goolliok ramma.
8 Amuk balna nẽ athĩ ne, “Ma ngĩ aku Ethau jora, ĩthõng ithianaĩ jore kĩ eet cĩk ootinu, avir kẽnnẽ tĩna eeta cĩk uungnothi ẽẽ.”
9 Ma natẽ, alawõy Yokobĩ ĩthĩ ne, “Nyekuc cĩ baatĩ baang cannĩ Abraham kĩ baang cannĩ Aĩthak, eeni niia Makayyioit wũ balna aduwacca aneeta etheca ne, ‘Miirie bĩt looca cunung, bĩt mũdõthĩk tionniok cugunik, ĩthõng katĩ kaanyi avvu jurrung.’
10 Keeni na et ĩmma kaganoko cĩ woccia athii cĩ kawũpanẽ thimati cunni kĩ thõõth cunni cĩ athũnnẽ wũ adĩmaneca niia. Keeni balna na ngĩjũrrait ĩmma cĩ kayai tẽlẽẽĩ kaganoko baa ngĩ kabahiay Lĩĩl cĩ Yordanĩ. Ĩthõng thĩ, anya yoko niia aneeta kabalõy õrrõt kẽyẽk eet kĩ kaal goolliok ramma.
11 Kalayyie õrrõt, ẽẽla niia aneeta athĩnẽy ĩcĩ gõtõnõna Ethau, ĩthõng kongollie na katĩ ma ngĩ aku uukca nẽ aneeta jora kĩ ngaay cĩganĩk kĩ dõõlĩ cĩganĩk vẽlẽk.
12 Ĩthõng thĩ, aduwacca balna niia aneeta etheca ne, ‘Aavẽ katĩ niia jurrung. Kaanyi katĩ na aniitia dõõlĩ cĩk meelĩk cĩk ẽẽn kĩ kathaac cĩ bũlũcak cĩk athii cĩ ekebinie.’ ”
13 Ngaatĩ ongiyyie Yokobĩ natẽ. Ma balna ikiyyia ẽbẽra anyinit cĩ itioni nẽ gõtõnĩ cĩnnĩ Ethau.
14 Ẽbẽra balna nẽ ẽẽtha cĩk ngayyik cĩk ẽẽn eet õmmõtõ, kĩ kõõnyĩ cĩk ẽẽn etĩmma, ĩthõng ẽbẽra athaa cĩk ngayyik cĩk ẽẽn eet õmmõtõ kĩ mĩrkĩcĩ cĩk ẽẽn etĩmma.
15 Ĩthõng atangala nyaakalnya cĩk ngayyik etĩmma kõmmõtõ cĩk ahurtie, ĩthõng naboo atangala tĩĩn cĩk ngayyik eet ramma kĩ olenya õmmõtõ. Ma naboo natẽ, atangala thigirie cĩk ngayyik etĩmma kĩ cĩk maacĩk õmmõtõ.
16 Ma natẽ, ẽngẽr kaal vẽlẽk mĩn mĩn, ĩthõng aanyĩk ticcianniok cĩgĩnĩk kuthutti, ĩthõng uduwak ĩnõõgõ ethek ne, “Ũtũwac kaal, anycĩk niigia ĩnõõgõ kõtõõthõ mĩn mĩn kĩĩtõ rẽẽntĩ.”
17 Ma baa natẽ, uduwak ticciannioit cĩ uwuantẽ ẽẽ, ethek ne, “Ma ngĩ urumtowu kĩ Ethau, ĩthõng ijini nẽ ethei ne, ‘Makayyioit cunni ngẽnẽ? Õkkõ niia nga? Ngẽnẽ cĩ abal kaal cĩk angĩddu wo?’
18 Ĩthõng, duwak thẽk ennek ne, ‘Ẽẽn kaala cĩkkõ cĩk ticciannioit cunni Yokob. Ẽẽn nẽẽgẽ anyinit cĩ itioniai nẽ makayyioit cannĩ Ethau, ĩthõng nga aku nẽ vurtia cĩnang.’ ”
19 Ĩthõng uduwak naboo ticciannioit cĩ õwõbẽcĩ cĩ owu kĩ cĩk avvu vurtia vẽlẽk thõõth codoi doo ethei ne, “Thõõth cĩ katĩ õkkõ aduwaai niia Ethau katĩ ngĩ urumtowu kĩ ĩnõõnõ neccio.
20 Abũnna thẽk dĩdĩ ma ngĩ enneccu ne, ‘Nga aku ticciannioiti cunnie Yokobĩ vurtia cĩnang.’ ” Amuk balna Yokobĩ athĩ ne, “Ma ngĩ kitioni Ethau kaal cĩkkõ ĩcĩ owu, anyi katĩ thĩ woccia ĩnõõnõ kalal thĩnĩn cĩnnẽ, ĩthõng ẽbẽlbẽla. Ĩthõng ma vurtia ĩcĩ kurumtowa ẽlẽmnya woccia katĩ nẽ”
21 Ngaatĩ itionĩ Yokobĩ anyinit cĩnnĩ ẽẽ, kutuwuantõĩ ticcianniowa, ĩthõng atangu nẽ baalin nĩcẽ natẽ.
Itiktõy Yokobĩ kĩ Nyekuc
22 Ma baalin nĩcẽ, ĩtĩngathõ Yokobĩ kĩ ngaay kĩ lõgõõ cĩgĩnĩk cĩk ẽẽn õmmõtõ kĩ codoi ẽẽ, ĩthõng abaaktẽ lĩĩl cĩ athĩ Jabbok.
23 Ma vurtia cĩ itionĩ nẽ ĩnõõgõ kabaaktẽ lĩĩl, ikiyyia itionĩk kaal vẽlẽk cĩk ayak nẽ kabaaktẽ lĩĩl.
24 Ma balna ngĩ ũtũngothĩk Yokobĩ nẽdõ, ikiyyia eeti ĩmma, ĩthõng ivitia itiktõy kĩ ĩnõõnõ kaal lõõcĩ.
25 Ma baa ngĩ acĩn eeti coo ngatĩ athii nẽ cĩ amaacĩ Yokob wo, ikiyyia uuk nẽ vaan cĩ Yokobĩ kũpũthẽ vaanĩ cĩnnẽ.
26 Ma natẽ, uduwak eeti neccie Yokob ethek ne, “Iliba kõrra, nyẽ kũwũ.”
Ẽdẽcĩ kẽnnẽ Yokobĩ ethei ne, “Athii cĩ kaanyi na aniitia gõõl gii thẽk niia ngĩ agatana aneeta.”
27 Ajin kẽnnẽ eeti neccie ĩnõõnõ ethei ne, “Athĩ yoko thar cugunik ngẽnẽ?” Ẽdẽcĩ nẽ ethei ne, “Athĩnna Yokob.”
28 Ẽdẽcĩ eeti neccie ĩnõõnõ naboo ethei ne, “Ĩthĩnga katĩ athĩ thar cugunik Yokob naboo. Athĩ katĩ thar cugunik Ĩthraĩl,b nyatarka itiktoowu niia kĩ Nyekuc kĩ eeta, ĩthõng atamaacu niia ĩnõõgõ.”
29 Ĩthõng ĩthĩ Yokobĩ ne, “Duwaha baai da thar cugunik.” Ẽdẽcĩ kẽnnẽ eeti neccie athĩ ne, “Nyia jin niia thar cĩganĩk koo?” Ma natẽ, agatan eeti neccie Yokob.
30 Ngaatĩ akanẽcĩ Yokobĩ nginicẽ thar cĩk athĩ Penuel,c ma natẽ, ĩthĩ nẽ ne, “Kĩcĩna wanĩco Nyekuc bẽrẽnĩy cĩganĩk kir, ĩthõng athii cĩ kadaai.”